Wir Andres plumel Richter Andres poloner Hanns swal(b) Schepfenmeyst(er) in den geczit(en) Thomel prunnbart ffridrich himel wenczlab walman wenczlab
bartusch Bernhart gruber Thomel hager Hannan flengel hensel novel Elbel von taws(t) pes(ch) vom stain Hannan Rot vnd dy and(er)n Schepfen gemain
leuthen des perges gwn chnitz Bekennen vnd tun kunt allen den dy nu sein ader hernoch kunftig werden das fur vns komen sein Hannan ader ffrancz
od(er) eyn Otto lilsowstain wenczlab iung peter vla Cuncz peyer Hansman koburger Hanns schuttenhelm Ticz diring Niclas Hannan hensl mit dem schopff
Bernhart vom goblowicz Sigm(un)d kauffman dy alden Schepfen vnd andre ir eydgenossen vnd haben bekant hw das der Erwirdig h(er)r Johannes
Apt czu Czedlicz von sein vnd der ganczen Sämpung wegen desselbn closters czu Czedlicz fur sy komen sein vnd hab sy gepeten das si ym Raten sulden
von der padstuben wegen genant Hoff gelegn vnder der hoen kirchen der er ein recht Grunthen(er) were dy do wol czwey Iar wust gelegen wer vnd
mu(e)st dauon seines rechten Erbgincz empern vmb das das dy pader dy diselbe padstuben in gewer besessen haben czu vil czins daruff vor schriben haben Ouch
sint fur dy egenan(ten) alden Schepfen czliche vnse(re) mitpurge(r) komen dy do czins vff der egenan(ten) padstuben gehabt haben mit des pergs prifen vnd auch
mit des pergsspuch vnd habn begert das man si ains behild bey emem rechte vnd bey irer beweisung laut dy alden Schepfen czu Rate
vnd liessen offenbar ruffen eins czweir dreystund vnd an virde mal wer recht wer do beweisung hett vber dy padstuben auf der Hoff das er
dy furpracht wer den in den geczit swig der sol furbas auch sweygen vnd liessen des kuns(t)en eine namhaftigen tage das sich iderman darczu warn(en)
sulle do quam der egenant h(er)r Johannes apt mit sin(en) prifen vnd mit redlicher beweisung das ein iclicher Apt vnd auch Sämpung des egen(anten)
closters czu Czedlicz rechte Gruntherrn wern der obgenan(ten) padstuben auff der Hoff vnd aller ander padstuben des perges gwn chnitz vnd als
oft der padstuben eine ledig vnd wust lege So mo(e)chten sich der vnderwinden czu iren henden vnd czu iren nuczen So brachten auch fur si vnse(re)
mitpurge(r) czliche des pergspriff vnd czliche pergsspuch dy lauten wy das czliche pader auf diselbe padstuben czins vorkauft hetten als das
dy beweisung ausweiset Do sprachen dy alden Schepfen czu denselbn vns(er)n mitpurg(er)n ir h(er)rn beswecht euch ist nimand vnder euch der sich
der padstuben wo(e)lle vnderwinden vnd den Gruntczins kegen Czedlicz reychen vnd den and(er)n dy do czins darauff haben ein genuge tun des
wil vn(ser) der obgenant h(er)r Johannes apt wol gunnen Do besprachen si sich vnd quamen wider fur dy Schepfen vnd sprachen libn h(er)rn ez ist
vns(er) keyner der sich der padstuben vnderwinden wo(e)lle wen si ist pawfellig vnd must czu vil koston vnd derczins ist czu vil daruff Do
teylten dy alden Schepfen in eine rechten das sich der bescheident h(er)r Johannes Apt vnd dy Sämpung des closters czu Czedlicz als rechte Grunt
h(er)rn der oftgen(anten) padstuben vnderwinden sullen vnd dy wider pawen vnd handlen czu irem nucz vnd frumen also das si der czins vnder des pergs
sigeln vnd auch in des pergsspuch geschriben sullen furbas frey sein in czukunftigen geczit Czu geczewkniss der obgen(anten) alden Schepfen bekentniss
vnd vrteil Habn wir obgen(anten) Richt(er) vnd Schepfen vns(er) gemain Ingsigel das gro(e)sser an disen priff gehenget der do geschriben ist noch
C(r)isti gepurt vierczehen hundret Iare vnd darnoch in dem dritten Iare des freytages fur s(anc)t(e) mathei tag des heylign Czwelfpoten
vnd Ewangelisten