Wir Wladislaus von gotis gnaden künig zu Behem Marggraue zu Merhern Herczog zu Luczelburg vnd in Slesie vnd Marggraue
zw lusicz (et)c(etera) Bekennen vnd thun kundt offintlich mit disem briue gen Allermenniglich Wann als vor vns komen ist der Erwirdign vnd
vnser lyben Andechtign Namhafftige Botschaffte vnd haben vns mit vleis demuticlich gebeten das wir denselben Abbtissin Meisterinne
vnd Conuente alle vnd saliche ire gnade freyheit guter gute gewonheit altherkommen briue Priuilegia vnd hantuesten
die sy von Romischen kaysern vnd künigen zw Behem vnsern vorfarn vnd andern Gaystlichn vnd wertlichn furstn redelich
erworben vnd herbracht haben vber die dorffer Drenicz vlrichsgrun Schossenrewte vnd ander guter als dan das Inden selben
hantuesten vnd briuen dorober ausgangn Clerlicher ausweyset gen bestattigen vnd Confirmirn gnadiglich geruchten des haben
wir angesehn der vorgenanten Abbtissin Meisterinne vnd Conuents klegcliche bethe vnd auch betracht das gotis dinste in
demselben Closter erbarlich gehalden vnd vorbracht wirth habn drümbe mit wolbedachtem mute gutem rathe vnser lyoben
getrewen vnd rechter wissen der vorgnantn Abbtissin Meisterinne Conuent vnnde Closter zw Sand Claren zw Eger
Alle vnd saliche ire gnade rechte Begnadunge freyhaite guter gute gewonheyte Altherkomen briue priuilegien vnd hantuesten
die ir vorfarn vnd sie von Romischen keysern vnd künign zw Behem vnd andern fursten Gaystlichn vnd werntlichn erworbn
vnd redelichn herbracht haben vnd Sunderlichen vff die dorffer Drenicz vlrichsgrun Schossenrewthe vnd ander ire guter wo
sie gelehen sein gnadiglich bestattigt vnd Confirmirth Bestetigen Befesten vnd Confirmirn die auch von küniglicher machte
mit vnd in Crafft diss briffs in allen iren punckten artickeln geseczen vnd meynungen vnd in allermas als ob sie von worte zuworte
hirinne begriffn vnd beschreben weren vnd meynen seczen vnd wollen das die obgnante Abbtissin Meisterin Conuenth vnd Closter
vnd ire lewte furbass ewiglichn da bey bleyben vnd der gebrauchen sollen von meniglich vngehindert dauon gebiethen wir den
Edlen vnsern lieben getrewen allen vnsern hewbtleuten freyen hern rittern vnd knechten pflegern Burggrauen Burger
meistern richtern rathen Burgern Gemeindern vnd sunderlichn vnserm pfleger vnd der Stat Eger vnd andern vnsern
Amptlewten die nu sein oder In zutten werden Ernstlich vnd vestiglich das sie die vor gnantn Abbtissin Meisterin vnd Conenth
des Closters zcu sand Claren zw Eger an solichen iren gnaden freyhaythen rechten begadungn briuen Priuilegien vnd hantuestn
furbas nicht hindern Sunder sie da bey gewislich bleyben lassen von vnsern wegen trewlich Schuczen vnd Schirmen
Als lieb eynem yedem sey vnser Schwere hirstime vngnade vnd die busse zehen margk goldis das die halfft yn vnser
Cammer vnd der ander halbteil den clageren gefallenn sol so offt das geschechiste vermeyden wollen Mit vrkund diss briues
versigelt mit vnserm küniglichen anhangenden Insigil Geben czw pragan Suntag nach Sand Bartholomeus des heilign
zwelffboten tage Nach xpi geburth vierczehenhundert vnd ym achczigistn vnsers reichs ym zehenden Jore

Wir Vlrich Abbt zcw Waltsassen Ordens san Citel Regenspurger
bistumbs bekennen offenlichn an disn vidimus wann wir den hawptbrieff
disser obgeschribn abschriffte an küniglichen anhangendm Insigell pergamey
vnd geschrifft richtig vngebrochn vnbesleckt mackel vnd tadelffrey gesehen
mit vleiss beschawt nebn der abschriffte verhort vnd das der selbig hawptbrieff
In allen punckten stucken vnd artickeln von wort zcw wort von diese gegen
wertige abschriffte sambt weyst in ym hat nichts daruon vßhandelt darzu gethan
oder darzcu gesaczt da durch der syn der vßtruckhait vendert ad(er) vßereyßt erfunden
haben So haben wir zcw vrkundt das vidimus mit vnserm Closter hierunden
anhangenden Insigel besigellt vnns doch vnschaden vnd vngeuerlich an
schaden Geben vnd gegebn am nesten Montag nach Natiuitat(is) Marie
Nach cristi geburt Tausent vierhundert vnd in Achczigistm Jare