Wir Wenczlaw Bofzrecht Nyckel pef Nyckel Lomer frenczel quatrcz monger Schepphen in den smyden Dar nach dy schepphen aus dem
proghaus herman eldryd Wenczlaw Schadwinkel Stephan hofman Bekennen vnd tun kunt allen den dy nu seynt vnd hernach kunftik werden
Daz dy ersam vrowe lucz turbinne hat gekauft eyn virteyl eyner smyden gelegen in der smyden von der Babel ir vnd irn erben czu haben
vmb xl schok grozer prager pfenninge recht vnd redleich in alle dem rechten als gewonleich ist andir virteil eyner smyden Also schol auch dy
egenante vrowe lucz ir virteyl haben czu irem leybe dy weyl sy lebet an aller manne anspruch Wann daz geschict daz Got gepent vbir sy so
schol daz virteil halb erben auf den conuent czu prowentzel daz andir halbe teyl schol erben auf ir Enikel dy do ist genant Anna geschech abir daz
daz ir Enikel Anna ab sturbe odir ab ginge so schol daz andir halbe teyl auch erben auf dy samenunge czu prowentzel Czu eynem vrkunde diser
Sache hab wir virgenante Schepphen vnser jnsigel an disen pryef geleyt czu eyner warheit vnd vestenenczkeit Daz ist geschehen nach Gotis
gepurt Tausent Jar vnd dreyhundert Jnden Sybenden vnd funfczigsten Jar an Sente Thomas tage dez heyligen zwelfboten alz er waz
an dem Donrstage