Wir Růdolf von Gots gnaden Herczog ze Oesterr(eich) ze Steyr und ze Kärnden bekennen und tůn kunt offenlich mit disem
brief allen den die in sehent oder hörent lesen daz wir mit wolbedachtem můte und mit räte uns(er) getrewen dem aller
durchleuchtigistem fürsten und uns(er)m gnedigen h(er)ren h(er)r(e)n Carlen Römischen keyser ze allen zeiten merer des Riches und
kung ze Behem als einem kunge ze Behem und dem hochgebornen fürsten h(er)r(e)n Johansen Marggrafen ze Merhern
für uns uns(er) prüd(er) und uns(er) aller erbn Herczogen ze Oesterr(eich) ze Steyr und ze Kärnden gelobt haben und geloben auch
in guten t(re)wen ane geuerde Wär daz sache daz chain ir Juden uzz iren Landen fürstentůmen herscheften und Stetten
wo die gelegen sint und wie man die sunderlich nennet und uns ziehen wolten daz wir dieselben niht můgen enphahen
ufnemen schirmen oder halden wellen od(er) sülln es were danne mit des egn(anten) uns(er)s h(er)ren des keysers als eins kunges
ze Behem und des oftergn(anten) h(er)r(e)n von Merh(er)n uns(er)s Oheims und ir erbn gůtem willen Des gebn wir ze urkund disen
brief besigelt mit uns(er)m Ingesigel der gebn ist ze Nůrenb(er)g an sand Lucien tag Nach Cristes geburt dreuzehn
hundert Jaren und darnach in dem Sechczigistem Jare