Wir Wenczlaw von gotes gnaden Romischer kunig zu allen czeiten mer(er) des Reichs vnd kunig zu Beheim Be
kennen vnd thun kunt offenleich mit disem briue allen den die in sehen oder horen lesen das fur vns komen
sein der Burgermeister Ratmann vnd burger zu Budissin vnser lieben getrewen vnd legten vns fur wie
das sie einen walt der genant ist Cucker doran Sieben schok jeriger gulde Czwei schok vf Chasschendorf vnd
funf schok zu dem Heynichen mit allen iren rechten nuczen vnd zugehorungen die von vns als einen kunig
zu Beheim zu lehen ruren wider Czasslawen von Penak vnsern lieben getrewen vm eine genante Sumen gel
des recht vnd redlichen gekauffet hetten vnd baten vns mit fleisse das wir in vnd irer Stat den egenan(ten) walt
vnd Cynse mit iren nuczen vnd zugehorungen als ein kunig zu Beheim genediclichen geruchten zu leihen
Des haben wir anngesehen ire fleissige bete vnd auch nucz vnd getrewe dinste die sie vns oft malichen vnd wil
liclichen erzeiget haben teglichen erzeigen vnd noch tun sollen vnd mogen in kunftigen czeiten vnd haben mit
wolbedachtem mute Rate vnser getrewen vnd von rechter wissen den egenan(ten) Burgern vnd Stat zu Budissin
den selben walt Cucker genant mit allen seinen begriffungen als er von alder gewest ist vnd als in der egenan(te)
Czasslaw von Penak vns her gehabt hat mit sampt den egenan(ten) Sieben schokken geldes in den dorffern zu Chas
schendorf vnd zu dem heynichen vnd mit allen iren enden nuczen vnd zugehorungen wie man die benennen
mage genediclichen verlihen vnd geeygent verleihen vnd eygen die von kuniglicher macht zu Beheim in
kraft dicz briues von jn jren Erben vnd nachkomen vnd der Stat zu Budissin ewiglichen zu haben zu halden
vnd zu besiczen in aller der masse vnd weise als der egenan(te) Czasslaw von Penak die egenan(ten) walt vnd
Cynse vns her gehabt vnd besessen hat vnschedigleich doch vns vnsern Erben vnd nachkomen kunigen
vnd der Cronen zu Beheim vnd sust allermeniclichen an vnsern vnd iren rechten mit vrkund dicz briues
versigelt mit vnser kuniglicher maiestat Jnsigel Geben zu Prage nach Cristes geburd dreiczehenhundert
Jare vnd dornach in dem Sechsvndachtczigistem jare des nechsten Sunabendes vor letare vnser Reiche des
Beheimischen in dem dreyvndczweinczigistem vnd des Romischen in dem Czehenden jare