Wir der Richter der Rat vnd die purger gemainclich ze prvnne bekennen vnd tvn kvnt offenlich mit disem briefe daz die durchleuchtigen hochgebornen fursten vnser genedig herren her karel Romischer keyser ze allen zeiten
merer des Reiches künig Wenczla von Beheim sein sun vnd her Johans margraf ze merhern des vorgenanten keyser karels brüder an einem taile Herczog Rvdolf Herczog Albrecht vnd Herczog Levpolt gebrüder Herczogen ze
Osterreich ze Steyr vnd ze kernden anesamt der hochgebornen frawen margreten ir swester weilent marggrafinne ze Brandenburck Herczoginne ze Bayrn vnd Grefinne ze Tyrol an dem andern taile alle irer lande furstentum vnd
herrschefte die si nv habent oder hernach gewinnent baidenthalben einander gemachet gestifft geordent vnd geschaffet habent in solicher gescheffte als das wol beweisent ir offene versigelten briefe die si yetweder tail daruber ainander gegeben
habent die von worte ze worte lautent als hienach geschriben stet Wir karel von gotes gnaden Romischer keyser ze allen zeiten merer des Reiches wir Wenczla ouch von gotes gnaden künig ze Beheim vnd marggraf ze Brandenburg
des yetzgenanten vnsers lieben herren vnd vatters keyser karlems sun vnd wir Johans von desselben gots gnaden margraf ze merhern desselben vnsers herren des keysers brüder an ainem taile vnd wir Rvdolf Albrecht vnd leupolt
gebrüder von gots gnaden Herczogen ze Osterreich ze Steyr vnd ze kernden herren ze chrayn auf der windischen marcke vnd ze portenaw Grafen ze habspurg ze tyrol ze pfirt vnd ze kyburg landgrafen in elsaze vnd marg
grafen ze Burgowe vnd wir margret von Osterreich der ietzgenanten Herczogen swester weilent marggrafinne ze Brandenburg Herczoginne ze Bayrn vnd Grefinne ze tyrol an dem andern taile verjehen bekennen vnd tvn kvnt
von paiden tailen offenlich mit disem briefe allen den die in sehen horen oder lesen nv vnd hernach ewiclich synd dem male daz nach ordenung vnd gescheffte des almechtigen gotes in baidenthalben durch einander von nature vnd der
geburt wegen des geslechtes sippelich zu einander gehoren in solicher maze sweder tail vnder vns gar abgieng vnd versüre an eliche leiberben daz derselbe tail den andern aller seiner lande furstentum vnd herrschefte die er also hinder
im lieze pilleich von von reht ginnen sol fur alle ander leute daz darvmbe wir in dem namen als da vor auf baiden tailen nach gvter betrachtung mit rehter wizzen nach rate willen vnd gunste aller vnser fursten lanchherren
Ritter vnd knechten purgern vnd lantsäzzen in allen vnser landen vnd steten die notdurftig darzu waren mit aller der ordenunge beschaidenhait vnd chraft worten werchen vnd gelerden die nach gaistlichen vnd weltlichen rehten
oder gewonheiten vnd nach chaiserlih lantrehten oder freyhaiten darzu gehorent ainander getan haben reht vnd redlich solich gemechtenvze ordenung vnd gabe als hienach beschaiden ist das ist zemerken ob das geschehe da vor got
sei das wir die vorgenanten keyser karel von Rome künig Wenczla von Beheim vnd marggraf Johans von merhern vnd vnser aller elichew kinde sune vnd tochter die wir nv haben oder hernach gewinnen abgiengen
vnd versüren ane eliche leiberben die ouch ob dieselben vnsew kinde leiberben gewinnent die auch furbazer ane leiberben versüren vnd vnsew lande also rehter leiberben die von vns vnsern kinden vnd kindes kinden komen
mochten erblos wurden daz danne alle vnsew erbleichew furstentum lande vnd herrschefte vesten vnd stete leute vnd gvter die wir nv haben oder hernach gewinnen erben vnd gevallen sullen mit vollem vnd ganczem rehte
auf die vorgenanten Herczogen von Osterreich die egenanten margreten ir swester vnd auf ir aller leiberben sune vnd tochter die in got noch geben mag vnd auf derselben kinde vnd kindes kinde nach dem rehten stamen ewiclich
