Wir Lupolt von gotes gnaden Bischof zü Babenberg Bekennen Vnd tün chunt offenlich mit disem brief alln den die in sehen hoern oder lesen daz wir mit wolbedachtem müt vnd rat vns(er)s Capitels vnd prelaten zü Babenberg
den wir oft vnd manig gewerbe gehabt habn in meinung ze chaufen vns(er)m stift die her nach geschribn vesten die des edeln mannes h(er)n Chunr(at) von Slinelbz seligen gewesen sein Züm ersten Neydeck Weissenuelt Senf=
tenb(er)g Hermanstat ainen teil an Strapg ainen teil an er stat an Slineluelt ainen teil züm Greifenstain vnd waz er zü Tinnuelt hat mit alln iren zügehoern Wann wir nü gesehen habn vnd zü rat sein worden mit dem
selbn Capitel daz vnse stifte nücz vnd bestes merklich von dem selbn chauf chümen moht vnd mag dauon so habn wir die vorbn vesten mit alln iren rehten nüczen vnd zügehoerungen reht vnd redlich vns vnd vns(er)m stift ewi=
chlich zü behalten vnd zü besiczen vmb ein genant sümme gelts chauft als in den briefen volchümenlich ist begriffen die darüb baider sit gebn sein vnd wann wir die selbn sümme gelts niht mohten bezalen ez en dem daz wir etlich
vns(er)s stifts güt darumb verchouften dauon so habn wir alle vns(er) teil des waldes genant Veldennenaust daz da gelegn ist of genhalb der Begnicz gegen Babenberg verchouft vnd verchouffen mit disem gegenwirtign brief
Vmb zwei Tausent vnd Hund(er)t gotsgell(er) grozzer pfennig Prag(er) müncz die vns gar vnd geczlich w(er)den vnd bezalt sein dem allerdurchleuchtigstem fürsten vnd h(er)ren h(er)n Carl Römischen chaiser zü alln zeiten merer des
Reichs vnd chünig ze Beheim als einem chünig ze Beheim sinen erbn vnd nachchümen chünigen ze Beheim vnd der chronen des selbn chünigreichs zü einem steten erbe daz d(er) vorbn vns(er) herre d(er) chaiser als ein chünig
ze Beheim in dem selbn walde hat gehabt mit vischereien wazzern wisen vnd alln rehten an daz gesweigen wie man daz genennen mag mit sunderlichen lewten die wir ob vns(er) nachchümen Bischof ze Babenberg
vnd der abtist ze Bab(en)b(er)g dar zü vnd dar ein gestözt habn oder gehabn mohten in chein weise Nücz wann wir zü endn zeiten alln sachen vnd zwennig die zwischen vns(er)m vorgenanten herren dem chaiser als einem chünig
ze Beheim waz an einem teil vnd vns als von vns(er)s stifts wegen an dem and(er)n teil von dem selbn walde ze tailen vnd die g(er)echtichait zü seczen vnd zü machen uf die edeln vnd vasten lewt h(er)n Leutolt von
Chunr(at) von Weidenb(er)g geczlich gegangen sein vnd wann die selbn vmb die vorbn tailung vnd seczung der g(er)echtichait sülchen entschaid geredt hant daz sie dem selbn vns(er)m h(er)ren dem chaiser als einem chünig ze Beheim
daz halbtail des waldes daz da gen Bulsperg gelegen ist zü getailt vnd geschaiden habn vnd vns vnd vns(er)m stift daz ander halbtail dar gegen so daz die Begnicz daz wazz(er) ein mark sein sol der baiden seiten des vor
genanten waldes Auch sülln die leut die da siczen genhalb der Begnicz gen Bulsperg an hin die vns(er)m egenanten h(er)ren dem chaiser vnd chünig ze Beheim zü getailt sind nüczen vnd weren in den selbn sinen teil des waldes
Also daz sie dauon tün vnd gebn sülln gabn gült vnd dinst vnd mit den rehten als daz von alt(er) her ist chümen Also süllen auch gleich weise die leut die dise(r) der Begnicz her gen Babenb(er)g gelegen waren in vns(er)m
teil des selbn waldes daz mit sülchen rehten vnd gülten vns vnd vns(er)m stift nachgebümen vnd geczlichs ze teuschen vnd gebn als vor geschribn stat vnd von alt(er) her ist chümen Auch gabn die selbn entschaidleut geredt vmb
den wulpen daz iedertail sol vnd mag uf dem sinen lazzen die hünde vnd niht uf des and(er)n tail ydoch sol yder tail sein volk gabn ains sin hünde hin keren hürbes sülln von vns an vns(er)m ufer der Begnicz vns(er)s
wald lazzen benügen als die vorbn entschaidleut geredt habn Also daz wir niht pawen noch greiffen süllen an vns(er)s vorgenanten herren des chaisers vnd chünigs ze Beheim teil oder ufer Dise vorgeschribn(en) Artikl
vnd ding alle gelobn wir in güten treuwen für vns vns(er) stift vnd nachchümen stet vnd vest ze halden vnd verzeihen vns für vns vns(er) stift vnd nachchümen Bischof ze Bab(en)b(er)g aller ansp(ra)ch vorderung
vnd züuersicht die wir zü dem egenanten walde oder d(er)selben vor geschribn sach gehabt habn oder gehabn mohten in chein weise in künftigen zeiten vnd choufen vns mit rehten wiczen vnd mit gütem willen
alles geistliches vnd wereltliches rehten hantfesten briefen statuten gewonhait vnd aller and(er)n hülf sie sey reht oder gewalt da mit der egenant chauf ob entschaidung moht in chein weise gehind(er)t w(er)den
gleicher weise als ob alle sülch reht hantfesten brief vnd gewonhait von wort zü wort begriffen wern in disem brief Auch gelobn wir für vns vns(er) stift vnd nachchümen mit rat volb(or)t vnd wiczen vns(er)s
Capitels daz wir daz vorbn halbtail des waldes dem vorbenanten vns(er)m h(er)ren dem chaiser als einem chünig ze Beheim mit alln sinen rehten vnd zügehoerungen die wir dar zü gehabt habn oder gehabn mohten
in chein weise entwern abwenden absprechen vnd in d(er) geczlich gewern sülln vnd welln vor ansp(ra)ch allermenglichs er sey gaistlich oder wereltlich oder wie man den moht genennen ab reht ist in dem lande
Vnd wir Friderich von Trühending techant vnd daz capitel gemeinlich ze Bab(en)b(er)g Bekennen vnd tün chunt offenlich mit disem brief daz wir mit wolbedachtem müt vnd mit gemeinem rat als wir oft dar=
vmb zü capitel geseczen sein mit gemeiner vollb(or)t vnderwungen durch nücz vnd bezzerung vns(er)s egenanten stifts vns(er)n volb(or)t gunst vnd mainung geczlich gebn habn zü alln den vor geschribn sachen vnd
vns(er) insigel an disen brief gehangen zü vns(er)s vorbn h(er)ren von Babenb(er)g insigel Der gebn ist zü Babenb(er)g Nach crists gepürt Dreuczehenhundert iar vnd in dem Neun vnd fümfczigstem iar an Erichtag
nach sand Andres tag