Ich Hains Denczel der Sneider vnd paul denczels etwen zu Noderzreut gesessen seligen Sun bekenn vnd
thw kunt offennlich an dysen briff vor allen den dy In sehen ader horen lesen das mir dy Eerwir=
digen vnd Gaistlichen Junckfrawen die Ebtesin vnd conuent Sant Claren ordens zu Eger alles
mein veterlich vnd muterlich habe vnd gut das sie als die herschafft von meim wegen Inne
gehabt vnd eingenomen nichts hindan gesaczt noch außgenomen lautere on all mein schad
gentzlich vnd geniglich entricht vnd benugt haben das ich In vndertemiglich vnd mit vleis
danck Vnd dorauf so sag Ich sie Ir conuent vnd all Ir nachkomen fur mich all mein erb=
nemen vnd nachkomen des gemelten meins abtails auch der funff schok grossen die sy
auf anfordrung dem Eberlein meym Swager vor von der habe vnd gut außgericht
haben alles vnd ydes in crafft vnd macht des brifs gancz vnd gar quit frey ledig vnd los
on all geuerd Vnd gered das weder Ich mein erben erbnemen vnd nachkomen noch ny=
mand von vnsern wegen die gemelten Ebtesin vnd Ir conuent all Ir nachkomen noch
Ir dinstleut vnd dy Iren nymand außgeslossen von solichs meins veterlichen vnd mu=
terlichen habe erb vnd guts varend noch vnbarend lauter nichts außgeschaiden weder
vmb clain gros wenig ader vil Noch von bestimpter funff schok grossen wegen mein ge=
nanter Swager Eberlein von In eingenomen vnd enpfangen hinfur zu ewigen zeiten
nymmer mer bekumern anlangen noch zusprechen Noch dadyrch kain forderung zu
spruch anspruch recht noch gerechtikait zu In noch dem erb vnd gut nit haben noch ge=
wymnen sollen noch wollen weder mit recht gaistlich werklich haimlich noch offenlich
noch an recht gancz in kainerweis bey vnssern guten waren treuen on argk vnd vngeuerd
Des zuwarem bekentnis han Ich genanter Hains denczel fur mich mein erben vnd nach=
komen gebeten dy Ersamen weisen Endresen pawer vnd Christoffen firczel pand des Rats
zu Eger das sy Ir Insigel von meiner bete wegen der zugezeugknus In on schaden an den
brif gehangen haben der geben ist Nach Cristi gepurtt Vierzehenhundert vnd ym Eyn
vnd Newnczigisten Jare An Sant Niclas tag des Heiligen Byschoffs