Ich her vlreich genant von dem Bor / chgich offenleich an dizem prief vnd tůn chunt allen den die in sehent od(er)
hörent lesen daz ich der Erbenge beschaiden vrowe(n) w(n) wendeln / ezway dez hainreichs hawffraw zů Gvtaw vn(d)
irren Erben han gelasen vnd ze chawffe meine(n) hof zů Gvtaw / für ein freyez aygen nach der stet recht alz
punt recht ist / vnd mit sülcher beschaidenchait alle jar alz dez cyns recht ist auf sand Georgi(n) tag
xxx v groz vnd auf sand Gallen tag xxx v groz prag(er) pfennig / vnd für Roboten vnd and(er)n dainst
dinst viij grozz wizz auch beschaidenleiche ob chain lozug oder vngelt auf der vrowe(n) w(n) wendeln
vnd ir(n) Erben hof gelet wůrd waz dez waltherz hof zů recht ir trag vnd geb daz schol der offte
genante vrowe(n) hof vn(d) ir(n) Erben alz vil tragen geben vnd gelden wir wellen ouch daz der selb
hof zu recht gehoret in fümff tayl ze taylen der vrowe(n) ein fümff tayl vnd den fvier chindern
igleiche(m) chind ein fümff tayl / vnd ob die selb vrow in der selben weil ab gieng daz got nicht
engel / so schol ir tayl erben auf die chinder / vnd ob der chinder in der selben weyst ouch chaines
ab gieng so schol dez selben tayl auf die and(er)n chinder vn(d) auf die vrowe(n) erben / wizz ouch ob die
vor genant vrow w(n) wendel vnd ir Erben an chinder stürben od(er) abgienge(n) daz got nicht engel
so ist d(er) offte genant hof mit rechten vrtayl vnd zu rechte(m) aygen in dez herren gnad vn(d) gwalt
genzleiche(n) d(er)vallen / vnd sw(er) den prief in hat oder beweisen mag von der vrowe(n) w(n) wendeln vnd
ir(n) Erben wegen den gelůb ich befride pey meine(n) trewe(n) vnd allez daz an dizem prief stet gantz
vnd gar volfüren / vnd dar über zu eine(r) gantze(n) stete(n) vrchünd gib ich dizen prief d(er) vrowe(n)
vn(d) wendeln vnd ir(n) Erben mit meine(m) Insigel v(er)sigelt daz ist geschehen do man tzalt von
Cristez gepurt dreytzehen hundert jar dar nach in dem ein vnd dreizzigisten jar an sand Jacobz tag : -