JCh Hanns Michel Burger vnnd Tuchmacher Jnn Eger Bekhenne vor mich alle meine Erben vnd Erbneumen, Offentlich an diesen
brieff gegenn meniglich, Das ich mit gutem willenn Vnnd wolbedachtem muthenn, mein Zehenthen Rudelßgrun, nebenn der Erwurdigen Vnnd
Andechtigenn Ebtissin Vnnd Conuent, Des Stiffts vnnd Junckhfrawenn Closters, Sannct Georgenn Jnn Eger, gelegenn,
Jst allendingb ledig Vnnd frey, mit grundt bodenn allen Rain Vnnd Steinen, allen Rechtenn gerechtigkeittenn nutzung zue Vnnd Zugehorung Aller
massenn wie ich solichenn Jnnenn gehabtt, genützt genossenn Vnnd gebrauchtt, nicht außgenommen, Habe Recht vnnd Redlich, Dem Erbarnn Vnnd
Weisenn herrnn Nicklas Rubingern, Des Raths in bemelter Statt Eger, meinem lieben Schwagernn, Allen seinen Erben Vnnd Erbnehmen, Vmb
Ein benandte Summa geldes, der ich Ime bar Vber Vnnd wol zue danckh entricht Vnnd bezalt wordenn bin, Darumben ich Jne Vnnd seine
Erben der wer sonsten daruon quitiere vnnd entledige, hiemit thue quitiern, zue khauffenn gebenn Vnnd Verkaufft, Dessenn ich mich gentzlich
Vnnd Ewiglichen thue Verzeihenn, Berede Vnnd gelobe hierauff ich obgedachter Hannß Michel, Vor mich alle meine Erben Vnnd Erbnehmen
Das wir nachniemands Vonn Vnsentwegenn, bemelten meinem lieben Schwager, Nicklas Rubingern, als abkhauffernn, Alle seine Erben Vnnd
Erbnehmen, Des bemelten Zehents, desselbenn grundt bodenn Khauffsumma, in sonderb desselben hinfuro zue Ewigen zeittenn, nimmer mehr
Belaidigen anlangenn noch beschwerenn sollenn noch wollenn, weder mit noch ohne Recht, gantz in khainerley weis noch wege, wie Jmmer zue erdenckh
sein möcht, Sonndern gewehren entwerhenn freygen Vnnd ledigenn wollenn, als der Erbarnn Statt Eger Recht Vnnd gewonheitt, Bey meinem wah=
renn Trewenn Vnnd glaubenn ohne geuerde, Zue Vrkundt hab ich obgedachter Michel, Vor mich alle meine Erben Vnnd Erbnehmen, mit sonnderm vleis
erbettenn, Die Ernuestenn Vnnd Weisenn herrnn Endres Wleiel, Vnnd Ernhardt Rupprecht, beede des Raths der Statt Eger, das sie Jre Jnsigel, doch
Jnen ohne schadenn, zugezeugnus ann diesenn brieff anhangendt Vffgedruckht, Bescheen Vnnd gebenn den Sechs Vnnd Zwaintzigistenn Monath thag
Septembris, Jm Funfftzehenhundert Zway Vnnd Neuntzigistenn
Jare.