Ich Erhart Stawdner zw Poczpitzwig gesessen vnnd ich Wolffel Stawdner sein Sun, Nachdem wir etlich zeit vnnder den Er
wirdigen vnnd gaistlichen Junckfrawen Ebbtessin vnnd Conuent sant Claren Ordens zw Eger vnser gnedigen lieben
herrschafft auf ein hof zw Poczpitzwig gelegen zwischen fridel mulners hof vnd pphers wasser gesessen gewesen
vnnd In die hernachgenanten getrayd zins vnnd annders schuldig gewesen sein, nemlich dreyvnndfunfftzig stricht korns
mynnder ein halbs vierteill, vierunddreissig stricht habern vnd vierzehen metz, zwenvnddreissig hennen, vierunddreissig
kes, dritthalb schock ayer vnd zway gute schock vnnd acht meissner an geldt, Sulche Sum an getraid vnd andern
wir In dann nit haben künnen noch mugen bezalen, Vnd auf Iree vnd vleissige bete von Inss an sie bescheen, haben
Sie vns grosse gnad vnd gunst erzaigt vnnd mit In mit wolbedachtem mute guten willen vnnd rechter wissen durch
Züderblewt geaint vnnd vertragen haben, Vnnd Bekennen dorauf fur vns all vnser erben erbnemen vnd nachkome
offenlich an diesen brieff an allermenniclich: das wir auf sulchen vertrag den genanten Junckfrawen den obgemellten
hof dorauf wir dann das kaufrecht gehabt, wissentlich vnd williclich abgetreten vnnd vbergeantwort haben, Vnd
den in krafft ditz briefs abtreten, Vnnd dorauff desselben mit sampt zcden allen inigen rechten herlikaiten gerechtigkaite
Egker wiesen vnnd aller zcugehorung nichts aussgenomen hiefür fur vns all vnser erben erbnemen vnnd nachkomen
lewterlich vnnd genzlich verzeihen vnnd verzzigen haben wollen on als geverde, Vnnd gereden vnnd globen dobei
Das weder wir all vnser erben erbnemen vnnd nachkomen noch nymant von vnsern wegen freunde noch frembde
Die gemelten Ebbtessin vnd Conuent vnd all Ir nachkomen vnnd all Ir verwandte vnd zugehörigen nymant auss
geslossen, von sulchs obgedachten hofs mit aller gerechtigkait vnd zugehörung noch vmb alles annders, gewissens vns
biss auf disen hewtigen tag begeben, weder vmb clein grob wenig ader vil wegen hinfur zw ewigen zeiten nymmer
mer betaidigen anlangen noch zusprechen noch kein forderung anspruch zusprach recht noch gerechtigkait deshalben
zw In noch den Iren nit haben noch gewinnen sollen noch wollen, weder mit recht gaistlich weltlich haimlich noch
offenlich noch one recht gantz in kainerweis bey vnsern guten trawen trawen on arck vnnd ongeuerde, Des zw
warer vrkund han wir obgemelten Stawdner vater vnd Sun fur vns all vnser erben erbnemen vnd nachkomen gebeten
Die Erbern vnd weisen hern Sigmunden wernher die zeit Burgermaister vnnd Endresen paier auch des Raths
zw Eger das sie ir Inssigel von vnser bede wegen des angezaigten Sun on schaden an den brif haben gehangen
Der geben ist am donerstag nach dem Sontag Oculi in der Heiligen vasten Nach Cristi geburt funfftzehenhundert
vnnd Im Sechsten Jare