Wir Gerlach von gots gnaden Erczbischoff zu meincze des heiligen Reiches Erczkanczeller in duczenlanden Bekennen vnd tun kunt offenliche mit disem brieff allen den die in sehen oder horen lesen Daz von wegen des
Allirdurchluchtigsten fursten vnd herren h(er)n karls Romisches keis(er)s zu alln zeiten merer des Reichs vnd kuniges zu Beheim vnsers liebn gnedigen herren vnd des hochgeborn fursten h(er)n Johans Marggrauen zu Merhern
vnsers liebn neven vnd frundes an eime teil vnd von wegen des hochgeborn fursten hern Rudolfs hertzogen zu Osterrich zu Steyr vnd zu kernten vnd siner bruder vnsir lieben frunde an dem andern teil vns etliche
brieffe geantwert sin vnd sin gebeten von beiden teilen daz wir vnsern willen geben zu denselben brieffen vnd waz dar inne begriffen ist vnd daz wir sie auch bestetigen vnd confirmiren wolten nach vnsers amptes
recht vnd wirden vnd dieselben brieffe waren begriffen mit solichen worten als harnach geschribn stet Wir Rudolf von gots gnaden hertzoge zu Osterrich zu Steyr vnd zu kernten Bekenne vnd tun kunt offenliche
mit disem brieffe allen den die in sehen oder horen lesen Daz wir mit dem allirdurchluchtigsten fursten vnd herren h(er)n karl Romischen keiser zu allen zeiten merer des Reiches vnd kunig zu Beheim vnsirn liebn gnedi
gen herren vnd sweher vnd dem hochgeborn fursten h(er)n Johansen Marggrauen zu Merhern vnserm liebn Oheim vmb alle anspchel vnd vfflouffe die zchussn vns beiden siten vntz uff disen hutigen tag gewest sint
von gnaden vnsirs herren des keisers also fruntliche vnd gutliche vorrichtet sin vnd gnedicliche versunet daz der egenan(te) vnser herre der keiser vnser gnediger herre sin wir vnd der egen(ante) vnser Oheim der Marggraue
vns gůter frunt sin sol eweclich dauon mit wolbedachtem mute mit rate vns(er) frunde vnd vns(er) getruwen vndertanen mit rether wizzende vorzihen wir vns vor vns vnser bruder die hochgeborn friderich Albrechte
vnd Lwpolde vnser vnd ir erben vnd nachkomen ewecliche alles rechtes vorderunge anspruche vnd zuspruches die wir zu dem kunigriche vnd der Cronen zu Beheim vnd zu der Marggraueschafft zu Merhern
den landen vnd den furstentumen die sie zu polan habent vnd den landen zu solzbach vnd auch andern die sie in duczenlanden habent die zu dem kunigreiche zu Beheim gehorent vnd dar ane stossent vnd allen
andern iren landen furstentumen vnd herrschafften vnd allen iren zugehorden wo die gelegen sint in dheim wise gehabt haben haben oder haben mochten vnd by namen des rechtes daz wir von wegen der hochgebor
nen furstinnen frow katherin des egen(anten) vnsirs herrn des keisers elisten gemahels vnser swestern gehaben mochten wann dasselbe recht sol vns vnschedelich sin Es were dann daz der egen(ante) vnser herre der keiser vnd der Marggraue
zu Merhern vnd ir erben mannes geslechte die sie itzunt habent oder noch gewinnen also verscheiden daz sie eliche libes erben mannes geslechte hinder in nicht liessen vnd globen in guten truwen ane geuerde vnd mit
gesworem eide den wir dar uber libhafftig zu den heiligen getan haben dem egen(anten) vnsirn herren dem keiser als eime kunige zu Beheim vnd h(er)n Johanse Marggrauen zu Merhern vnd iren erbn vor vns vnser obgen(anten)
bruder vnd vns(er) alle erben daz wir nach dem egen(anten) kunigriche vnd der Cronen zu Beheim der Marggraueschafft zu Merhern vnd allen dem daz da an geschriben stet vnd iren zugehorungen nimmer gesten wollen mit
