Wir Gerlach von gots gnaden des heiligen stuls zu Mencze erczebischoff des heiligen Romischen Richs in dutschen landen erczcanczeler Bekennen vnd tun kunt offenlich mit disem bryue allen den die yn sehent oder horent lesin/ wun der Allir=
durchluchtigeste furste vnser gnediger herre her Karl Romischer keisir zu allen cziten merer des Richs vnd kunig zu Beheim/ In den namen des rechten als ein kunig zu Beheim/ der Allirdurchluchtige furste her Wenczel kunig
zu Beheim sin sun/ vnd der hochgeborn furste her Johans marggraue zu Merhern sin brudir vnsir lieb oheym/ an eime teyle Vnd die hochgeborn fursten her Albrecht vnd her Lupolt herczogen zu Osterrich zu Styr vnd zu kernten ꝛc(etera)
vnsir liebn oheymen/ an dem andern eime vormachunge/ ordenunge vnd eynunge allir irer kunigrich/ furstentum/ marggraffschafte/ herschafte/ burge/ stete/ lute/ vnd land die sie yeczunt habin/ oder mit hilfe gots in kunftigen
czyten noch gewunnen/ wie man die benemen mag/ mit sunderlichen worten/ willeclich/ bedachteclich vnd fruntlich vndiremandir gemacht/ beseczt/ vnd verbryuet habin vnd ouch dieselbe vormachunge/ ordenunge vnd eynunge der
egen(ant) vnser herre keisir Karl als ein Romischer keisir durch ir allir flizzige bete vnd durch des rechten willen/ bestetiget vnd confirmiret vnd darubir syn offene bryue/ mit sinem anhangenden keiserlichin Ingesigel gebin hat/ von wor
te zu worte als hernach geschribin steet Wir Karl von gots gnaden Romischer keisir zu allen cziten merer des Richs vnd kunig zu Beheim/ Bekennen vnd tun kunt offenlich mit disem bryue allen den die yn sehent
oder horent lesin/ wann wir als ein kunig zu Beheim/ der durchluchtige Wenczel kunig zu Beheim/ marggraue zu Brandemb(ur)g vnd zu Lusicz vnsir lieb sun/ vnd der hochgeborn Johans marggraue zu merhern vnsir lieb brud(er)
der churen vnd des kunigrichs zu Beheim furste/ an eime teile vnd die hochgebornen Albrecht vnd Leupolt herczogen zu Osterrich zu Styr zu kernten vnd zu krayn/ herren off der windischen marke/ zu portenowe/ grauen
zu habspurg/ zu pfyrt/ vnd zu kyburg/ marggrauen zu Burgow vnd lantgrauen in elsass/ an dem andern teyle mit wolbedachtem mute/ mit rechter wizzen/ vnd mit rate der vnsir/ solich gemachunge/ ordenunge
vnd voreynunge getan habin/ recht vnd redeliche als hernach geschribin steet/ Nymmen als daz gesche/ da got fur sy/ daz wir der egen(ant) keis(er) Karl Wenczel kunig zu Beheim/ vnsir liebir sun/ vnd Johans marggraue zu merh(er)n
vnsir liebir brudir/ vnd vnsir allir eliche kynder/ sunne vnd tochtir/ die wir nu habin/ oder hernach gewunnen/ abegiengen vnd sturben ane eliche libes erbin vnd ouch ab dieselbin vnsir kind/ libes erbin gewunnen/ vnd
die ouch anelass/ ane eliche libes erbin sturben/ also daz vnsir land/ kunigrich/ furstentum/ vnd herschafte/ rehtir libes erbin/ vnd erbes erbin/ die von vns/ vnd iren liben elichen quemen/ erlidigt wurden/ daz den alle die vorgen(ant)
vnsir land/ kunigrich/ furstentum/ vnd herschafte die wir nu habin/ oder hernach gewunnen/ mit allen iren gerichten/ rechten/ nutzen/ wirden/ eren/ fryheiten/ vnd allen guten gewonheiten die darzu gehoren/ wie die genant sin
an allig hindernisse/ erben vnd gevallen sullen/ in ir volkomenem ganczem rechte/ off die vorgen(ant) herczogen zu Osterrich/ vnd off ir liben libes erbin/ sunne vnd tochtir/ ab sie die mit hilfe gots gewunnen/ vnd
