Ich Adam Trahamer vff Pogradt Burgermeister in Eger Hiemit vor mich alle
meine Erben Erbnehmen vnd Nachkommen, Bekenne vnd Thue kundt das ich mit gutem willen vnd Rechten wissen, auch vmb mein meiner
Erben nutz Vnd frommen wegen, mein Zwisparnn Hoff vnnd herberg Zur Mühlbach aneinander gelegen vnnd bawendt, der Zeit Lorentz Wörlner denn Hoff, Die
Herberg aber Mathes Pögel, mit derselben Manschafft, grundt bodenn, Teichen, Zinsen, hölzern, fleiß, Scharwerckhen, Vnnd klein gerechtigkeiten, nach besag der alten
hiemit Vbergebenen Brieffebrieff, besucht Vnnd Vnbesucht, Zur dorff Vnnd feldt, Vnd vnden der Erdenn, nichts außgenommen, Allermaßenn ich solchs bißhero Inne
gehabt, genützt genossenn Vnnd gebraucht, Vnnd seindt beidel der Hoff Vnnd herberg, Zeiget brieff anhang, Vorstenn an her den darauß stehenden Zinsenn so Ebn Vffge
worffenn, Meißlenn klein gerechtigkeiten, Ledig Vnnd frey, hiemit In der bestenn form Rechtens, Denen Ehrwürdigenn in Gott vnnd Andächtigenn Vrsula Helmin, Äbtissin
in dem dero geordentenn Priorin, Meisterin, Vnnd ein gantzem Conuent, des Stiffts Sant Clara, Vnnd Franciscani Closters in Eger, Vnnd allenn dero Nachkommen,
Durch ein Tausch Erblich Vnd in Ewig, Verkaufft Vnnd Zugelassenn gebenn, Also das sie Ehrwürdenn Vnnd andacht, nebenn dero Conuent, mir hingegenn, darumben Vnnd darfür
besag der mir hierüber eingehändtenn gegenn Brieffschafft, Ein andern mein, dero Zwisparnn Hoff Vnnd Vnderthanen, Darauff Izo Endres Keßler wonhafft Zur Pogradt
gelegenn, mit dem darZue gehörigenn Zweyenn Teichen, Zinsen Manschafftenn, Meißlenn hölzern Vnnd Scharwerckhen, Abgetrettenn, Vnnd damit Vergnüegen gemacht,
So ich auch hiemit in mein Poßes, Als baldenn genummen vnnd empfangenn, wie auch mir der Vnderthann, seinen pflicht geleist, Verkauffte auch gehörtenn mein
Hoff, Vnnd herberg, nebenn denn darauff habendenn Zinsenn, Manschafftenn, Meißlenn hölzern klein gerechtigkeitenn, grundt Vnnd bodenn, Vnnd Aller derselben
ein Vnnd Zugehörung, nichts außgenommen, allermaßenn ich die Inne gehabt, genützt genossenn vnnd gebraucht, Vorermeltenn Äbtissin, Priorin, Vnnd Meiste
rin, nebenn dero Conuent hiemit freywillig, Vnnd thue Iher Ehrwürdenn vnnd andacht, in alle Vnnd Jedes derselbenn Poßession, Vnnd daruon, hiemit bester Rechts
form, einsetzen, mich Vnnd mein Erben aber derselbenn würcklich entsetzenn, Vnnd thue mich aller darbey habendenn Vnnd gehabtenn Vnsprüch Vnnd Rechtenn, sonderlich
der Exception non numerata pecunia außtrucklich VerZeihenn, Gerede vnd Gelobe Demnach ich eingangs ermelter Adam Trahamer, Vor mich meine
Erben Erbnehmen Vnnd Nachkommen, Das wir nach niemands Vonn Vnsertwegenn, Wolermelte Äbtissin, Priorin, Meisterin, nebenn dero gantzenn Conuent, hier ob
leibtes meines Hoffs vnnd Herberg, dero Manschafft, Teichen, hölzern, Scharwerckh, klein gerechtigkeiten, grundt bodenn, kauff, nimmer, noch ander, deßhalben hinfüro Zur
Ewigenn Zeitenn, nimmer mehr beschaidigenn anlangenn noch besprechenn sollenn noch wollenn, mit noch ohn Recht, in kain weiß noch wege, wie Immer Zur erdenckhenn, Sondern
gewehrenn entwerhenn freyenn Vnnd ledigenn wollenn vnnd sollenn, wie sich der Stadt Eger Vnnd derselbenn Craiß Recht Vnnd altherkommen ist, Zur Vrkundt hab ich offt
ermelter Adam Trahamer, Vor mich vnnd meine Erben, Zur endt dieser gewehrschafft, mein angeboren Insigel anhangendt Vffgedruckht, Vnnd mit Vleiß erbettenn, Dem
Ernuesten Vnnd Weisen herrn, Erhardten Richter, des Raths in Eger, mein liebenn herrn Schwagern, Das er Zeugnuß, sein ohnschaden, sein angeboren Insigel
Zugleichenn anhangendt, erkenn das mein Vffdruckht, Gescheen Vnnd gebenn, Denn Siebenn Vnnd Zwantzigistenn Monatstag Aprilis, Nach Christi Vnsers herrn
Erlösers Vnnd Seligmachers geburth, Im fünfftzehenhundert Siebenn Vnnd Neuntzigistenn Jahre