Ich Hans Lindner Haffner vnd mitburger zue Eger, Bekenne fur mich alle meine Erben, Erbnehmen vnd
Nachkommen, Offentlich an diesem Brieff gancz Jeder meniglich. Das Jch mit guetem willen vnd rechtem wissen
mein Bretleus neben meinem hauß, dann zwischen herrn Hansen wagners seligen, vnd des Stiffts zu Sanct
Claren alhir In Eger hof gelegen, welches ledig vnd frei ist, mit grundt poden allen rechten gerechtig keiten nuczungen
zue vnd Eingehorung, aller massen, wie Jch den Innegehabt genuczt genossen vnd gebraucht nichts außgenommen
habe recht vnnd redlichen, den Erwirdigen vnd Gaistlichen Junckfrauen abtissin vnd Conuent des Stiffts vnnd
Junckfrau Closters zu Sanct Claren alhir In Eger, welcher hieruor auch zu Jrer Erwirden hof gehorig gewest,
allen derselben nachkommen, vmb Ein Suma gelts der Jch von Jrer Erwirden Bar vber vnd woll zu danck Ent=
richt vnd bezalt worden bin, zu kauffen geben vnd verkaufft, des Jch mich genczlich vnd lautterlichen thue
verzeihen. Beredt hierauf fur mich alle meine Erben, Erbnehmen, das wir noch niemants von
vnnsernt wegen, gedachte vnnser abkauffere alle Jre nachkommen, obberurtes Bretleuis mit derselben
zu gehorung derselben kauff suma noch anders des halben hinfuro zue Ewigen zeitten Nimmermehr beschaidigen
anlangen anlangen noch zusprechen sollen, weder mit noch ohn Recht gancz In kainerlai weiß wie Jmmer
herdenncken sein moge, Sonder geweren Entweren freyen vnd ledigen wöllen, als der Erbarn Stadt Eger,
Recht vnd gewonheit ist, So auch In lang oder kurtz alte kauf vnd gewehr Brieff vber obgedachtes Brett
leustandt gefunden wurden, dieselben alle sollen krafftlos todt nichtig vnd absein. Bey meinen waren
trewen vnd glauben ohn geuerde, zur vrkundt hab ich fur mich vnd alle meine Erben Erbnehmen, die Erbarn
vnd wolweisen herrn Egidien Bairn vnnd herrn Thomaßen werner bede des Raths der Stadt Eger, das sie Jre
Insigl (doch Jnen vnd denselben ohn schaden) an diesen Brieff haben gehangen, Gebenn den Sechsten Aprilis
Nach Cristi geburt gezalt, Tausent funffhundert vnd Jm ain vnd Siebenzigisten
Jar.