Wir Hannus von pflamstorf vnd vnser Bruder hincz bekennen offenberlich allen den dy disen gegenwortigen brif sehen adir horen lesin daz wir
mit gutem willen vnd mit bedachtem mute recht vnd redlich vorkauft habin vndehalp schok gros rechtis cinses czu der Domeny vnd czu
der Schonlynden gelegen mit gerichte mit wyltweyde mit byschweyde mit wysemat mit vnsem teyle dez wassers daz da fleuset inder ist
mit vnsem teyl der leyten dy czu den vorbenaten dorfern gehoret bys anden arnsbg vnd mit anderm gebirge in alle den reyn vnd mit alle dem
rechten als wir sy gehabt habin mit cleynem vnd mit grosem vmme czwey vnd drysyk schok gros pregisscher phfennige hanken plabnere Burgge
czu komathau vnd sinen Erbin vnd der vorbenate cins sol gevallen halp vf sente michahel tak der nuchste czu kumftik ist vnd halp vf sente
walpurg tak der danach neste komet also sol is syn alleryereglich vnd wir habin dy leute an hanken gewyst vnd an sine Erbin mit dem cinse
als recht ist vnd ab hanken adir sine Erbin keynerley sache an trete von des vorbenaten cinses wegen is were in geystlichem gerichte adir in werlt
lychem adir wo von is were dez gelobe wir ym czu entwerren mit vnsem gute vnd nicht mit dem seyn vnd dy leute sullen als gut recht habin in
vnser welde czu baren als vns leute habin auch habe wir daz vorbenate gut vorkauft mit sulcher vnderscheyt wenne vns got gut beschert
vnd czu hanken komen adir an sinen Erbin so sol her vns daz vorbenate gut widir czu kaufen gebin vmme dy vorbenaten czwey vnd drysyk schok
vnd vf welchen tak wir daz gut widir kaufen so sol in der neste cins danach an hanken plabnern gevallen vnd an sine Erbin vnd ab wir
daz gut nicht mochten widir gekaufen adir ab wir abgingen dez got nicht enwolle so sol is vnse Bruder dytherich vnd vnse vettern widir kaufen
mit alle dem rechten als wir selbin wenne sy nach vns dy nesten Erbin dorczu syn czu eyme geczuknisse vnd vestenunge d vorbeschriben rede habe wir vor
benaten cwene geBrudere gehangen vnse Ingesigele an disen offen brif vnd habin gebeten vnsen herren den komathawer czu komathau vnd vnsen
Bruder dytherich vnd vnsen vetter heynrich vnd vnsen vetter hanns dez Eldern dytherichs sun daz dy auch czu eyme geczuknisse habin gehange
ire Ingesigele an disen gegenwortigen brif gegebin noch cristi geburte dryczenhundirt iar in dem neun vnd fumfczigsten iare an sente
margareten tage der heyligen Juncfrawen