off derselbin eliche erbes erbin eweclich/ beschehe iz abir/ da got fur sy/ daz die vorgen(ant) herczogen zu Osterrich/ zu Styr vnd zu kernten ꝛc(etera) vnsir liebn oheymen/ abegiengen vnd sturben/ an eliche libes erbin/ vnd ouch ab
sie libes erbin gewunnen/ die furbas ouch an eliche libes erbin sturben/ vnd ir land/ furstentum/ marggraffschafte/ vnd herschafte/ also rechtir elichir libes erbin/ vnd erbes erbin/ erlidigt wurden/ daz denn/ alle die vorgen(ant) vnd and(er)
ire erblich land/ herczogtum/ furstentum/ marggraffschafte/ graffschafte/ vesten/ stete/ lute/ vnd gutir die sie nu habin oder hernach gewunnen/ mit allen iren gerechten/ rechten/ nutzen/ wirden/ eren/ friheiten/ vnd guten gewonheiten
die darzu gehorent/ wie die genant sin/ ane allig hindernisse erben vnd gevallen sullen/ mit ganczem vnd volkomenem rechte/ off vns als einen kunig zu Beheim/ Wenczelen kunig zu Beheim/ vnsir liebn sun/ sine geswynde
Johansen marggrauen zu merhern/ vnsir liebn brudir/ sine kind/ vnd off vnsir/ vnd ir allir eliche libes erbin/ sunne vnd tochtir/ vnd off vnsir vnd derselbin eliche erbes erbin/ eweclich/ die von vns/ vnd iren liben elichin
komen/ magen ane alle geuerde/ des ist von vns als fur einen Romischen keisir/ sinen herren/ willeclich komen/ der durchluchtige Wenczel kunig zu Beheim/ vnsir lieb sun/ fur sich/ sine geswynde/ erbin/ vnd nachkome(n)
kunige zu Beheim/ mit sampt dem egen(ant) Johanse marggrauen zu merhern/ vnsir liebn brudir/ der churen vnd des kunigrichs zu Beheim furste an eyme teyle vnd habin vns gebeten/ daz wir den egen(ant) herczogen zu
Osterrich/ zu Styr vnd zu kernten ꝛc(etera) vnsir liebn oheymen/ geruchten zu virlihene/ allig daz die chure vnd daz kunigrich zu Beheim von dem heiligen Romischen Riche zu lehen hat/ Jz sy furstentum/ herschafte/ land/ od(er)
lute/ vnd ouch sint fur vns komen die hochgebornen Albrecht vnd Lupolt herczogen zu Osterrich/ zu Styr vnd zu kernten ꝛc(etera) vnsir liebn oheymen/ fur sich/ ir erbin/ vnd nachkomen/ vnd ir furstentum/ herczogentum/
graffschafte/ herschafte/ vnd land/ an dem andern teyle/ vnd habin vns ouch gebeten/ daz wir den egen(ant) kunigen Wenczelen zu Beheim/ vnsirn sune/ Johansen marggrauen zu merhern/ vnsirn brudir/ geruchten zu virlihen die
herczogentum zu Osterrich/ zu Styr vnd zu kernten/ zu krayn/ vnd zu habsp(ur)g/ die graffschafte/ vnd allig daz sie von dem egen(ant) Romischen Riche zu lehen habin/ Jz sy furstentum/ marggraffschafte/ herschafte/ land/ od(er) lute/ vnd
darone vmb soliche redeliche bete/ als die vorgen(ant) kunig Wenczel zu Beheim/ vnsir liebir sun/ Johans marggraue zu merhern/ vnsir lieb brudir/ an eime teyle/ vnd die hochgebornen Albrecht vnd Lupolt herczogen zu Oster=
rich/ zu Styr vnd zu kernten ꝛc(etera) vnsir liebn ohemme/ vnd fursten/ an dem andern teyle/ vns/ als gliche gemeyne/ voreinte/ vnd vngesundirte stende/ gemeyner anenelle/ nach lute der egen(ant) vormachunge/ ordenunge
vnd voreynunge der lande/ demuteclich gebeten/ vnd an vns durch recht geuordirt habin/ vnd ouch vmb daz sulche vormachunge/ ordenunge/ vnd voreynunge der lande/ tuschen den egen(ant) fursten/ leiden/ syten/ eyn ebigit
