Wir Ludewig gnant Romer von gotes gnaden Marggraf zu Brandemburg und zu Lusitz des heiligen Reichs obrist camerer pfalenzgraf
bei Rein und herzog in Beyern Bekennen und tun kunt offenlich mit diesem brieve allen den die yn sehen oder horen lesen Wann vormals
die stat zu Eger mit dem lande und die vesten flozz und parkstein mit iren zugehorungen den hochgeborn kunigen zu Beheim und der cro
nen desselben kunigrichs fur vierzigtausent Mark lotiges silbers von wegen des heiligen Romischen Reichs zu rechtem pfande versetzet sein
Und wann wir und andere unser mitkurfursten mit warhaftig kuntschaft wol underweiset sein daz flozz und die vesten und waz dorzu
gehoret des kunigrichs zu Beheim recht eygen ist / und von unwissen und unvesil dem egen(anten) kunigrich zu Beheim zu pfande worden ist in
der weise / als in unsir und ander uns(er) mitkurfursten briefen die wir dorubir geben haben volkomlich ist begriffen davon und off die rede
daz die hochgebornen kunige zu Beheim und die crone desselben kunigrichs in der and(er)n pfantschafft ungehindert bleiben Sint demmal daz flozz
als vorgeschr(iben) ist ir rechtes eygen ist und dorumb ir pfand nicht gewesen mag / So meinen sprechen und leuttern wir mit wolbedachtem
mut als eyn kurfurste des heiligen Reichs und obrister camerer daz die obgen(anten) hochgeborn kunige zu Beheim ir erben und nochkomen ewe
clich und die crone desselben kunigrichs zu Beheim die obgen(anten) vierzigtausent Mark lotiges silbers uff die stat zu Eger und dem lande und
auch uff der vesten parkstein und iren zugehorungen haben sullen / als die pfantbriefe sagen die von des Romischen Reichs wegen dorubir
geben sint / gleicher weis als ob flozz in der egen(anten) pfandunge nie benant were Mit urkunt ditz brieves versiegelt mit uns(er)m Insiegel
der geben ist zu prag nach cristus geburt druzenhund(er)t jar und darnach in dem sechzigisten jar an uns(er) frawen tag liechtmesse