die von inen beyden chomen mugen an alle geuerde vnd ze gleicher weise hinwider sprechen vnd wellen wir die vorgenanten Herczogen von Osterreich vnd wir die egenante margret ir swester ob das geschehe das got durch
sein genad wende daz wir vnd der durchleuchtig furste her ludweig künig ze vngern vnser lieber brüder vnd die hochgeborn frowe kunigvnde elizabet sein mvter vnd die hochgeborn elizabet weilent Herczog stephans von vngern
seines pruder tochter vnser liebe swester abgiengen vnd versüren ane eliche leiberben vnd ouch ob wir auf denselben vnsern taile leiberben gewunnen die furbazer ane eliche leiberben versüren vnd vnsew lande also rehter leiberben
die von vns vnser kinden vnd kindes kinden komen mochten erblos wurden daz danne alle vnsew erbleichew furstentum lande vnd herrschefte vesten vnd stete leut vnd gvter die wir die vorgenanten Herczogen von Osterreich
vnd margret vnser swester nv haben oder hernach gewinnen erben vnd gevallen sullen mit vollem vnd ganczem rehte auf die vorgenanten keyser karlem von Rome künig Wenczla von Beheim vnd marggrafen Johansen von
merhern vnd auf ir aller leiberben sune vnd tochter vnd auf derselben kinde vnd kindes kinde nach dem rehten stamen ewiclich die von inen baiden komen mugen an alle geuerde doch mit solhem vnderschaide daz auf baiden
tailen igleiche vnser lande vnd leute sunderlich wem halt die gevallent beliben sullen ewiclich bei allen den rehten freyhaiten gnaden vnd guten gewonhaiten die si von alter gehebt vnd herbracht habent an alle geuerde wir
haben ouch in dem namen als da vor auf baiden tailen vngetailich fur vnsselber vnd fur alle vnser erben vnd erbes erben als vorgeschriben ist ewiclich gesworn leipleiche ayde zu den hailigen mit angerürten handen auf das
hailig ewangelio vnd auch gelobt mit vnser trawen vnd mit den worten diser furstlichen wirdichait daz wir auf swedem taile vnder dise vorgeschribene vnser gemechtenvze ordenunge vnd gabe mit vnsselber noch mit andern
leuten weder mit gerichte noch an gerichte noch mit dhainen andern sachen des rehten oder der getat haimleich noch offenlich nymmer getvn sullen noch wellen vnd auch niemant gestatten der da wider tvn wolte an alle geuerde
vnd verzeihen vns ouch darvmbe baidenthalben in dem namen als da vor selher aufzuge vnd funde damite wir in dem namen als da vor auf swedem taile hernach komen vnd sprechen mochten daz wir diser gemechtenvze
vnd gabe betwungen weren oder daz sweder tail den andern vnredlich vnd vnpilleich darvnder praft hiet oder daz si nicht reht vnd redleichen geschehen were vnd widersagen auch darvmbe hilffe vnd rate aller gaistlicher
vnd weltlicher rehter rehten vnd gerihten sunderleichen dem rehten damite man verspreten vnd entwirten leuten ze hilffe kvmt vnd wider in ir gewer sätzet vnd dem rehten das da spricht gemain verzeihunge deruase nicht
es ge denne ein gesunderte vor vnd allen andern gaistlichen vnd weltlichen geschriben vnd vngeschriben gestifften vnd vngestifften funden vnd vnfundten rehten freyhaiten lanterehten vnd gewonhaiten vnd allen chaiserlichen vnd
briefen die wir nv haben oder hernach gewinnen mochten damite wir auf paiden tailen oder yeman von vnser wegen wider dise vorgeschriben vnser ordenunge gemechtenvze vnd gabe alliclich oder bei tailen ymm(er) getvn mochten in
dhainen wegen an alle geuerde vnd were da vor got sei daz wir auf swedem taile vnsselle vergezzen vnd yeman da wider icht geteten oder des wir nicht getrawen ob vnser sweder tail vormals dhaine briefe gegeben hiete
oder hienach dhaine ander briefe gebe die wider disew vorgeschriben vnser ordenunge gemechtenvze vnd gabe in dhainem weg weren die sullen ring vppige tode vnd absein vnd dhain chraft haben noch gewinnen wand wir
si in solher gescheffte mit disem briefe wigentlich abnemen vernichten toten vnd widerrüffen genczlich vnd ze allaine diser brief vnd des gelauben vor vnd nach allen andern briefen die dise sache berurent in seiner chraft genczlich
