Wir Hernachgeschrieben mitnamen Erhart mayer zunn Neundorff, Hanns wilhelm zw Stobessen Im Egerlandt vnnd Wolff falck zw vnter Schossen
reut Nachdem verschyner zeyt Wolff Stobesser aldo zw vnter Schossenreut seliger nach vnns vnnd Georgen Hatzel geschickt zw vormundern vnnd
getrewhendern seiner kinder vnnd verlassen hab vnnd gueter erkorn erbeten vnnd vermugt, daneben muntlichen beuolhen vnnd begert hat, wo Got
der allmechtige vber In gebiete, Die Erwirdigen vnnd Gaistlichen Junckfrawen Ebbteßin vnnd Conuent sannt Claren Ordens zw Eger sein gnedige
liebe Herschaft, demutigs vleis zubiten Damit sein Hoff darauff er gesessen seinen kinden zinsut, dieweil auch der, dieser zeyt am maisten gellten, erblich
vnnd Im todt verkaufft, die schulden so Er zuthun bezalt, vnnd die vbermas gedachten seinen kinden versorgt werden mocht, gunstiglich zubewilligen vnnd
nachzulassen, Welches nu von der Herschaft Inn ansehung vnnd bewegung des gemelten Stobessers biten, begerns vnnd beuels geschehen vnnd darein
bewilliget haben Also Bekennen wir obgenannten vormunder fur vns vnnd all vnser nachkomen vormunder offenlich an diesem brieff gen allerme
niglich Das wir mit gutem willen, wolbedachtem mute, wissen vnnd vergunst der Herschaft, Des mergemelten Wolffen Stobessers Hoff daselbst zw
vnter Schossenreut, hinter ernannter Herschaft, vnnd neben mein gedachts Wolff falcken Hoff gelegen Zinst Jnen den Closter Junckfrawen Jerlich
drey kar minder ein vierteil getraids, hab korn vnnd halb habern, ein halben gulden reinisch an gellt vnnd Funff Hennen, sambt der manschaft, felle
vnnd annder gerechtigkait darauff Inmaß den, der genant Wolff Stobesser Jnngehabt, mit grunt poden, allen eren, nutzen, rechten, gerechtigkaiten
vnnd zugehorungen nichts außgenommen Dem Ersamen Georgen Hatzel obgemelt vnserm mitvormundt allen sein erben vnnd nachkommen
vmb ein Sum gelts Nemlich dreyhundert vnnd Funffvnndsiebentzigk gulden reinisch guter Lanndswoerung, Der wir von Jm par vnnd berait be
zalt worden sein, vnnd In der quit frey ledig vnnd los sagen, Furder auch die schulde wie obstet, bezalt vnnd den vberlauff mit wissen der Herschaft
versorgt haben, recht vnnd redlich zw einem steten ewigen, toden vnnd vnwiderruefflichen kauff zukauffen geben vnnd verkaufft Das wir vnns
auch hierInn lauterlich vnnd genntzlich verzeihen, vnnd an stat vnnd von wegen des Stobessers seligen kinder, mitnamen Caspar vnnd Vrsula
verziegen haben wellen on als geuerde, Gereden vnnd globen dabey Das weder wir die kinder ab Sie zw mundigen Jaren kemmen, Inn
gemain noch besunder, all vnnser nachkommen vormunder, erben, erbnamen freindt noch frembde, noch nyemant von vnserm wegen Den
berurten Hatzel all sein erben vnnd nachkommen, von des bestimbten Hoffs mit aller zugehorung noch von derselben gedachten kauffsum
wegen hinfur zw ewigen zeytten nymermer betaidigen anlanngen noch zusprechen sollen noch wellen, weder mit recht Gaistlich werntlich
Haimlich noch offenlich noch on recht ganntz in kainerweis bey vnserm guten waren trewen on arck vnnd ongeuerde Vnnd globen Jm
auch den, mit aller zugehorung zugewern vnnd zuentwern, als der vnnd vnnd Irte recht vnnd gewonhait ist, on allen Iren schadenn
ongeuerde Des zuwarer vrkund vnnd steter haldung haben wir obgenannten Erhart mayer, Hanns wilhelm vnnd Wolff falck, fur
vnns die kinder vnnd all vnnser nachkommen vormunder, auch vnnser vnnd Ir erben vnnd erbnamen, gebeten Die Erbern vnnd
weysen Herrn Hannsen Schindel vnnd Micheln premer baid des Rats zw Eger, das Sie Ir Innsiegel von vnnser bete wegen,
des zugezeucknus In on schaden an den brieff haben gehanngen Der gebenn ist am tag Thome apostoli nach Cristi
vnnsers lieben Herrn Erlesers vnnd Seligmachers geburt Funfftzehenhundert vnnd Im Achtvnnddreissigistem Jarenn