Wir fider balcz vnd willy von gots gnaden langrauen zu durnngen Margrauen zu meyssen an dem osterlande vnd zu landsperg thun zu orkunde vnd gien der landes bescheyden
bekenne das wir kunt offentlich mit disem briue allen den die yn sehen horen oder lesen daz fur vns komen ist der edele er Thime von koldicz der allerdurchluchtigst vnsers h(er)n des keysers
camermeyster vns(er) liebir getwir vnd hat vns mit flize gebeten daz wir ym etliche gvte lehen vnd mantschafte die er von dem edeln ern heynrich purgrauen zu leyssnig vnd sinen erbin
vns(er)n liebin getriwn gekouft hat vnd die von vns zulehn rurent als rechte lehnher gnediglichen geruchen zuleyhen in alle dem rechte als sie der eg(nan)te von leyssnig vnd sine eltern erbin gehat
habin vnd besessen vnd ouch den brief ym vnd sinen erbin zubesigeln den derselbe von leyssnig vns(er)n vnd sine erbin in darub gegebin hat der von worte zu worte lutet als hye noch stet
geschribin Wir heinr(ich) purgraue zu leyssnig bekenne an disem offene briue vnd tunt wissentlich allen den die disen brief sehen oder horn lesen daz ich minem liebin oheym ern thime von koldicz
vnd sinen erbin recht vnd redelich vorkouft habin mit volbort miner vnd min(er) getriwn liebin brud(er) albrecht vnd othin purgrauen zu leyssnig vnd brud(er) albrecht von albrechts vnd(er)
gewiben vns(er) swester die e(n)wacht geschribin sten vmb dreyhund(er)t schok breyter grossen prager munge die sint die dorfstat zu geresicz an mantschaft mit allem rechte als wirs gehat habin die
wyschene zu tammedorf by altinzel als der acker von geresicz hinuf gein alden leyssnig wendet an eyme stete ander gubaw daz gerichte in sydow vnd an alle dem daz darzu gehort
daz gerichte an strocken vnd an alle dem daz darzu gehort daz gerichte an gubaw mit dem gute daz man von vns gehab(e)t hat vnd mit alle dem rechten daz darzu gehort an velde vnd mantschafte
daz dorph zu woldewicz mit mantschaft vnd mit gerichte vnd mit alle rechte als ez von alder gelegen hat daz dorph zu dolen mit mantschaft vnd mit gerichte vnd mit alle rechte als wirs
gehabt habin vnd daz holcz daz da heyset der wayn mit mantschaft vnd mit gerichte daz dorph zu lipenicz mit dem kirchlehn mit mantschaft vnd mit gerichte vnd mit alle dem rechte daz darzu
gehort daz gerichte gancz vbir daz dorph kesselwicz vnd lehn an dem gute daz in dem selbin dorfhe liget an daz gut daz lydeburcz hat vnd sin muter da behalden w(ir) vns(er) lehen an vnd vns(er) oheym
er thime von koldicz sein gerichte vnd sein erbin daz dorph zu nuendorf mit dem gerichte vnd mit allem rechte als wirs gehabt habin vnd daz wuste dorph daz gen(an)t ist zabize mit gerichte
vnd mit alle rechte als wirs gehabt habin daz dorph zu apelde mit dem kirchlehn mit mantschaft mit gerichte vnd mit dem lehnman vnd mit allem rechte als wirs gehat habin daz dorph
zu kalschusen do woldis vns(er) oheym er thime von koldicz vnd sine erbin n(ich)t lehen an vnd hat daz gerichte wir bekenen ouch daz wir dem vorg(nan)ten disem oheym ern thime von koldicz vnd sine
erbin den gupan zu geresicz vnd den gupan zu gubaw ouch vorkouft habin mit dem gvten gvte wir globin ouch die gvten wiben vns(er)n swestern oheym ern thime von koldicz vnd sine
erbin ab ymand dehin ansprache hette an den vorg(nan)ten dorphen vnd an den gute die wir in vorkouft habin daz wir sie des entweren sullen mit lantrechte als wir billich vnd gerechte tun sullen
die vorg(nan)te dorfstat vnd die eg(nan)te gut die wir vns(er)m liebin oheym ern thime von koldicz vnd sinen rechten erbin vorkouft habin vnd die er vns vnd sine erbin durch fruntschaft globit habin wid(er)
