Wir Niclaus poldruber Richter heinczil Tuchmacher purgermaister Elbel flaischacker wiczo
Sneider sicz der Sotin erban vnd di andern gesworn schepfen der stat ze Bervn Bichen vnd
tvn kvnt allen den di disen brif gesehn horen adr lesen das der erber waise man Svnqil von
Babrvngn vnser miding gesunt laibs vnd vernvnft vor vns kvmen ist in vollen rat vnd hat ver=
jehen vnd bekant das her mit gunst ratz vnd gvt willen seiner kinde vnd frevnt der erbern waisen
frowen frowen Claren der Buschewinne purgerinne ze prage ain schok pragerischer groser phenninge ewiger
Jarger gult vnd zinses auf seiner strach huben ackers di her hat ligende zvm tore ze Bervn vm vnd
neben dem Berge plessing genant ze Lhotkaw verkavft hat also das her seine erben vnd nochkvmelinge
das selbe schok grosser phenninge geben vnd gelten schvlen Jerlichen fallen vnvorczogenlich anhebende an
Sante Gallen tag der nv neeste kvmfat wirt das erste halbe schok ze gelten vnd dornoch ze Sante Jvrgen
tag ain halbes schok vnd Jarlich ze sant Galle vnd sant Jvrge tage aller Jerlich ewichliche der vorgenan=
ten frowen Claren irn erben vnd nochkvmelingen di disen brif habent vnd den sie das geschefet vnd enphelent
Vnd ab sie ze kaine der vorgenanten zinse tage adr in den neesten acht tagen den zins nicht engeben vnd
antwurten ze prage als vorgeschribn stat drvmbe sullen sie vier grosse ze busse des versahens geben ze hant
noch den acht tage mit de selben zinse vnd gebn sie danne di vier grosser vnd des zinses nicht in den nee=
sten acht tagen so sulle sie abr vier grose geben ze busse vm das versahen. Auch hat vns der vorgenante
Svnqil von Babrvngn von sein selbens sein erben vnd nochkvmelinge wegn flaischlich gebeten das wir
vor vns vnd vnser nochkvmelinge glubten als wir avch das durch irn bete williclich getan habent ab
sie der vorgeschribn zinse kainen nicht engeben vnd antwurten ze prage als vorgeschribn ist das
wir danne vnvorczogenlich vnd an alle widerrede den vorgenanten lewten di disen brif habent weisen
di egenante huben mit aller zevbehor vnd vntretender habe di dravf wirt vnd doran gehoret ein=
antwurten sulle vnd sie der gewaltik machen vnd do bei mit rechte behalten also lange vns in d zins
vnd di busphenninge vnd avch redeliche beraitseliche schaden di sie drvmb enphingen zevntzen vnd
ze prage geantwurt wrden adr sie selbs deran das alles sich derholen vnd bezalen als vor stat be=
schribn an vrkvnde vnd steter bestetigung dis briues den w mit vnser stat Jngesigl habn
versigelt Geben ze Bervn noch Criste geburte drevzehnhundert Jar an dem ainvndfvmfczigistn
Jare an aller manne vasnacht als man singet Jnuocauit