Wir Karl von gotes gnaden Romischer keiser zu allen czeiten merer des Reichs vnd kunig zu Behem Bekennen vnd tun kunt offenlich mit disem brie
ue allen den die yn sehen oder horen lesen Daz fur vnser keiserliche gegenwortikeit komen sint der durchleuchtige Wenczlaw kunig zu Behem Marggrafe zu
Brandemburg vnd zu lusicz vnser lieber Sun an eynem teile Vnd die Edeln Bernhart von Schonemburg herre zu Hassenstein vnd herman von Schone
burg herre zu krimigow gebruder vnser lieben getrewen an dem and(er)n Vnd haben vns beiderseit furgeleget Wie sy die egenanten gebruder dem vorgescre
ben kunige Wenczlaw vns(er)m Sune seinen erben vnd nachkomen kunigen zu Behem vnd der croney desselben kunigreichs ir Burg vnd Stat Schalburg
mit dorffern eckern welden renten nuczen manscheften Bergwerken vnd all(er) and(er)n iren zugehorungen wie man die benennen mag mit sunderlich(er)n worten
besucht vnd vnbesucht nichtes vzgenomen als sie die von vns vnd dem heiligen Reiche zulehen gehabt haben vmb Sechstusent Schok grozzer pfenninge
prager muncze recht vnd redelich verkouft haben Vnd haben vns dieselben von Schonemburg die egenan(ten) lehen vfgetragen vnd vfgegeben als eyme
Romischen keiser Vnd haben vns mit fleize gebeten daz wir dem egenan(ten) Wenczlaw kunige zu Behem seinen Erben vnd Nachkomen kunigen zu Behem
die obgenan(ten) Burg vnd Stat Schalburg mit allen iren rechten eren vnd wirden geruchten zu leihen zu rechtem manlehen in aller der maze als sie
die von Schonemburg von vns vnd dem heiligen Reiche zulehen gehabt haben Des haben wir angesehen des vorgenan(ten) kunig Wenczlaws vnsers lieb(e)n
Sunes vnd ouch der egenan(ten) von Schonemburg redeliche bete Vnd haben mit wolbedachtem mute mit rechter wizzen mit rate vnser vnd des Reichs
fursten vnd herren Vnd mit keiserlicher mechte volkomenheit die vorgenan(ten) lehen Schalburg Burg vnd Stat von den vorgenan(ten) von Schonemburg
vfgenomen Vnd haben die mit allen iren zugehorungen eren vnd wirden dem obgenan(ten) kunig Wenczlaw seinen erben vnd Nachkomen kunigen zu
Behem vorleihen vnd vorleihen yn die mit craft dicz briefs in aller der mazze als sie die von Schonemburg zulehen von vns vnd dem heiligen
Reiche gehabt haben Mit vrkunde dicz briefs versigelt mit vnser keiserlich(e)n maiestat Insigel Der geben ist zu dem Chadan nach Cristus geburte
Dreiczenhundert Jar dornoch in dem siben vnd sechczigstem Jare an der nehsten mitwochen vor dem heiligen pfingst tage vnser Reiche in
dem Eyn vnd Czwenczigsten Vnd des keisertums in dem dreiczenden Jare
ad mandatu(m) d(omi)ni Imp(er)atoris
Decan(us) Glogouien(sis)