Ich Jacob welle Im obern schüßkraut Bekenn fur mich Barbara mein eliche hawsfraw alle
mein erben vnd nachkumen offennlich an dissem briue gen allermenniglich, Nach dem Die erbern
vnnd weisen hans vnnd Cristoff Die Cümmerawer gebrüder zw wilspein sambt yrer mut=
ter meins obgemelten weybs stieffman hannsen talweysers Innn Reinhartshöfen verlaßen
vater, vaterteyl vnnd Mütterlich erbteill vnnd güet Innn gehabt, nemlich dreissigk schogk
vnd zwaintzig groschenn, Solcher yetz gemelten Summa gelts bin ich von genantten Cümme=
rawern auff hiut Dato des briefs par vnd berayt zw danknemigen gefallen, an alle
mein vnd meiner hawsfrawen vnd erben Cost vnnd Schaden vergnügt vnd bezalt wor=
denn, Sag darauff fur mich gemelte mein hawsfraw alle mein erben vnd nachkumen
obenandte Cümmerawern all yr erben vnnd Nachkumen angezaigt meins weybs vaterlich
vnnd Mütterlich erbteill vnnd güet Mit Crafft vnd macht ditz briefs quit frey ledig
vnnd los, vnd gereden do bey, das weder ich Die gemelte mein hawsfraw all mein erben
vnd nachkumen Nach nyemant von vnnsert wegen obgenantte Cümmerawern all yr
erben vnnd Nachkumen von obgenantte meins weybs vaterlich vnd Mütterlich erbteill vnd
güetz wegen hinfüro zw Ewigen Zeiten Nymmermer belaidigen anlangen Nach da=
durch willen aynnichczley anspruch zwsprach thet noch getichtigkeit nicht haben, für=
nemen Nach gewynnen Sollen noch wellen, Nach nyemant von vnsern anzaigen, weder mit
Statt geistlich weltlich haimlich noch offennlich, also an recht gantz alle arglist So ymmer
Menschen Ein erdencken Möcht außgeschaiden sein soll bey vnnsert güten waren trewen
leiblich an aydt aydesstatz, Des zw warer vrkundt, steter vester vnzerbrüchlicher
haldung hab ich obgenantter Jacob welle fur mich gemelte mein hawsfraw alle mein erben
vnd Nachkumen Mit vleiß gebeten Die wirdigen vnnd Geystlichen Jünckfrawen katherinn
von Sebergk Ebbttissinn Sant Claren Stifft zw Eger mein erbfrawen, das sy vmb von meiner
bit wegen des yr Stiffts Innsigell ende der Schrifft auff den brief hat thun drüken, Doch yr
wirden, Dem stifft vnd yr Nachkumen anschaden, Der Geben ist Dinstag nach phillippi vnd
Jacoby der hailigen zwelff boten, Nach Cristi geburt fünfftzehenhundert vnd Im viertzehenden Jare