Ich Thomas Strunck Burger zue Eger, Bekenne fur mich, Vnd Anna, mein Eheliche Hauß
fraw beider vnser Erbenn Erbnegmen, vnd nachkommen, Offentlich an diesen brieff gegn aller meniglichen, Das Ich mit gueten willen, rechten wissen, vnd wolbedach
tem muet, meinen Teich zur Oberlohma vff der Aw, Neben meister Hansen der Nothafft zue Sanct Clarenn Teich, vnnd Arnolt Schmids zur Oberlohma Wiesen gelegen,
Dann ander halben zur Crepitz Rohr, vnnd Jobstenn Vegens zur Vnterlohma Wiesen stossent, Welcher freies Eigenthumb, vnnd aller Losung frey ist, mit grundt, poden, Wasser,
Wasserflüssen, Vischgewaidenn, Zue vnd Abgengenn, Allenn rechtenn, gerechtigkaitenn, nutzungenn, Ein vnd Zuegehörungenn nichts Außgenomenn, Hab recht vnd red
lichenn, Der Erwirdigenn vnd Ehrn Tugenthaifenn Junckfrawenn Apolonien Hünckhin Äbtissin vnd Conuent, Obgemelts Stiffts Sanct Clarenn Ordens, des Junckfrawen
Closters Inn Eger, vnnd allenn derselbenn Nachkommenn, vmb Ein Summa gelts, Der Ich von Irer Erwirdenn vnnd Conuent, heüt dato bar vnd beraitz ohne abgang Wol
zur danckh, vnd ohne allenn schadenn, In meinenn Aigenn handenn, entricht vnd bezalt wordenn bin, Zukauffenn gebenn vnnd verkaufft, Dieselb, vnd was Ich Inen hierIn
schwerer quittirung vermietig, Ich gantz aller ding, quit, frey, ledig vnnd loßsage, Vnd thue mich des allenn hiermit Jetz Alßdann, vnd dann als Jetz, gentzlich vnd Vnuerweißlich
zeigenn. Veredt vnnd gelobe hierauff, Das Ich, vnnd mein Haußfraw, Noch kainer vnser Erbenn, Erbnegmen, vnnd Nachkommen, Noch sunstenn
Jemandts Anderß von vnsertwegenn Zuekain gestattenn, Obenuolgedachte Fraw Äbtissin, Iremm Conuent, Noch auch kaine derselbenn nachkommenn, Obangezaigts Teichs,
desselbenn grundt, podenn, nutzung, vischereyenn, Wasser, Wasserflüssen, Zue vnnd Abgengenn, vnnd aller seiner Ein vnd Zuegehörung, Der darfur entpfangnen
Kauff Summa, Noch anders deßhalben, Weder vmb klein, groß, wenig noch viel, gantz vnnd gar nichts außgenomenn, noch kainer behaltenn, Hinfuro Zue Ewigenn Zeittenn
Nimmermehr darumb oder dardurch, betaidigenn, anlangenn, noch besprechenn sollen noch wöllenn. Weder mit Geistlichenn, Weltlichenn, Haimlichen, Öffentlichen,
noch sunstenn ohne Recht, gantz Inn kainerley weiß noch wege, Wie Jmmer durch menschenn Sinn oder List, furgenomenn, vnd erdacht werden möchte, Sonder dieselbe,
Solchen obgemelten Teich mit Angezaigter seiner Zuegehörung, gewehrenn, entwerenn, schutzenn, vnd ledigenn wöllenn, Als der Erbarn Stadt Eger, vnd derselbenn
Brieff, Recht vnd gewonheit ist, Bey gueten theuwenn ohne geuerde. Des Zue warem vrkundt, Hab Ich obgenanter Thomas Strunck, fur mich, Gedachte
mein Haußfraw, All vnser Erbenn, Erbnegmen vnd Nachkommen, Die Erbarn Ernuesten vnd Weisen herren, Hansen Schmidt, vnd Wilhelmen Kestler Gericht
schreibern Allhie Zue Eger, meine gunstige Herren, vnd freundtliche liebe Schwäger, erpetten, Das Sie Jre Angeborne Insigel, doch Inen ohne schaden, Neben meinge
wönlichem Pettschafft, An diesenn Brieff gehangen haben, Beschehen denn Eytag nach dem Sontag Esto Mihi, Nach Christenn vnsers lieben Herren vnd Erlösers Gebürt,
Tausent Funffhundert vnd Jm Zwaigvnnd Siebentzigestenn Jarenn.