Wir Ferdinand von gots genaden zu Hungern vnnd Behaim 2c(etera) Kunig Infant in Hispanien Ertzhertzog zu Osterreich Marggraue
zu Merhern Hertzog zu Lutzenburg vnd in Slesien Marggraue zu Lausitz 2c(etera) Bekennen vnd thun kundt allermenigclich das die gantze vnd
landtschafft zu Teschen vnsere lieben getrewen ir abere botschafft zu vnns gesanndt vnd vnns demuetigclich bitten lassen das wir jnen
vnd allen jren nachkumen alle vnd yegkliche jre genad freyhait recht handtfeste brieff priuilegia vnd guete gewonhait die jnen vonn
Romischen kaysern vnd kunigen zu Behaim vnsern vorfarn gegeben sein zuuernewen zuconfirmirn vnd zubestetigen genedigclichen
geruechten Haben wir angesehen ir diemietig vnd vleissig bett Auch betracht getrew angeneme dienste so sy vns jre vorfordern vnsern
geerwelten kaysern vnns vnd der Cron zu Behaim offt vnd dickh willeigclich vnd vnuierdrossen gethan tegclich thun Auch in künfftig zeit
wol thun mugen vnd sollen Vnd haben darumb mit wolbedachtem muet guetem rat vnd rechter wissen jnen vnd allenn jren nachkumen alle
vnd yegkliche jre genad freyhait recht brief Priuilegia handtfesten vnd guete gewonhait die jnen von den obgenanten kunigen kayser vnnd
kunigen zu Behaim vnsern vorfarn geben Vnd auch darzu ir alte gewonhait vnd herkumen die sy vmbher herbracht haben in allen jren
stucken puncten artikeln vnd begriffungen wie dann die lauten vnd begriffen sein genedigclich vernewt Confirmirt vnd bestetigt Ver
newen Confirmirn vnd bestetigen jnen die von kunigcliger macht als ain kunig zu Behaim mit vnd in krafft dits brieffs Mainen
setzen vnd wellen das sy furpas mer alle mechtig vnd krefftig sein Vnd sy alls dabey bleyben vnd der an allen enden gebrauchen vnd geniessen
sollen vnd mugen Gleicherweys als ob sy von wort zu wort in disem brief begriffen vnd geschriben weren von allermenigclich vnuersindert
Gebieten darauff allen vnd yegklichen vnsern vnd der Cron zu Behaim vnderthanen in was wirden stands oder wesens die sein ernstlich vnd
vestigclich mit dem brieff das sy die vorgenanten gantze vnd lanndtschafft zu Teschen vnd jre nachkumen an solhen vorgenanten jren
genaden freyhaiten rechten briefn Priuilegien handtfestn vnd gueten gewonhaiten furpas nicht hindern noch jrren sollen in kain weys sonder
sy dabey von vnser vnd der Cron zu Behaim wegen handthaben schutzen schirmen vnd geleitlich bleyben lassen Als lieb jnen sey vnser swere
straff vnd vngenad zuuermeyden Zu vrkund mit vnserm kunigclichen anhangenden Innsigl besigelt Geben auf vnserm
kunigclichen geslos Prag am funfftundzwaintzigistn tag des monats Februarij Nach Cristi vnsers lieben herrn gepurdt Tausent
funffhundert vnd im dreissigistn Vnser reiche im sechsten Jarn