Nos Remundus de Luchtenburch tenore presencium notum facimus uniuersis, quod uillas nostras infra scriptas, uidelicet
Langendorf circa Belam et Baransdorf circa uallem sancte Marie sitas, obligauimus religiosis in Christo uiris domino
Theoderico abbati totique conuentui monasterii Sedlicensis pro ducentis marcis Pragensibus ponderis, ipsos statim in
possessionem dictarum uillarum nostrarum uice et nomine inducentes, sub hac condicione et forma, quod si easdem uillas
a festo kathedre beati Petri proximo instanti infra unius anni spacium non exsoluerimus, quod extunc eedem uille
ad prefatos dominos hereditarie pertineant, et nos nichilominus ipsas dictis dominis iuxta uendicionis formam per
duas reputaciones, quasque ydonei uiri ad hoc tam ex parte dominorum predictorum quam ex parte nostra rite electi super-
addendas nobis dictauerint, recognoscere uolumus omni contradiccione nostra cessante, preces, que pro reuisione dictarum
uillarum ad nos, per nos uel per quemcumque alium fieri possent, nullius efficacie decernentes. In cuius
rei euidenciam presentes fieri et sigilli nostri munimine iussimus communiri. Datum Prage anno domini
millesimo trecentesimo octauo, in uigilia kathedre beati Petri apostoli.