Wir paulus von gots gnaden Abt zu prunck Ludweig von der Waitmule Bekennen mit dem brieff vor allermeniglich die In sehen horen ader lesen werden das zu
ons komen ist der Ersam prister genant Jacobus schaffer des klosters zu Witingnaw vns furtragen hat ainen brieff auff pergamen geschriben mit vier anhangenden Insi
geln mit rotem wachs eingedruckt den wir gesehen haben vnd gehort lesen vnuerseerten ganzen nicht zubrochen ader durchstrichen noch in aynnigerlay weis yndert
verdachten sunder also getanen vnd in dem wesen als Er in der ersten stifft anphangen ist Bittund vns das wir Im daraus ain vidimus salten geben das wir gerne
getan haben vnd denselben brieff lassen abschreiben von worte zu worte als hernach geschriben stet Wir Peter Jost Vlrich vnd Johannes Bruder von Rosenberg veriehen
vnd tuen kundt offenlich mit disem brieff das wir dem Weisen manne axtklen genant bruder purger zu Witingnaw vnserm lieben getrewen vnd seinen Erben vnsern Hoff
daz Opatowig genant mit ackern gräben ader vmgräben wisen walden pusshen vnd mit allem dem das darzu gehoret als weyt vnd als weit als die gemerck gangen
ader bedeuten des Ersten das gemerck das sich do anhebt do man geet ader fert von Witingnaw gen Opatowig wert vber die ersten pruck hinz der lencken hant pei der
wisen die der spenrafft in hat hin vnz auff die acker die zu der stat gehoren gen Witingnaw vnz vber den graben auff die wisen die do leit hinder dem spanrafft
Hoff vnd von derselben wisen vnz auff der fidler werd vnd von dann pei dem mos entrichtig vnz auff des Proatsches aysen ader acker vnd von demselben acker pei dem grosen
Wald vnz zu dem weg der do von Branna dem dorff get hinz Witingnaw vnder dem wald der do haist zdiar vnd zwischen den wegen dem obern vnd dem vntern ein
halb hub des waldes der do gehaisen ist zdiar vnd von dem weeg pei dem feld der do gen Branna in das dorff gehoret vnz auff die wisen die do gen Witingnaw gehoren vnd
von dann als die gemerck vnd die rayn gaigen vnz gen des heindleins acker purgers von Witingnaw vnd von dann gen auff die pruck die von erst genent ist vnd auch
die mulen daz Opatowig mit dem Wayer pei derselben mule mit dem graben darinne man das wasser an die mul laitet vnd den graben nah vnz gen dem partz der do haist
Luzniz vnd dieselben wisen an der luzniz mag Er vnd sein Erben auffhaben vnd erheben in der mass als es pei herren Johansen von lanstein probst zu dzelmb vnsers lieben vettern
czeiten gewesen ist zu irer notdurfft zunemen des wassers von danne in den vorgenant graben zu der egenantn mul also das in vnd sein Erben niemant doran hindern ader irren
sal mit allen den nuzen die darzu gehoren ader yezund do sein ader noch in kunfftigen czeiten werden vercht vnd redlich verkaufft haben vmb vier vnd sechtzig vnd vmb
hundert schock grosz prager pfenning zu nuzen halten vnd zugeniessen ader zuverkauffen also bestandenlich das Er ader sein Erben ader der das abgenant guet hoff mul
wald vnd was darzu gehort als do oben geschriben stet ynnen hat der sal vns vnd vnsern Erben auff sand Jorgen tag an Ostern gross der egenantn pfenning vnd das
ander halbtail auch der abgenantn czinss auff sand Gallen tag alle Iar geben vnd gelten vnuerzogenlich fur ainen rechten Czins vnd nicht mer von demselben gut
Nur wann das wer wann der kunig von pehem vnser aller herr ainen perez vberal in dem lande In pehem nem so sal Er ader sie vns ader vnsern Erben von dem offt
genantn gut ein marck ader fur die marck vier vnd sechtzig gross prager pfenning geben vnd damit sal Er ader sie die das vorgenant gut ynnehaben aller ander tzins
hulff stewr vnd robott von demselben gut ledig vnd los sein vnd ab In ader sie ymant doran irren ader hindern wolt mit kainerlay sach das geloben wir vorgenantn
petr Jost vlrich vnd Johans Bruder von Rosenberg ontweren vnd richtig machen an alles geverd vnd vrkundt ditz brieffs doran wir Infigel vnser aller an disen
brieff gehangen haben zu ainen gezeugnus diser sache Geben zu Witingnaw do man zalt nach cristi gepurt dreutzehenhundert Iar dornach in dem siben vnd sechtzig
Isten Iare an sand matheus tage des heiligen ctwelffpoten Des zu geugnus habn wir vorgenantn paulus abt vnd ludwig von der waitmule vnsere Infigel
zu dism brieff lassen anhengen Geben zu znoim an mantag vor Johannis gots tauffer nach cristi gepurt Tausent vierhundert vnd in dem ain vndneunzigisten Iare