Wir Peter Jost Vlreich vnd Johans Brüder von Rosenberg vechen vnd tun chunt offenleich mit disem brieff daz wir dem weisen
manne Merklein genant lender purger zu Witingnaw vnsern lieben getrewen vnd seinen erben vnsern Hoff daz Opatouicz genant mit
akkeren geären oder vngeären holzen waiden püschen vnd mit allem dem daz dorzu gehoret als vil vnd als weit als dy gemerch
zaigen oder bedeuten des ersten daz gemerch daz sich do anhebt do man get oder fert von Witingnaw gein Opatouicz wert ab
di ersten pruk hinz der tenken hant pei der wisen di der Spanrafft inne hat hin vnz auf dy akker di zu der stat gehören gen
Witingnaw vnz über den graben auff di wis di do leit hinder dem Spanraffs hoff vnd von der selben wis vnz auff des fidlerz
werd vnd von dann pei dem moz entrichtz vnz auff des swaches aigen oder akker vnd von dem selben aker pei dem grossen wald
vnz zu dem weg der do von Branna dem dorff get hinz Witingnaw vnder dem wald der do haizet Zdiar vnd zwüschen den
wegen dem obrn vnd dem vntern ein halb hub des waldez der do gehaissen ist Zdiar vnd von dem weg pei dem feld der do gen
Branna in daz dorff gehöret vnz auff di wisen di do gen Witingnaw gehören vnd von dann als di gemerk vnd dy rayn zaigen
vnz gen des heindleins aker purgerz von Witingnaw vnd von dann vnz auff di pruk di von erst genent ist vnd ouch di mül in
daz Opatouicz mit dem wayer pei der selbn mül mit dem graben darinne man daz wazz an dy mülen laitet vnd dem gra
ben noh vnz gein dem pach der do haizzet Luznicz vnd di selben wis an der luznicz mag er vnd sein erben auff haben vnd
erheben in der mazz als es pei her Johansen von lanstein probst zu melnik vnsers liebn vetn zeiten gewesen ist zu ner noturft
zu nemen des wazzers von danne in den vorgen graben zu der egenanten mül also daz in vnd sein erben niemat darab
hindn oder irrn sol mit allen den nuczn di dorzu gehoren oder iemind do sind od noch in chünftigen zeiten werden recht vnd
redleich vchauft haben vmb vier vnd sehczik vnd vmb hundert schok grozz prag phennig zu nuczen zu holden zu niessen
oder zu vchaufen also beschaidenleich daz er oder sein erben oder der da obgenant güt hoff mül wald vnd waz dorzu ge
höret als do oben geschriben stet inne hat der sol vns vnd vnsern erben auff sand Jörgen tag ein schok grozz der egnanten
phennig vnd daz ander schok ouch d obgen münsz auff sand Gallen tag alle Jar gebn vnd gelten vnüczgenleich für eine
rechten czins vnd nicht mer von dem selbn güt Nür wann daz wär wann der künig von pehem vnser aller herr eine peren
überal in seim land zu pehem nem so sol er oder sy vns oder vnsern erben von dem offegen güt ein mark oder für dy mark
vier vnd zwainczik grozz prag phennig gebn vnd do mit sol er oder sy dy daz vorgen güt inne habn aller ander czins hülff
stewr vnd robott von dem selbn güt ledig vnd loz sein vnd ob in od sy iemant doran irrn oder hindn wolt mit chain
lay sach daz gelobn wir vorgenanten peter Jost Vlrich vnd Johans Brüder von Rosenberg entwern vnd richtiz machen
an alles geverd mit vrchund dicz priffs dar an wir Insigel vns aller an disen priff gehangen haben zu einem geze
ugnizze diser sach Geben zu Witingnaw do man czalt noh xpus gepurd dreuczehenhundert Jar dornoch in dem sibn
vnd sechczigisten Jare an sand matheus tage des heiligen Ewanglistn