Nos Frater Claudius Vaussin Abbas Cistercij
Sacræ Theologiæ in facultate parisiensi Doctor, Christianissimi
Regis in Supremo Burgundiæ Senatu primus Consiliarius,
totius ordinis Cisterciensis caput ac Superior Generalis,
eiusdemque capituli generalis plenaria fungentis
authoritate. Reverendo admodum in Christo patri ac Filio
Charissimo Domno Jacobo Monasterij nostri Beatæ Mariæ
de Aula Regia Abbati, nostro per Bohemiæ Regnum
Moraviam et Lusatiam Vicario generali Salutem in
Domino. Cum unum corpus multi simus in Domino,
et singula eiusdem corporis membra mutuum sibi
debeant auxilium impendere cum unum contingit
infirmari, nostrasque ad aures non sine cordis dolore
pervenerit, nostra in Silesiæ provincia sita Monasteria
multis modis divexari, nullam ibi Seminariorum curam
haberi, Regularem observantiam inter multos relaxari,
privilegia nostra contemni, imo in grave ordinis sacri
dedecus et detrimentum a Domino Episcopo Vratislaviensi
Reverendum Coabbatem nostrum heinrichoviensem ex
publica via arrestatum ad residentiam Episcopalem per
milites adductum fuisse et omnes Reverendos Coabbates
nostros Silesianos publico edicto excomunicatos extitisse.
Nec deceat nos inter tot tumultus obmutescere tanquam
canes non valentes latrare. Idcirco te de cuius probitate
Zelo et experientia nobis constat specialem Commissarium
nostrum deputavimus et institutum voluimus prout per
præsentes deputamus et instituimus, quatenus in præfatam
Silesiæ Provinciam te subito conferens omnia et singula
Monasteria sacri nostri ordinis utriusque sexus in præfata