Wir Peter Jost Vlreich vnd Johans bruder von Rosenberg verhen vnd tun chunt offenleich mit disem brieff daz wir dem weisen
manne Merchlin genant lender purger zu Witingnaw vnsern lieben getrewen vnd seinen erben vnsern hoff daz Opatouicz genant mit
akkeren gearen oder vngearen holzen waiden puschen vnd mit allem dem daz dorzu gehoret als vr vnd als weit als dy gemerch
zaigen oder bedeuten des ersten daz gemerch daz sich do anhebt do man get oder fert von Witingnaw gein Opatouicz wert ab
di ersten pruk hinz der tenken hant pei der wisen di der spanrafft inne hat hin vnz ouff dy akker di zu der stat gehoren gen
Witingnaw vnz vber den graben ouff di wis di do leit hinder dem spanraffs hoff vnd von der selben wis vnz ouff des fidlerz
werd vnd von dann pei dem moz entzichz vnz ouff des swaches aigen oder akker vnd von dem selben aker pei dem grossen wald
vnz zu dem weg der do von Branna dem dorff get hinz Witingnaw vnder dem wald der do haizet Zdiar vnd zwisschen den
wegen dem obrn vnd dem vntrn ein halb hub des waldez der do gehaissen ist Zdiar vnd von dem weg pei dem feld der do gen
Branna in daz dorff gehoret vnz ouff di wisen di do gen Witingnaw gehoren vnd von dann als di gemerk vnd dy rayn zaigen
vinz gen des heindleins aker purgerz von Witingnaw vnd von dann vnz ouff di pruk di von erst genent ist vnd ouch di mulen
daz Opatouicz mit dem wayer pei der selbn mul mit dem graben dorinne man daz wazz an dy mulen laitet vnd dem gra
ben noh vnz gein dem pach der do haizzet Luznicz vnd di selben wis an der luznicz mag er vnd sein erben ouff haben vnd
erheben in der mazz als es pei hr Johansen von lanstein probst zu welnik vnsers liebn vetn zeiten gewesen ist zu mer nucz
zu nemen des wazzers von danne in den vorgen graben zu der egenanten mul also daz in vnd sein erben niemat drinn
hindrn oder irren sol mit allen den nuczen di dorzu gehoren oder iemind do sind od noch in chunftigen zeiten werden recht vnd
redleich vchoufft haben vmb vier vnd sehczik vnd vmb hundert schok grozz prag phennig zu nuczen zu holden zu niessen
oder zu vchouffen also beschaidenleich daz er oder sein erben oder der da obgenant gut hoff mul wald vnd waz dorzu ge
horet als do oben geschriben stet inne hat der sol vns vnd vnsrn erben ouff sand Jorgen tag ein schok gross der egnanten
phennig vnd daz andr schok ouch d obgen muncz ouff sand Gallen tag alle Jar gebn vnd gelten vnuezogenleich fur eine
rechten czins vnd nicht mer von dem selbn gut Nur wann daz war wann der kunig von pehem vnsr aller herr eine peren
vberal in seim land zu pehem nem so sol er odr sy vns oder vnsrn erben von dem offegen gut ein mark oder fur dy mark
vier vnd zwainczik gross prag phennig gebn vnd do mit sol er oder sy dy daz vorgen gut inne habn aller andr czins hulff
stewr vnd robott von dem selbn gut ledig vnd loz sein vnd ob in od sy iemant doran irren oder hindrn wolt mit chain
lay sach daz gelobn wir vorgenanten peter Jost Vlrich vnd Johans bruder von Rosenberg entwern vnd richtiz machen
an alles geuerd mit vrchund dicz priffs dor an wir Inssigel vns aller an disen priff gehangen haben zu einem geze
ugnuzze diser sach Geben zu Witingnaw do man czalt noh xpus gepurd dreuczehenhundert Jar dornoch in dem sibn
vnd sechczigisten Jare an sand matheus tage des heiligen Ewanglistn