sune/ vnd fruntschaft bringet/ zu eren/ zu dienste/ vnd zu sundern dem heiligen Romischen Riche/ zu gemeynem nutze/ vnd ouch zu troste/ zu fryde/ vnd zu gnaden der gemeynen cristenheit/ So habin wir fur vns
Romische keisir/ vnd kunige/ vnsir nachkomen/ mit wortir/ gunt/ wizzen/ vnd willen der kurfursten des heiligen Richs/ mit wolbedachtem mute/ mit rechter wizzen/ vnd mit vollenkomenher keiserlichir macht/ dem
egen(ant) kunig Wenczelen/ vnsirn liebir sune/ sinen geswynden/ erbin/ vnd nachkomen kunigen zu Beheim/ Johansen marggrauen zu merhern/ vnsirn brudir/ sinen kynden/ erbin/ vnd nachkomen/ marggrauen zu merhern/
an eyme teile/ vnd Albrechte vnd Lupolten herczogen zu Osterrich/ zu Styr vnd zu kernten ꝛc(etera) vnsirn liebn ohemmen/ iren erbin/ vnd nachkomen/ an dem andern teil/ miteinandir/ semptlich/ vnd eweclich/ virlihen/ vnd
virlihen alle der andern furstentum/ herczogentum/ marggraffschafte/ graffschafte/ herschafte/ land/ vnd lute/ als glichin gemeynen voreinten/ vnd vngesundirten stenden/ gemeyner anenelle/ nach lute der egen(ant) vormach=
unge/ ordenunge/ vnd voreynunge der lande/ In allir der maze/ als die egen(ant) vormachunge/ ordenunge/ vnd voreynunge der lande/ dauon begriffen/ vnd beschribin ist/ vnd bestetigen/ ouch confirmirn/ vnd beseczen
wir fur vns/ Romische keisir/ vnd kunige/ vnsir nachkomen/ mit worte/ gunst/ wizzen/ vnd willen der kurfursten des heiligen Richs/ als ein Romischir keisir eweclich/ die vorgen(ant) vormachunge/ ordenunge/ vnd
voreinuge der lande/ in allin iren meynunge/ sinnen/ puncten/ vnd artickeln/ von worte zu worte/ als dauon geschribin steet/ zur vrkunt/ diz breues/ vorsigelt/ mit vnsirn keiserlichin Ingesigel/ der gebin ist zu
Cznoym/ nach crists geburte/ druczenhundirt Jare/ darnach in dem sehs vnd sehzczigistem Jare/ an dem nehsten fytage nach dem heiligen ostirn tage/ vnsir Riche/ in dem eynenczwigistem/ vnd des keisirtums
in dem czwelften Jare/ Dauon wann wir wol/ vnd vornumftelich vorsten/ daz die egen(ant) vormachunge/ ordenunge/ vnd eynuge/ mit wizzen/ willen/ vnd worte/ allir kurfursten/ vnd andir fursten/ eruen
vnd herren/ des heiligen Richs/ recht/ vnd redelich geschehin/ vnd wann wir wol vornemen/ daz dieselbe vormachunge/ ordenunge/ vnd eynuge/ dem heiligen Romischen Riche/ der heiligen cristenheit/ vnd gemeinem fryde
bequemlich/ vnd nutze sin/ gote zulobe/ vnd zu eren/ zu troste/ vnd zu gnaden/ allir cristen lute/ So habin wir mit wolbedachtem mute/ mit guten willen/ vnd mit rechter wizzen/ zu den egen(ant) vormachungen/ orde=
nuge/ vnd eynuge/ vnd daz darzu gehoret/ oder dauone ruret/ vnsir gunst/ willen/ vnd worte/ genczlich gebin/ als ein erczebischoff zu mencz/ erczcanczeler/ vnd ein kurfurste des heiligen Richs/ vnd meyne
vnd wille/ daz die egen(ant) vormachunge/ ordenunge/ vnd eynuge/ nach lute der vorgeschribin bryue/ vnsirs herren des keisirs/ in allin iren meynungen/ sinnen/ puncten/ vnd artickeln/ von worte zu worte
als sie dauon begriffen sint/ in steten/ vesten/ vnuerrucket/ vnd vngehindirt eweclichin blibin/ zur vrkunt/ diz bryues/ vorsigelt/ mit vnsirn anhangendem Ingesigel/ der gebin ist zu Eltuil/ off den
dornstag/ vor sanct Albans tage/ Nach crists geburte/ druczenhundirt Jare/ darnach in dem sehs vnd sehzczigistem Jare