Ich Jobst aberl panczermacher die zeit Burger in der alden Stat zw prag Bekenn fur mich vnnd Wolffn Hubner meinem
Swager des ich mich hiezinn vollenntlich mechtig vnnd anczige vnnd all vnser erben vnnd nachkomen offenlich an diesen
brieff gen allermeniclich Das mir die Erwirdigen andechtigen vnnd gaistlichen Junckfrawen abbtessin vnnd Conuent
Sant claren Ordens zw Eger an stat vnnd von wegen des genanten meins Swagers funff Schock grossn Statt
werung aldo zw Eger die sy von wegen des hoffs zun Flegwein hinter den gedachten closter Junckfrawen gelegen geburt
haben, gutlich vnnd an all mein schaden bezallt entricht vnnd geton haben Darumb So sag ich fur mich mein ge
nanten Swager all vnser erben vnnd nachkomen Die gemelten Junckfrawen Abbtessin vnnd Conuent Ir gnade
vnnd czwirde vnnd all Ir nachkomen vnnd die Iren der bestimpten funff Schock grossn in crafft vnnd macht des briefs
gut frey Ledig vnnd los vnnd den mitsampt den berurten hoff mit aller zugehorung gantz vnnd poden nichts auß
genomen hiezinn leuterlich vnnd genzlich verzeihe one alls geuerde, vnnd gerede Das weder Ich der benant mein
Swager all vnser erben erbnemen vnnd nachkomen, Noch nyemant von vnsern wegen Die gedachten Junckfrawen all
Ir nachkomen vnnd die Iren auch die sy Entczworffen sein noch den armen mitnamen Harschart auff den hoff geseßn
vnnd all sein erben von angezangter funff Schock grossn des hoffs mit aller Zugehorung noch alles anders wegen weder
vmb clain gros wenig ader vil gantz nichts außgenomen hinfur zw ewigen zeiten nymerner betrubigen anlangen
noch zusprechen sollen noch wollen weder mit recht gaistlich weltlich haimlich noch offenlich noch one recht gancz
in kainerways bey vnsern guten waren trewen one arck vnnd ongeuerde, Des zurkunt Vrkund han Ich gemelter
Jobst aberl auß crafft der volmacht So mir der benant mein Swager verruckter zeit fur den Richter vnnd zwen
gesworen des Gerichts nemlich Endresen passler vnnd Caspar zichner vnnd nachfolgent Dominico Stemer Casparn
perlling Casparn lederer vnnd Nickel peincker alle Burger vnnd mitburger zw Eger gegeben fur mich In vnnd alle
vnser erben erbnemen vnnd nachkomen gebeten Die erbern vnnd weisen hern Endresen pauer vnnd Jorgenn demel
baid des rats zw Eger das sie Ir Insigel von meiner bete wegen des Ingesenckumb In ein schaiden an den brieff
haben gehangen der geben ist am abent walpurgis nach xpi geburt xv c vnnd ym ainvnndzwainczigisten Jare