Wir Wylhelm von gots gnaden Erczbischoff zu Cöln des heyligen Römischen Rychs Erczkanczler in ytalien bekennen und tun kunt offenlich mit disem briefe allen den die in sehent oder horent lesen daz von wegen des aller
durchlauchtigsten fursten und herren hern Karl Römischen keysers zu allen zeiten merer des Rychs und küniges ze Beheim unsers lieben gnedigen herren und des hochgeborn fursten hern Johansen marggrafen ze Mör=
hern unsers lieben frundes an eime teil und von wegen des hochgeborn fursten hern Rudolfs herczogen ze Osterrich ze Steyr und ze Kernten und seiner brüder unser lieben frunden an dem andern teyl uns
etliche brieffe geantwurt sint und sein gebeten von beiden teylen daz wir unsern willen geben zu den selben brieffen und waz dar inne begriffen ist und daz wir sy auch bestetigen und confirmiren wolden nach unsers
amptes recht und wirden und die selben brieffe waren begriffen mit solichen worten als her nach geschriben stet Wir Rudolf von gots gnaden herczog ze Osterrich ze Steyr und ze Kernten bekennen und tun
kunt offenlich mit disem brieffe allen den di in sehen oder horen lesen daz wir mit dem allerdurchlauchtigsten fursten und herren hern Karl Römischem keyser zu allen zeiten merer des Rychs und künig ze Beheim un=
sern lieben gnedigen herren und sweher und dem hochgeborn fursten hern Johansen marggrafen ze Mörhern unserm lieben oheim umb alle missehel und ufflauff die zwisschen uns beyden siten unz uff disen heu=
tigen tag gewesen sint von gnaden unsers herren des keysers also freuntlich und gutlich verrichtet sein und gnediclich uffent daz der egenant unser herr der keyser unser gnediger herre fur sich und der
egenant unser oheim der marggraff unser guter frunt sein fur ewichlich da von mit wolbedachtem mute mit rate unsers frunde und unser getruwen andertanen mit rechter wizzen uffgeben wir uns fur uns
unser brüder die hochgeborn fryderich Albrechten und Leupolden unser und ir erben und nachkomen ewichlich alles rechten forderung anspruch und zuversicht die wir zu dem künigreich und der cronen
ze Beheim und zu der marggraffschafft ze Mörhern den landen und furstentumen di sie ze Polen haben und den landen ze Sultzbach und auch andern die sy in dewtschen landen haben die zu dem künig
reich ze Beheim gehorent und dar an stozent und allen andern iren landen furstentumen und herschafften und allen iren zugehorungen wo die gelegen sint in dheineweis gehabt haben haben oder haben
möchten umb bey namen des rechten daz wir von wegen der hochgebornen furstinnen frow Katherin des egenanten unsers herren des keysers tochter unser eliche wirtinne gehabt mochten swenn
daz selb recht sol uns unschadlich sein eez wer denn daz die egenanten unser herr der keyser und der marggraff ze Mörhern und ir erben mannes geslecht die sie iczunt haben oder noch gewinnen
also usssterben daz sie eliche kint erben mannes geslecht hinder in nicht liezen und geloben in guten truwen on geverde und mit geswornem eyde den wir daruber corperlich zu den heyligen ge=
tan haben dem egenanten unserm herren dem keyser als eime künige ze Beheim und hern Johansen marggrafen ze Mörhern und iren erben fur uns unser vorgenant brüder und unser aller er=
ben daz wir nach dem egenanten künigreich und der cronen ze Beheim der marggraffschafft ze Mörhern und allem dem daz da vor geschriben stet und iren zugehorungen nimmer gesten wöllen
mit worten mit werken mit dem rechten forderung oder sust in dheineweis heimlich oder offenbar sunder wir wöllen und sullen die egenanten unsern herren den keyser als einen künig ze Beheim
und herrn Johansen marggrafen ze Mörhern und ir erben da bey mit fryd und mit guten gemache ewichlichen lazen Auch gelob wir in guten truwen one geverde und bey dem egenanten unserm ge
swornem eyde daz wir in alle hantfesten brieff und urkund die wir daruber haben ez sy von erbschafft schirmeschafft lehen gabe oder saczung oder sust in dheineweis ob sy durch uns oder unsern
eltern von keysern oder Römischen künigen oder sust von iemant anders worden weren gar und genczlich widergeben und in antwurten wöllen und sullen und kein suliche hantfesten oder brieff bey uns
behalten in dheineweis Wer aber daz dheinley suliche hantfesten brieffe oder urkund zu unsern händen immer in dheinen zeiten kumen und vallen wurd daz die unkrefftig unnutze und untaug=
lich sein sullen und uns unser brüder erben und nachkomen keinen frumen und dem egenanten unserm herren dem keyser als einem künig ze Beheim und dem marggraffen ze Mörhern iren erben
und nachkumen keinen schaden bringen Auch gelob wir in guten truwen on geverd und bey dem egenanten unserm gesworn eyde daz wir alle die obgeschriben unser gelubde gancz stete und un=
verrucket ewichlich haben und halten wöllen und sullen und da wider nymmer getun in dheineweis und uffgeben uns offenberlichen und mit rechter wizzen fur uns unser brüder und unser aller erben
und nachkomen aller hilffe geystlichs und werntlichs rechten und aller gesetze bebtslicher und keyserlicher bucher der lande gewonheit und aller dinge und behelffnisse da mit wir uns behelffen
mochten oder da mit der egenant unser herr der keyser als ein künig ze Beheim der marggraff ze Mörhern ir erben und nachkomen künig ze Beheim und marggraffen ze Mörhern in den ege
nanten furstentumen landen und herschafften mochten in dheineweis beschedigt oder gehindert werden Des sint gezeuge der erwirdig herr Johans erwelter und besteter der kirchen ze Gur=
ke unser kanczler und unser getruwe Alber von Puchern oberster truchsäz in Osterrich Pylgreym der Eweun unser hofmeister Eberhart graff von Eberspach Rudolf der hunte von Eberspach Ru=
dolf und Chünrat von Blumenberch Heinrich der Püntner unser schenk Jans der Laczberger unser hofmarschalch und ander erber herren ritter und knechte die da bey waren ze urkund ditz
briefes uffigelt mit unserm Ingesigel Der gebn ist zu Velds bey Eczelingen nach Cristus gepurd dreiczehenhundert jar dar nach in dem sechtzigsten jar an dem nehsten sunabent vor unser
frawen tag als sie geborn wart Des hab wir angesehen groze begerung beydertayl und uff die rede daz zwisschen den egenanten fursten iren furstentumen landen und herschafften fryde
und freuntschafft ewichlichen blieben So geben wir unsern willen zu allen den dingen die da vor geschriben sint und bestetigen und confirmiren die selben brieffe in allen meynungen sinnen und
artikeln von wort ze wort als sy da vor begriffen sint und tun wir daz als ein Erczbischoff ze Cöln des heyligen Römischen Rychs Erczkanczler in ytalien und ein kurfurst des egenanten Rychs mit rech=
ter wizzen und nach unsers amptes recht und wirden ze urkund ditz brieffs uffigelt mit unserm anhangenden Ingesigel Der gebn ist ze Nurnberg nach Cristus gepurd dreiczehenhundert
jar dar nach in dem eyn und sechtzigsten jare an dem nehsten mitwochen nach dem suntag so man singet misericordia domini