Ich Nicklas Rüdinger des Raths vnnd Burger in Eger, hiemit vor mich alle meine Erben vnd Erbnehmen, Offentlich bekenne vnnd Thue
kundt, Das ich mit gutem willen, Vnnd Rechten wißenn, auch vmb mein vnnd meiner Erben nutz wegenn, mein Acker am Radelberg, Zwischen hernachbemelten
keuffern, Dann Georgenn Fritzzschanssen, Vnnd Hanß Schrengel Erbarnn gelegen, Ist allerdingß ledig vnnd frey, mit grundt, bodem, Rain vnnd Marck, Vnnd Aller
dessen Rechtenn, nutzung, ein vnnd zugehörung, Allermaßenn ich denselbenn Inne gehabt, genützt, genossenn vnnd gebraucht, nichts außgenommen, Der Ehrwir
digenn vnnd Andechtigenn domina, Äbtißin Vrsula Helmin, neben dero gantzem Conuent des Stifft S: Clara, Vnnd Junckfraw Closters in Eger, Vnnd Allen
dero nachkommen, Vmb ein benandte Summen geldes, der ich von Jhrer Ehrwirden vnnd Andacht, zue gutem danck bar, Vor entricht vnnd bezalt, dieselbenn auch
zue mein handenn empfangen, vnnd in mein vnnd meiner Erben nutz vnnd frommen angewendt, Darumben ich Jhr ehrwird, meine Erben, Oder wer ehe domina
Äbtißin, Vnnd dero Conuent, sambt dero nachkommen, oder wer fur Jhn quittir, entledig, bekenne vnnd geleister außzalung, quit ledig vnnd loß sage, Vnnd thue mich,
der Exception non numeratæ pecuniæ, wie auch gefurtes Ackers, hiemit gentzlich vnnd Endtlich verzeihen, Zusage vnnd gelobe hierauff ich obgedachter Nicklas
Rüdinger, Vor mich alle meine Erben vnnd Erbnehmen, Das wir noch niemandt von Vnsentwegenn, ObEhngedachte Äbtißin, Vrsula Helmin, nebenn dero gantzem
Conuent, des Stifft S: Clara, Vnnd Junckfraw Closters in Eger, Vnnd allen dero nachkommen, Jnn oblobtes Ackers, desselbenn grundt, boden, Rain vnnd Marck, kauff
Summen, noch ander halber, hinfuro zue Ewigenn Zeitenn nimmermehr beschaidigen, anlangen, noch besprechenn sollenn noch wollenn, weder mit noch ahne Recht, gantz in allai
nerley weiß noch wege, wie Jmmer zue erdenckenn sein möcht, Sonndernn geruehenn, entwehren, freyen, Vnnd ledigenn wollenn, Als der Erbarnn Statt Eger Recht Vnnd gewon
heit ist, Bey meinem wahren Trewen vnnd glauben, ohne gefehrde, Zue Vrkundt hab ich Obgedachter Rüdinger, Vor mich alle meine Erben vnnd Erbnehmen, mit sonndern vleis
erbettenn, Die Ehrnuestenn vnnd Weisenn Herren Clement Weickher, vnnd Leonhardt Sinffracht, bede des Raths der Statt Eger, Das sie Jre Jnsigel, doch Jnen ohne schadenn,
Zugezeugnus an diesenn brieff anhangendt vffgedruckht, Geschen vnnd geben den zwaintzigistenn Monattstag Nouembris, Jm funfftzehenhundert Sechs Vnnd Neuntzigistenn
Jahre