vnd ewiclich beliben an alle geuerd vnd arge liste wir der vorgenant keyser karel von Rome haben ouch als ein Romischer keyser wigentlich mit kayserleicher mahte volkomenheit dise vorgeschriben ordenunge gabe vnd
gemechtenvze durch frides vnd gemaines gutes willen nach rate der fursten des hailigen reiches gaistlicher vnd weltlicher die da ze male bei vns waren paiden tailen behanget gegunnen bewert gevestent vnd bestetet
reht vnd redlich verhengen gunnen beweren vestenen vnd besteten si ouch fur vns vnd vnser nachkomen an dem hailigen reiche ewiclichen mit disem briefe in alle der maze als vor beschaiden ist an alle geuerde
vnd ob das were daz dhaine kayserliche reht oder gesetze die nv funden vnd geschriben sind oder hernach funden vnd geschriben werdent wider dise vorgeschriben vnser gemechtenvze ordenunge vnd gabe in dhainen
weg alliclich oder bei tailen weren de nemen wir ab vnd widerrüffen toten vnd vernichten si in disen sachen mit vnser kayserlichen gewalte genczlich vnd ewiclich wand wir wellen vnd mainen in dem namen
als davor daz dise gemechtenvze ordenunge vnd gabe auf baiden tailen ewiclich in ganczer vnd vester stetichait vnzerbrochen belibe vnd gehalten werde in alle der maze als vor beschaiden ist an alle geuerde dar
umbe von baiden den vorgenanten tailen gebieten wir vesticleich bei vnser hulden allen vnser gaistlichen vnd weltlichen fursten prelaten grafen freyen dyenstherren lanchherren Rittern vnd knechten purgn vnd lant
säzzen auf dem lande vnd in den steten vnd allen vnsern vndertanen yemanleich in welichem wesen vnd wie si genant sind daz si die vorgenanten ordenunge gemechtenvze vnd gabe auf soliche geschefft als vorge
schriben stet loben vnd sweren vnd daz si die stete haben vnd ze volfuren genczlich wenne es ze schulden kvmt an alle hindernvss vnd geuerde vnd ouch daruber geben ir offene versigelten briefe vnd daruber zu
einem waren vestenen offenem vrkvnd vnd merkvnde aller der vorgeschriben ordenung vnd sachen haben wir die vorgenanten keyser karel von Rome künig Wenczla von Beheim vnd marggraf Johans von merhern
fur vns vnd fur alle vnser erben vnd erbes erben ewiclich als vorgeschriben ist an ainem taile vnd wir die egenanten Rvdolf Albrecht vnd leupolt gebrüder Herczogen ze Osterreich vnd wir die egenante
margret ir swester fur vns vnd fur alle vnser erben vnd erbes erben ewiclich als vorgeschriben stet an dem andern taile vnsew Ingesigel gehenket an disen briefe disz ist geschehen vnd ist diser brief gegeben ze Brvnne nach
Christes geburde dreuczehen hundert Jar darnach in dem vier vnd sechczigisten Jare an der hailigen Jvnchfrawen sand scolastice tag vnser keyser karlems reiche in dem ahczehenden vnd des kaysertüms in dem Newnten Jare
vnd wand dieselbe ordenung vnd gabe vnd gemechtenvze mit vnser der vorgenanten purger daz windisch grecz rate willen vnd gunste geschehen sin darvmbe haben wir dieselben purger vnser igleicher sunderlich vnd wir alle
gemainleiche fur vns vnd fur alle vnser nachkomen vnd erben ewiclich mit rehter wizzende gelobt vnd verhangen mit vnsern trawen vnd mit vnsern geswornen leipleichen ayden die wir daruber getan haben zu den hailigen
daz wir die vorgeschriben gemechtenvze gabe vnd ordenunge swenne die gevallent vnd ze schulden koment als vor beschaiden ist aufnemen haben stete haben vnd volfuren sullen vnd wellen getrewlich vnd genczlich an alle
widerrede vnd geuerd ane vrkvnde disz briefes versigelt mit der obgenanten stat daz windisch grecz grozzen anhangendem Insigel das ist geschehen vnd ist diser brief gegeben daselbe ze windisch grecz an ayentag nach
dem sunntage in der vasten do man sang Jvdica nach Christes geburde tausent dreuhundert sechczig Jaren vnd darnach in dem vierden Jare