Wir Otte von gotes genaden Marggraff zu Brandenburg des heiligen Reiches Erczcamerer pfallenczgraff bei Rein vnd hertzog
in Beyern Bekennen vnd tun kunt offenliche mit diesem briue allen den die yn sehent oder horent lesen Wann wir dem
durchleuchtigisten fursten vnd herren hern Wenczlaw kunige zu Beheim vnsirm lieben swager seinen Erben vnd nachkome(n)
kunigen zu Beheim vnd der Cronen desselbn kunigreiches mit wolbedachtem mute mit Rate vnsirr getruwen vnd mit rechter
wissen die Marke vnd das furstentum zu Lusitz mit allen zugehorungen recht vnd redliche vorkaufft habn als in vnsirn briu
nen die doruber gemachent sint volkomenlich ist begriffen Douon globn wir in guten truwen on geuerde dem egenan(ten)
kung Wenczlaw vnsirm swager vnd zu im dem Allerdurchleuchtigisten fursten vnd herren hern Karln Romischem keiser
zu allen zeiten merer des Reiches vnd kunige zu Beheim als eime kunige zu Beheim vnd der Cronen desselbn kunigreiches
Sey das sache das dheinerley Sloss burge desten oder ander gut vnd manschafft von dheinen andern fursten oder herren
zu lehen rurte das wir denn vnuerzugenlich vnd on alles hindernuze im als kunigen zu Beheim iren Erbn vnd nachkome(n)
kunigen zu Beheim vnd der Cronen desselbn kunigreiches dieselbn lehen in gegenwortikeit der fursten vnd herren von den
sie zulehen ruret vfflazen vffreichen vnd vffgebn wollen lediglich vnd on alles widersprechen vnd die herren mit ernstlichem
flize on geuerde bleten das sie im als kunigen zu Beheim iren Erben vnd nachkomen kunigen zu Beheim vnd der Cronen
desselbn kunigreiches als lehens recht ist on hindernuze vnuerzogenlichen lihen Mit vrkunt ditz brieues vorsigelt mit
vnsirm anhangenden Insigil Der Geben ist zu Gubin nach Cristus geburte dreuczenhundert Jare darnach in dem
Siben vnd Sechtzigisten Jare an dem nehsten Montag vor sante Gallen tag