worten mit werchen mit dem rechten vorderunge oder sust in dheine wise heimeliche oder uffenbare sunder wir wellen vnd sollen die egen(anten) vnsirn herren den keiser als einen kunig zu Beheim vnd h(er)n Johanse Marggraue zu
Merhern vnd ir erben da bi mit frid vnd mit gutem gemache ewecliche laßen Auch geloben wir in guten truwen ane geuerde vnd bij dem egen(anten) vnsirn gesworem eide daz wir in alle hantfesten brieff vnd orkunde die
wir daruber haben es sij von erbschaffte panteschaffte lehen gabe oder satzunge oder sust in dheim wise ob sie auch vns oder vnsirn eltern von keisern oder Romischen kunigen oder sust von iemant anders wurden vber
gan vnd gentzliche widergeben vnd in antwerten wellen vnd sollen vnd keine soliche hantfesten oder brieff bij vns behalten in dicheine wise Wer aber daz dheinerleij soliche hantfesten brieff oder orkunde zu besche
komen nimmer in dheinen zeiten so mochten vnd wolden wir daz die vncrefftig vnnutze vnd vndogenliche sin sollen vnd vns vnsirn brudern erbn vnd nachkomen keinen frumen vnd den egen(anten) vnsirn herren dem keiser als einem
kunige zu Beheim vnd dem Marggraue zu Merhern iren erbn vnd nachkomende keinen schaden bringen Auch globen wir in guten truwen ane geuerde vnd bij dem egen(anten) vnsirn gesworem eide daz wir alle die obegeschriben
vnsir globede gantz stete vnd vnuerrucket ewecliche haben vnd halten wollen vnd sollen vnd da wider nimmer gedun in dheim wise vnd vorzihen vns uffenberlich vnd mit rether wizzen vor vns vns(er) bruder vnd vnser
aller erbn vnd nachkomen aller hilfe geistliches vnd werntliches rechtes vnd aller gesetze bebestlicher vnd keislicher briese der lande gewonheit vnd aller ubunge vnd behaltnizze da mit wir vns behelfen mochten
oder da mit der egen(ante) vns(er) herre der keiser als ein kunig zu Beheim der Marggraue zu Merhern ir erben vnd nachkomen kunige zu Beheim vnd Marggrauen zu Merhern in den egenanten furstentumen landen vnd herrschafften
mochten in dheim wise beschediget oder gehindert werden des sint gezeuge der Erwirdige her Johans Erwelter vnd besteter des bistumes zu Gurk vnser Canceler vnd vns(er) getruwen Alber von Puchsen oberster kump
schen in Osterrich pilgrym der Erewin vnser hofemeister Burckart seal von Eckkuch Rudolf der hiuns von schonauwe vnd vnd Cunrat von chlinnenberch heinrich der pommer vns(er) schencke hans der lachss
vns(er) hofmarschalch vnd ander erber herren Ritter vnd knechte die da bij waren mit orkund disses briefes vorsigelt mit vnsirm Ingesigel Der geben ist ze halle bij Eßelingen nach xpi geburte dreuzehn
hundert Jar vnd dar nach in dem Sechczigisten Jare an dem nehesten sonneabent vor vnser frawen tage als sie geborn wart Des haben wir angeshen grose begerunge beider teile vnd uff die rede daz zwuschen
den egen(anten) fursten iren furstentumen landen vnd herrschafften frid vnd fruntschafft eweclichn bliben so geben wir vnsern willen zu allen den dingen die dauon geschribn sint vnd bestetigen vnd confirmirn die
selben brieff in allen meinungen puncten vnd artickeln von worte zu worte als sie dauon begriffen sint vnd tun wir daz als ein Erczbischoff zu meincze des heiligen Reiches Erczkanczeller in duczenlanden vnd ein
Churfurste des egen(anten) Reiches mit rether wizzende vnd nach vnsirs amptes recht vnd wirden mit orkunde ditz brieues vorsigelt mit vnsirm anhangenden Ingesigel Der Geben ist zu Nurenberg nach xpi
geburte Dreuzehenhundert Jare vnd dar nach in dem ein vnd Sechczigisten Jare des nehesten mitwochen nach dem Sontage als man singet in der heiligen kirchen mis(eri)c(or)dia d(omi)ni