Wir Ludoweig genant der Romer vnd Otte gebruder von gots gnaden Marggrauen zu Brandenburg vnd zu Lusitz des heiligen Reichs obristen Camerer Pfalentzgrauen bey Reyn vnd Hertzogen in Beyern
Bekennen vnd tun kunt offenlich mit disem briefe allen die in sehen odir horen lesen Wann der allirdurchleuchtigste furste vnd herre herre Karl Romyscher keyser zu allen zeiten merer des
Reichs vnd kunig zu Beheim durch sunderliche seyne gute vnd durch sulche gnade als er vns fruntlichen meynet vns gelobt hat in guten trewen on geuerd das er vns dem egen(anten) Marggrafen
Otten die hochgeborne furstinne Jungfraw Elyzabeth seyne tochter zu eyner elichen wirtinne nach der kirchen gewonheit geben wil vnd sol inwendig syben Jaren die man von dem suntag
nach Ostern der schirest kunftig ist nach enander zelen sol Vnd hat ouch gelobt daz er vns dem egen(anten) Marggrauen Otten mit der egen(anten) vnser liebn gemahel seyner tochter zwentzig tusent
schok grozzer pfenninge Prager muntz mit gereitem gelde geben vnd gentzlich betzalen wil vnd sol inwendig eynem gantzen Jare zu zelen von dem tage als vns die egen(anten) seyne tochter vnser
liebe gemahel zugeleget wirdet des geloben wir den borgen Marggrauen Ludoweig vnd Otte besampt in guten trewen on geuerd vnd mit rechter wizzen das wir der egen(anten) Jungfrawen
Elyzabeth derselbn vnsirs herren des keysirs tochter dreyzigtusint schok grozzer pfenning Prager muntz vff landen burgen vnd vesten gehant on allen furczog beweisen sullen vnd
wollen in sulcher bescheidenheit wer das sache daz wir obgen(anten) Marggraue Otte vnd die egen(anten) Jungfrawe Elyzabeth vnser liebe gemahel also sturben daz wir Erben hinder vns nicht liezzen
daz denne dem egen(anten) vnsirm herren dem keyser vnd seynen Erben vnd nachkomen zwentzig tusint schok vnd vnsirm bruder Marggrauen Ludowigen vnd seynen Erben dreyzigtusint schok grozzer
pfenning Prager muntz wider werden vnd vnuerzogenlich geuallen sullen Wer ouch sache das der hochgeborne furste her Wentzeslaw des egen(anten) vnsirs herren des keysers erstgeborner sun
also sturbe das er eliche seynes leibes Erben mannes geslechte hinder ym nicht liezze vnd dorumb die hertzogtum vnd die furstentum der lande zu der Swidnitz vnd zu dem Jawir vff
die egen(anten) vnsir gnedigen herren des keyser tochter als vff iren rechten Erben vielen so sullen wir die egen(anten) Marggrauen Ludoweig vnd Otte des verpunden vnd pflichtig seyn serpinden
vnd verpflihten vns vnd geloben ouch in guten trewen on geuerd das wir vnsirn Erbn vnd nachkomen dem egen(anten) vnsirn herren dem keyser als eynem kunige zu Beheim seynen Erben vnd nach
komen kunigen zu Beheim vnd der cronen desselben kunigriches leynamen die Marggraueschafft zu Lusitz vnd darzu andir land die dem kunigreich vnd der cronen zu Beheim gelegen
sint vnd die mitenander also gut seint als die egen(anten) hertzogtum vnd furstentum zu der Sweidnitz vnd zu dem Jawir vnd was der hochgeborne furste her Bolke hertzog von Slien vnd herre
zu der Swidnitz vnd zu dem Jawir erblicher herschafft derselbn vnsirs gnedigen herren des keysirs tochter hinder im lazzen wirdet anantwurten vnd an sie weisen sullen vnd dieselbn lant die
wir yn denne inantwurten vnd geben werden sullen wegen vnd gut seyn zu gleycher wirdschafft der egen(anten) furstentum vnd hertzogtum zu der Swidnitz vnd zu dem Jawir vnd was dartzu gehoret
nach vssagung Erberer biderber lute die wir beydirseit dortzu kyesen vnd gebn werden vnd dieselbn lant sullen vnd wollen wir ym gehant beweisen vnd darzu Riter vnd cnecht man vnd burger vnd
alle lantsessen derselben lant sullen im seynen Erben vnd nachkomen kunigen zu Beheim vnd der cronen des kunigreichs zu Beheim doruff hulden geloben vnd sweren Wer aber das wir
die obgen(anten) Ludoweig vnd Otte Marggrauen zu Brandenburg an dem egen(anten) hertzogen Bolken das bestellen vnd schaffen mochten das er die borgen hertzogtum vnd furstentum zu der Swidnitz
vnd zu dem Jawir mit irer zugehorunge vnd was er sust Erbes hat dem borgen vnsirn herren dem keyser als eynem kunig zu Beheim seynen Erben vnd nachkomen kunigen zu Beheim vnd der cronen
des kunigreichs zu Beheim williclichen liezze dorin sol ir gentzlich wol genugen vnd wenne das geschiht vnd wir es dartzu bringen so sullen vns land die wir darumb an sie geweiset habn leyg in
losz vnd ledig seyn Mit vrkund ditz brieues vorsigelt mit vnsirn anhangenden Jngesigel der gebn ist zu Nurenberg nach cristus geburt dreyzenhundirt Jar darnach in dem drey vnd secnzigstem Jare
an dem nechsten sunnabund vor dem suntage als man singet Judica in der vasten