Ich Johans von Kuenkingen Bekenne vnd tu kunt offenlich mit diesem brieff allen den die jn sehen oder horen lesen Wann der Erber her leutolt
von Kuenkingen Tumprobst zu Wirtzburg mein lieber Bruder die Vesten zu Gutemburg bi Gungen die sein ledig frey aigen ist gewesen mit
aller jrer zugehorunge dem Allerdurchleuchtigistem fursten vnd h(er)ren h(er)n Karl romischem keiser zu allen zeiten merer des Reichs vnd kunig
zu Beheim meinem gnedigen h(er)ren lediclichen vfgeben hat vnd hat sie von jm vnd dem Reiche zu rechtem manlehen empfangen dauon
gelob ich fur mich vnd mein Erben in guten trewen an geuerde vnd bei dem gesworn eide den ich zu den hailigen daruber getan hab ob
daz geschiht daz ich od(er) mein Erbn die egen(anten) Veste jnnehaben wurden Es sei in Vormundschaft erplicheit oder sust in dheineweis daz wir
denne dem egen(anten) vnsern h(er)ren dem keiser vnd seinen nachkomen an dem Raich romischen keisern vnd kunigen als vnsern rechten h(er)ren
getrew gehorsam vnd vnd(er)tenig sein wollen vnd sullen jren schaden zu wenden vnd jren frumen zu werben vnd alles daz tun wol
len daz ander des Reichs dienstman von sulichen lehen durch recht oder gewonheit pflichtig sein zetun vnd daz die egen(ante) Veste
gutemburg dem egen(anten) vnsern h(er)ren dem keiser vnd seinen nachkomen an dem Raich vnd allen jren Amptleuten vnd dienern zu
allen jren vnd des Reichs sachen vnd nöten wider allermenglich niemant vzgenomen offen sein sol vnd jn damit gewarten
wollen vnd sullen als oft des not geschiht doch an vnsern schaden als gewonlich ist zu vrkund ditz briefs versigelt mit meinem
Anhangenden Jnsigel der geben ist zu Nuremberg nach Cristi geburt dreuzenhundert Jar darnach in dem Sechzigisten Jar an sand
Katherinen tag der heiligen Juncfrawen