Wir Sigmund von gotes gnaden Romischer keiser zuallenzeiten Merer des Richs vnd zu Hungern zu Behem Dalmacien Croacien zc(etera) kunig Bekenne
vnd tun kunt offenbar mit disem brieff allen den die In sehen oder horen lesen Wiewol wir allewege geneigt sein alle vnd igliche vnsere vnd des Richs vndertane vnd getruen zu furdern vnd als wir beste
mogen zuberaten Vndoch sein wir me willig vnd geneigt die geistliche persone die in Juncfrawlichem wesen vnd von Jugentauff der Welt vppickeit zuruck geworfen hant vnd dem Almechtigen got in eynem ge
schlossen lauttern leben dienen vnd In seliglichen loben mit vnsern keiserlichen gnaden zubedencken gnediclich zuhanthaben vnd zuschirmen vnd In ouch fride vnd gemache zuschaffen das sy destum vnsern hern
des frides liebhaber in fridlichem vnd gutem wesen desterbas geloben vnd Inniglicher geeren vnd anbeten mogen Wann wir nu wol gehort vnd gemerckt haben so wir zu Eger waren das die Ersame vnd Geistliche vnsere
liebe Andechtige die Ebtissin vnd das Conuent gemeinlichen des Closters zu Eger sant Claren ordens in Regenspurger Bistumb gelegen eins ordenlichen lebens sein vnd Irer geute in gots dinste teglichs mit singen vnd
lesen redlich vnd ersamlich verzeren vnd darumb das sy solich gots dinste desterbas geuben vnd darzu frid vnd gemach haben mogen haben wir In mit wolbedachtem mute gutem Rate vnd Rechter wissen dise gnad
getan geordnet vnd gesezt tun ordinieren vnd sezen von Romischer keiserlicher machte in crafft diß briefs Also das kein Burggraff oder Amptman zu Hassenstein vnd Tirfstein des obgenan(ten) Closters leutte die vff vnse(r)
vnd des Teichs walde vmb holz faren hinfur nicht schatzen noch bekumern sollen in eynicherleyweiß Sunder sy sollen darjnne faren sicher frey vnd von den Burggraue oder Amptluten zu Hassenstein vnd Tirfstein vnd
niemande von Iren wegen vngehindert also offt sy wollen vnd In das not beschihet vnd als sy dann des vor langengeiten von vnsern vorfarn Romischen keisern vnd kunigen gefreyet sein Ouch sezen vnd wollen
wir das kein Burggraff zum Ellenbogen vnd andere die darumb gelegen sein Ire gotshaus leutte vnd sunderlich in beyden Schossenreut gesessen hinfur mit keynen dinsten noch fur wider Iren willen besweren noch
bekumern sollen in eynicherleywiße anders dann von alterher komen ist Ouch sezen vnd wollen wir das sy keyner fure dinsten ein vnd vß der stat Eger zutun hinfur wider Iren willen nit beswert werden sollen dem
Reuch eins pfleger vnd der Stat zu Eger an Iren dinsten vnuergriffen als dann das von alters herkomen ist desgleichen sol man sy mit strofuren vff Irem houe nit verrer besweren denn alßuil das ouch von alters
herkomen vnd gewonheit ist Ouch als sy etlich acker vorzeiten verkaufft haben von grosser schuld wegen darynne sy dann komen weren Also haben wir In von vnsern besundern gnaden gegunnet vnd erlaubet
gunnen vnd erlauben mit disem brieff das sy andre vnd alßuil gutere an stat derselben widerumb kauffen mogen on meniclichs eintrag vnd widersprechen Ouch als sy die gegend Schossenreut mit Iren
nuzen vnd klepeize das sy aldo newlichen gefunden hant vnd das sy in gerulicher gewer besessen hant vnd noch besizen vnd ynnehaben Also geben wir In dieselb gegend von newes vnd sezen vnd wollen das
sy die hinfur ynnehaben der gebruchen sollen vnd mogen vn allermeniclich vngehindert vnd vff das sy hiebey von meniclich vnbekumert bliben mogen haben wir sy ouch alle vnd igliche Ire leutt gutere
vnd habe wie dann die genant oder wo die gesessen oder gelegen sind in vnsern vnd des Richs sunderlichen schirme genediclich genomen vnd empfangen nemen vnd empfahen sy ouch darynne von Romischer keiserlich(er)
machte in crafft diß briefs Wir haben ouch darzu den obgenan(ten) Ebtissin Conuent vnd Closter alle vnd igliche Ire gnade freiheite Rechte brieue priuilegia vnd hantuesten die In von Romischen keisern vnd kunigen
vnsern vorfarn ouch der Cron zu Behem vnd andern fursten stiften gegeben sind vnd ouch Ire loblich vnd gute gewonheit die sy ietlich hebracht hant gnediclich renuewet vnd bestetigt renuewen vnd besteti
gen In die ouch in crafft diß briefs vnd Romischer keiserlicher macht volkomenheit vnd meynen sezen vnd wollen das die furbasmer crefftig sein vnd daby bliben vnd das sy der ouch an allen enden gebruuche(n)
vnd geniessen sollen vnd mogen glicherwiße als ob die alle von worte zu worte in disem gegenwertigen brieue geschriben stunden Vnd wir gebieten darumb allen vnd iglichen fursten Geistlichen vnd wernt
lichen Grauen freyen Rittern knechten Burggrauen vogten Amptluten lantrichtern Richtern Burgermeistern Reten vnd gemeinden vnd sust allen andern vnsern vnd des Richs vnd vnser kunigreich zu Behem
vndertanen vnd getruen von Romischer keiserlicher macht ernstlich vnd vestiglich mit disem brieffe das sy die vorgen(anten) Ebtissin Conuent vnd closter sandt Claren zu Eger an den voryeschriben vnsern gnaden frey
heiten begabung Rechten brieuen priuilegien hantuesten guten gewonheiten vnd vnser bestetigung nicht hindern oder Irren in kheinweiß Sunder sy daby gerulich hanthaben schuzen vnd schirmen vnd
genzlichen bliben lassen Als lieb In vnd des Richs hulde sey vnd swere vngnade zuuermeyden Mit vrkund diß briefs versigelt mit vnser keiserlichen Maiestat Ingesigel Geben zu Eger Nach Cristi gepurd vier
zehenhundert Jar vnd darnach in dem Sibenunddreissigistem Jare Am nechsten freytag nach sant Peters tag Ad vincula Vnsers Reichs des hungrischen Im Eynundfunfzigisten des Romischen In
Sibenvndzweinzigisten des Behemischen Im Achtzehenden Vnd des keisertumbs In funfften Jaren
Ad mandatu(m) d(omi)ni Imp(er)at(or)is d(omi)ni Caspar Slik
Cancellarius Hermannus Heecht