Wir Karl von gots gnaden Romischer keiser zu allen zeiten merer des Reichs vnd kunig zu Behem Bekennen vnd tun kunt offenlich mit disem briefe allen den die jn sehen
oder horen lesen das komen ist in vnser keiserliche gegenwirtekeit der Erwirdige Burkhart probst zu Wissegrad vnd canzler des kunigreichs zu Behem procurator vormund
vnd schaffer des durchluchtigen Wenzlawen kuniges zu Behem marggrauen zu Brandemburg vnd zu lusiz vnsers libn sunes seines herren mit einem procuratorien vnd
gewaltbriefe der mit des egen(anten) vnsers liebn sunes grozem jngesigel versigelt was vnd hat vns in craften desselbn gewaltbriefes der jn vnser gegenwirtekeit genglich vnd
ordenlich gelesen wart von wegen des egenan(ten) vnsers sunes des kunigreichs vnd der crone zu Behem vleizziclich gebeten daz wir als ein Romischer keiser durch
sunderlich gnad jm von wegen des egen(anten) vnsers sunes seines herren des kunigreichs vnd der crone zu Behem gunnen wolden daz er die gut vnd p(fan)d vil teiles als
seliger gedechtnisse vnser vorfarn an dem Reiche vnd an Reiche in den nachgeschribn dorffern Heyetingsfelt vnd asoynbernheim die in dem bistum zu Wirczburg
gelegen sind gehabt habn vnd die an den Erwirdigen albrecht Bischof zu Wirczburg in pfants weise komen sein mit gerichten leuten guten gulden geuellen vnd
allen zugehorungen von dem egen(anten) Bischof zu Wirczburg vnd dem stifte zu Wirczburg ledigen vnd losen mochte vmb solich sume gelts als die egen(anten) dorffer vnd
jr zugehorungen demselbn Bischof vnd dem stifte zu Wirczburg von dem heiligen Reiche verpfendet sein des habn wir durch sunderlich liebe willen des egen(anten)
vnsers libn sunes die vnsern keiserlichen gnaden der egen(ante) sein procurator vormund vnd schaffer in disen sachen furgetragen hat dar bestellet daz man alle pfant
briefe vber die egen(anten) dorffer die vber dieselbn pfantschaft von dem Reiche gegebn sint bracht hat in vnser keiserliche gegenwirtekeit vnd die hat man fur vns
vnd vnserm Rate genglich vnd ordenlich gelesen vnd in denselbn briefen habn wir daz erfundn daz die egen(ante) pfantschaft an den stifte zu Wirczburg in solch(er)
maze komen ist als hernach geschribn stet jn dem ersten daz dorff asoynbernheim von dem edlen Leupolte kuchemeister von Nortemberg dem es kunig Rudolfe
seliger vmb hundert vnd vier vnd dreizzig pfunt haller verpfendet hatte vnd der es furbas dem Bischofe vnd dem stifte versazt hat Jtem von kunig albrecht
der in seinem briefe p(fan)d vil vnd er hatte in dem dorffe zu heyetingsuelt dem Bischofe vnd dem stifte zu Wirczburg vmb zwey tusent pfunt haller verpfendet
hatte Jtem von hern ludwige von Beyern der sich keiser nante der in einem seinem briefe die vogtey zu asoynbernheim dem egen(anten) Leupolte kuchemeister von Nortemberg
vmb zwei hundert pfunt haller verpfendet hatte der sie ouch furbas dem Bischofe vnd dem stifte zu Wirczburg versazt hat Jtem von demselbn h(er)n ludweige der in
einem andern briefe dem egen(anten) Bischofe vnd seinem stifte zu Wirczburg vff alles das daz Reiche in den egen(anten) dorffern heyetingsuelt vnd asoynbernheim hatten
vier tausent pfunt haller geslagen hatte die sumen allesampt machen mit einander in einer hauptsumen Sechs tusent drey hundert vnd vier vnd dreizzig pfunt
haller vnd dauon mit wolbedachtem mute mit Rate der fursten Grauen vnd edlen des heiligen Reichs vnsre getriwen so haben wir gegunnet vnd gunnen ouch dem
egen(anten) probste zu Wissegrad als einemp(ro)curator vormunden vnd schaffere des egen(anten) vnsers liebn sunes kuniges zu Behem seines herren des kunigreichs vnd der crone
zu Behem die obgen(anten) dorffer heyetingsuelt vnd asoynbernheim die in dem Bistum zu Wirczburg gelegen sind mit gerichten leuten guten gulden geuelln rechten vnd
allen zugehorungen von dem egen(anten) Bischofe zu Wirczburg vnd dem stift zu Wirczburg vmb die vorigen sume gelts Sechs tusent dry hundert vnd vier vnd dreizzig
pfunt haller ledigen vnd losen moge vnd dieselbn dorffer mit irn zugehorungen in aller der maze als dauor begriffen ist hat der egen(ante) probst zu Wissegrad als eyn
procurator vormund vnd schaffer des egen(anten) kunige Wenzlawen zu Behem vnsers liebn sunes seines herren vmb die egen(ante) sume gelts rechtlich vnd redlich von dem egen(anten)
Bischofe vnd dem stifte zu Wirczburg geledigt vnd geloset vnd hat die egen(ante) sume gelts Sechs tusent drey hundert vnd vier vnd dreizzig pfunt haller demselbn Bischofe
dem stifte zu Wirczburg vnd irn pflegern in vnsers Rates gegenwirtekeit gar vnd genglich verrichtet vnd bezalet darumb bestetigen confirmiren vnd vestenen wir
dieselbn pfantschaft der egen(anten) dorffer mit aller ir zugehorungen dem egen(anten) kunig Wenzla zu Behem vnserm liebn sune seinen erben vnd nachkomen kunigen zu Behm
der crone vnd dem kunigreich zu Behem mit volkomenheit keiserlicher machte vnd mit rechter wizzen in allen meynungen sinnen puncten vnd artikeln von worte zu worte
als dauor geschribn stet mit solicher bescheidenheit daz der egen(ante) kunige Wenzlaw zu Behem vnser lieber sune seine erbn vnd nachkomen kunige zu Behem die crone
vnd daz kunigreiche zu Behem dieselbn pfantschaft mit alln rechten vnd zugehorungen innehabn besizen nuzen vnd niezen sulln vnd mogen an alles hindernizze
vnz an die zeit daz wir der vnser nachkomen Romische keiser oder kunige dieselbn pfantschaft von jn vmb die egen(ante) sume gelts kintlich ledigen vnd losen Mit vrkunt
dizs briefs versigelt mit vnser keiserlichen maiestat jngesigel Gebn zu Wirczburg nach crists geburt drewzehnhundert Jar darnach in dem Sechs vnd Sechczigsten Jare
des nesten freytags vor sand michels tage vnser Reiche in dem eyn vnd zweinzigsten vnd des keisertums in dem zwelften Jare