Von gottes gnaden Wir Georg Abbt des Gotzhus und Wgottshus Waldsassen bekennen offenlich mit dem brieff das uns uff heut datum die Erwirdigen und gaistlichen priorin und
Conuent des Jungkfrawen klosters In der Stat Eger Sant Claren Ordens durch ein gaistlich botschafft ein pergamen brieff mit des durchleuchtigsten fursten und herren herren fer=
dinand zu Behaim hungern Dalmatien Croatien künig Jnfant in hispanien Ertzhertzog zu Osterreich hertzog alles genedigsten herren küniglichen anhangenden Jnsigel
besigelt unzertzert gantz unuerseert an marck margenn an pergamen geschriben worten silben und Jnsigell der von worten zu worten Laut und Stet als hiernach volgt furtragen
und anzaigen lassen Wir ferdinand von gottes gnaden zu Behaim hungern Dalmatien Croatien künig Jnfant in hispanien Ertzhertzog zu Osterreich Marggraff zu Mer=
hern hertzog zu Lutzelburg und Slesy Marggraff zu Lausitz ec Bekennen und thun khund offenlich mit disem brieff gen allermeniglichen das uns die Erwirdigen und Gaistlichen
Abbtissin Maisterin und Conuent des Jungkfrawen klosters zu Eger Sant Claren Ordens gelegen der Regenspurger Bistumb unger lieben andechtigen mit hohem vleis demütiglich haben
bitten lassen das wir derselben Ebtissin Maisterin und Conuent alle Jre hiezu geübt recht freyhait güter gult gewonhait altherkhomen brieue priuilegia und hantueste die sy von Ro=
mischen kaysern und künigen zu Behaim unnd andern gaistlichen und weltlichen fursten ritters mairern und herkhomen haben uber die dorffer Dirnitz Vlritzsgrün Schossen
reuth und anderer güeter als die das In denselben hantuesten und brieuen daruber außgangen clerlicher außweyst zu bestetigen und Confirmiren genediglichen geruochten dieweil
wir ansehen die vorgenanten Ebtissin Maisterin Conuent und kloster zu Sant Claren zu Eger meynliche bethe und auch betracht das der gotz dienst In demselben kloster loben=
lich gehalten und volbracht wirdt haben demnach mit wolbedachtem muet gütem Rathe vnserer lieben getrewen und Rechten wissen der vorgenanten Abbtissin Maisterin Conuent
und kloster zu Sant Claren zu Eger alle und yegliche Jre gnade recht begnadunge freyhaiten guetter gult gewonhait altherkhomen brieue priuilegia und hantuesten die Jne von
und sy von Romischen kaysern und künigen zu Behaim und andern fursten Gaistlichen und weltlichen erworben und redelichen herbracht haben und sonderlich uff die dorffer Dirnitz Vlritzs=
grun Schossenreuth und andere Jre güeter In Jre gelegen sein genediglichen bestetigt und Confirmirt Bestettigen beuelhen und Confirmiren die auch von Römischer küniglicher macht
mit und In Crafft ditzs brieffs in allen Jren puncten artickeln gesetzen und maynungen und In aller mas als ob sy wort zu worte hierin begriffen und beschriben weren Setzen
maynen und wellen das die obgenante Abbtissin Maisterin Conuent und kloster und Jre leute hinfur ewiglich dabey bleiben und der gebrauchen sollen Wir thun auch den obenge=
nanten Closterfrawen Abbtissin maisterin und Jrem ytzigem Conuent und allen Jren nachkhomenden Ebtissin und Conuent zu Eger die und ewigen gezeiten dise sunderliche gunst
und begnadunge so In die Burger zu Eger oder andere wer die weren Es sey gegen Jnen underthonen In stadt oder aussen stadt oder gegen Jren aigen leuten oder bauer an=
dere mit geburlicher und billicher hilff auff Jre ersuchen durch sich oder Jre Ambtleuth nicht helffen oder nicht hilff erzaigen wolten das die Ebtissin Maisterin und
der Conuent macht und gewalt haben sollen und mogen Jnen von hie In die dorff zu Behaim und auch Jren underthonen In Jren guettern und allen Jren In khomen und
Zugehorungen wie die alle mit besundern Namen mogen genant werden zu ainem schutz hern zuerwelen und aufnemen nach Jrem geuallen den sy In Jren notdurfften und
anligenden notturfften umb hilff und beystand anzusuchen macht haben In den In Eger und sunst menniglich ungehindert dauon gebieten wir den Edlen vnsern getrewen
allen vnsern haubtleutten freyen hern Rittern und knechten pflegern Burggrauen Burgern maistern Richtern Räten Burgern gemainden und sonderlichen vnsern
Ambtleutten die nun sein oder In zeiten werden ernstlich und vestiglich das sy die vorgenanten Abbtissin Maisterin und Conuent des klosters zu Sant Claren zu Eger an
disen Jren gnaden freyhaiten rechten begnadungen brieuen priuilegien und hantuesten hinfur nicht hindern sonder sy de bey gerüiglich bleiben lassen von vnsern wegen Jnen
lieb schutzen und schirmen als lieb ainem yeden sey vnser schwere ungnad zuuermeiden des zu urkhundt mit unserm anhangenden Jnsigel besigelt Geben auff vn=
serm schlos prag freytags nach Trinitatis des Jars nach cristi gepurt funfftzehenhundert und Jm siben und zwaintzigsten vnser Reiche
des Behaimischen und hungrischen Jm Ersten Jare Und als Wir disen brieff also sehen und verhorten wurden von der vorgenanten Ebtissin In Namen
der obgenanten priorin und des gantzen Conuents Sant Claren Ordens zu Eger demütiglich das wir Jnen solhen küniglichen brieff ein glaublich vidimus abschrift vnser vnsern grossen
Abbtes Jnsigell zugeben gebeten das wir hiemit thun und In dise abschrift vidimus die wir gegen gemeltem küniglichen brieff mit vleis Collationirt verlesen und den
gleich lautendt funden haben und zu inhrer urkhundt disem brieff under unserm grossen Abbtes Jnsigell das vnsern gotzhus waldsassen und nach khomen an schaden anhan=
gendt besigelt geben uff Montags nach Cantate und durch vnsers lieben herrn Cristi funfftzehenhundert und In dem Ein und dreyissigstenn Jare