Wir Johans Junge vnd Thomas bruder genant freuntsperger Bekenne vnd tun kunt offinlich mit disem brieue allen den die in
sehen odir horen lesen Wann der Allirdurchluchtigiste furste vnd herre her karl von gots gnaden Romischer keiser zu allen zeiten merer des
Richs vnd kunig zu beheim vnsir lieber gnediger herre vor alle schult die er vnd seliger gedechtnizze der hochgeborn furste vnd h(er)re
her Johans weworn kunig zu beheim sein vatter vnsir lieber herre vns vnd vnsir(n) Erbn vnd nachkomen schuldig gewesen seint vnd
doruber wir yre brieue gehabt haben vns von vnsir vnd vnsir Erbn vnd nachkomen wegen Eylenhundart guter guldin gebn vnd be-
richtet hat gnediclich domit vns wol benuget vnd danken seinen gnaden vnd dorumb sagen wir den egen(anten) vnsir(n) gnedigen herren den keiser
seinen vatter seligen vnd ir Erbn vnd nachkomen aller schult die sie vns vnd vnsirn Erbn schuldig gewesen seint doruber wir brieue ge-
habt han odir nicht in welcherwis die schult ist gewesen los vnd ledig vnd wollen der nymermer gesordn vnd ob dheine brieue vmb
soliche schult in dheinen zukunftigen zeiten zu lichte quemen vnd vorbracht wurden die sulln keine craft noch macht haben in dheine(r)
weis vnd sullen vns vnsir(n) Erbn vnd nachkomen keine hulfe bringen an vrkund ditz brieues vsiegelt mit myn Johansen Insigel
vorgen(ant) vnd wir Junge vnd Thomas bruder des obgen(anten) Johans bekennen vns aller diser vorgeschribn dinge vnder desselben vnsirs bruders
Insigel wann wir vnsir eygen Insigel nicht enhaben zu disem male Gebn zu nurmberg nach Cristus geburt druzenhund(er)t Jar dornach
in dem Sechtzigsten Jare an sant Jacobes tag des heiligen Aposteln