Wir Albrecht und Friderich von gotes gnaden Burggrafen ze Nurnberg verjehen und tun kunt offenlich an
disem brif allen den die in sehent lesent oder horent lesen Daz wir dem aller durchleuchtigsten unserm lieben
gnedigen herren herrn Karln Romischem kayser ze allen zeiten merer des Reichs und kunig ze Beheim mit
guter vorbetrachtung und mit unsers Rats rat recht und redlich verkauft und ze kauffen gebn
haben im und dem kunigreich ze Beheim Die Lehenschaft der vesten und des purgs zu dem
Rotenberg als die selbn vesten und den purg unser lieber getriwer Heinrich der Wildensteiner genant zu
Rotenberg von uns und unser herschaft ze lehen hat gehabt umb drew tusent guter und swer
guldein der wir gar und genzlich von im gewert und bezalt sint Also daz wir dhein unser erbn
noch nachkome nymermer kein ansprache nach der selbn Lehenschaft der vesten und des purgs zu
dem Rotenberg und uber alles daz zuder selbn vorgenante vesten und purg gehort Daz der obgenant
Heinrich Wildenstein von uns und unser herschaft ze lehen gehab hat haben noch gewinne sulln in
dhein weise on geuerde Und daz daz also ewichlich craft und macht habe und nymer verrucht werde Und
auch zu ein merern sicherheit und urkunde Geben wir disen brif versigeltn mit unsern grozzen anhangen
den Insigeln Der geben ist am nachsten montag vor sant pauls tag als er bekert wart ze prassen
berk uf der vesten Do man zalt von kristus geburt drewzehenhundert und in dem sechczigstem
Jare