zuuorkoufen von sant mertins tag der nu nest kumt vbir eyn jar daz wir vns des vorbindin gein em vnd sine erbin an disem briue daz wirs nymand anders sulln kouffen denne dasselbin vmb zweyhund(er)t
schok silbirs pfenge vmb dreyhund(er)t schok breyt(er) prager grossen di sie ez vmb gvte vns gekouft habin wer abir daz wir ander vns gut vorkouffen musten oder woldin vmb die selbin pfenge mochten
wir vns gut oder vns(er) erbin von vns(er)m oheym ern thime vnd sine erbin widerkouffen oder wer vns die drey hund(er)t schok wurdin daz sie ez vns(er) weren vnd vns(er) erbin wir globin ouch in disem
briue in guten truwn vns(er)m liebin h(er)n ern wulchen byschof zu meyssen vnd vns(er)m vorg(nan)ten oheym ern thime von koldicz vnd sine erbin vnd vns(er)n ern heinr(ich) von koldicz vnd sine erbin thime vnd ern
heinr(ich) mantschafte zu steburcz daz wir alle dese vorgeschribin rede stete vnd gancz holdin haldin ane allirley argelist zu eyme bekentnisse vnd mer sicherheit habin w(ir) vns(er) jnsigel williglich an disen brief
gehangen desir rede sint geczug vns(er) liebin frunt purgraue albrecht von leyssnig der elder h(er)r apitz heinr(ich) von dem buche er symon schriber n(ost)r(us) vnd vil ander biderbe lute desir brief ist gegebin
als man zalt von gots geburt dreyzehnhund(er)t jar darnach in dem dreyzigsten jare an sande gallen tag Nu habin wir durch manigfelde trwe vnd willigheit dinst die vns vnd vns(er)n eldirn swer
gedechtnisse der eg(nan)te er thime vnd sine vordern stet(e) williglich vnd emsslich getan hat vnd emsslich tegliches tut vnd tun sal vnd mag in kunftigen ziten sine redeliche bete gnediglich erhort vnd
habin von sund(er)lichin gnadin mit vns(er)m rat(e) getwin vnd mit rechter wissen im vnd sine erbin vnd nachkomen die obingeschribin gvter lehen vnd mantschafte mit allen irn zogehorungen in alle dem rechte
als sie des eg(nan)ten von leyssnig gehab(e)t vnd besessen habin gelyen vnd gerucht lihen vnd ruchen in die mit disem briue von vns vns(er)n erbin vnd nachkomen in alle dem rechte als vorgeschribin
stet zuhabin vnd gewereclich zubesessen vnd listeten kouften vnd eysennin wir in vnd sinen eg(nan)ten erbin denselbin obingeschribin brief vnd alles daz da ynne geschribin stet in allen sinen puncten
artickeln vnd worten als er von worte zu worte begriffen ist vmb gunst vnd volbort wir in vnd sinen erbin zu besund(er)n gnadin daz sie die selbin mantschafte gvte vnd ir zubehor besund(er)n die gesin
dem libe oder in krancheit wie in daz ept gefuget vorkouffen vorgebin vorwechseln vorschaften vnd in sine oder siner erbin vnd frunt nucz wendin er dez gen koren vnd wanden sulde vnd mag
wie in daz aller fuglichst ist von vns vns(er)n erbin vnd nachkomen vngehind(er)t also doch daz vns vns(er)n erbin vnd nachkomen sulche gewerunge vnuerruckt oder gescheftunge an vns(er)n lehn vnd
herrschaften keyne schade bringen sullin angeteylt vnd welchin er oder sine erbin die selbin gvter schaften gebin oder virmachin wird in welchir wis daz gesche die mit disem genwertigen briue
vnd daz ermanen dem sulln vnd wellin w(ir) die eg(nan)ten gvter lehen vnd mantschafte alle oder ir etlichs besund(er)n lihen als lengutes recht ist vnd gewonheit ane widerred(e) mit vrkunde ditz
briues den wir vns(er) jnsigel habin la~ss~in anhangen vnd gegebin ist zu prag nach gots geburt dreyzehnhund(er)t jar darnach in dem sybin vnd sechtzigsten jare am donrstag nach dem suntag als man
singet Reminiscere in der vasten