Wir Wenczlaw von gotes gnaden Romischer kunig zu allen czeiten merer des Reichs vnd kunig zu Beheim Bekennen vnd tun kunt offent
lich mit disem briue allen den die jn sehen oder horen lesen das vns die Edeln Alscho vnd Hadrach Colowraten vnser liben getrewen mit demutigem
fleisse gebeten haben das wir den Ersamen vnd geistlichen Eptessynne vnd Conuente des closters zu sand Claren in der Stat zu Eger gunnen
vnd erlawben geruchten das sie das dorff Oberschossenrewte in dem lande zum Elnbogen gelegen von Enderlein Stempach kawffen mochten
vnd jn das vnd irem closter zueygen vnd zuzufugen gnediclich geruchten des haben wir angesehen der egenan Alscho vnd Hadrachen
fleissige bete vnd haben dorumb mit wolbedachtem mute gutem Rate vnsir fursten Edeln vnd getrewen vnd rechter wissen den egenanten
Eptessynne vnd Conuente des closters zu sand Claren zu Eger gegunnet vnd erlawbet gunnen vnd erlawben jn in craft dicz briues das sie
das egenan dorff zu Oberschossenrewte kawffen mugen dasselb dorff wir jn ouch zugefuget vnd zugeeygent haben zu fugen vnd zu eygen
jn das in craft dicz briues vnd kunigliche mechte zu Beheim Also das die egenan Eptessynne vnd Conuente zu sand Claren zu Eger das
egenan dorff zu Oberschossenrewte in seinen virczewnen mit allen seinen zugehorungen als das Enderl Stempach bis her ynnegehabt
vnd besessen hat haben halden vnd das gleich andern iren gutern ewiclich besiczen des genyessen vnd gebrauchen sollen von allermeniclich
vngehindert vnd gebieten dorumb dem Hawptman vnd Burggrauen zum Elnbogen vnd allen andern vnsern Amptlewten vnd getrewen die
yeczunt sind oder in czeiten sein werden ernstlich vnd besticlich mit disem briue das sie die egenan Eptessynne vnd Conuente an dem vorgenan
dorffe zu Oberschossenrewte nicht hindern noch irren in dheineweis sunder dobey von vnsern wegen trewlichen hanthaben schuczen vnd
schirmen sollen Als lieb jn sey vnser swere vngnade zunermeyden zurt vrkunt dicz briues versigelt mit vnsir kuniglichen maiestat Jnsigel
Geben zu Gorlicz Noch criste geburt Virczenhundert jar vnd dornach in dem Achtem jare des Sunnabents nach sand dyonisy tage
vnsir Reiche des Beheimischen in dem Sechsunddreissigisten vnd des Romischen in dem dreyunddreissigisten jaren

Per d(ominum) conrad(um) postulat(um) olom(ucensem)
Jacobus canonic(us) pragen(sis)