Wir Ferdinand der Dritte von Gottes gnaden Erwöhlter Römischer Kaiser
zu allen Zeitten Mehrer des Reichs in Germanien, zu Hungern, Böheimb, Dalmatien, Croatien vnd Sclauonien ec. König Ertzhertzog zu Osterreich ec. Marggraff zu Mähren, Hertzog zu
Lutzenburg vnd in Schlesien, vnnd Marggraff zue Laußnitz: Bekennen offentlich mit disem brieff vor iedermenniglich, demnach Vns der Andächtige Vnser Andächtiger vnd lieber getreuer Fr. Alexius Hübner, in Vnterthänigem gehorsamb zuuernemmen geben, wie das
Er durch ein ordentliche Wahl nach inhalt Cistercienser Ordens vnnd seins darumb instituto vnd gewonheit nach, zum Abbt vnd Vorsteher deß Stiffts vnd Closters hauß zue Brauna, ernennet, erwehlt vnd constituiret worden, mit angeheffter gehorsambster bitt, Wir ge
ruheten Vns solche Wahl gnädigst gefallen zulassen, dieselbe auch zue Confirmiren vnnd zubestettigen. Alß haben Wir in Kaiser: vnd Königlichen gnaden angesehen, solche sein demütige bitt, wie nit weniger auch sein Vns gerüembetes Gottsförchtiges leben vnnd
wandel vnd sonderbahre guette qualiteten, vnd derowegen solche Election gnädigst ratificirt vnd bestettiget: Thuen, solches auch hiemit wissentlich, Alß Regierender König zue Böheimb, in Crafft dieses brieffs. Mainen, vnd wollen, daß Er Alexius Hübner
nun vnd hinführo angeregtes Stiffts vnd Closters, nach außweisung Ihm Geistlichen Rechten vnd Satzungen, nicht allein in Spiritualibus zue lob, glori, vnd Ehr des Allmächtigen, vnd fortpflantzung des allein Seligmachenden Catholischen glaubens, sonder auch in
temporalibus, alle desselben Vnterthanen vnd zugehörige, zue des Stiffts nutz, vnd aufnehmen, seinem besten verstandt vnd vermögen nach, regirn, die Ordens Disciplin fleissig in acht nehmen, vnd in Summa alles das Jenige, was einem getreuen Abbt vnd Vor
steher, laut seines gethanen pflicht zustehet, vnd gebürt, auch zuerhaltung des Stiffts wohlerlangten Priuilegien, Recht vnd Gerechtigkeiten, nutzlich vnd vonnöthen sein wirdt, Ihm treulich angelegen sein lassen, in Obacht nehmen, vnd außo beste befördern. Be
felhen hierauf allen vnd jeden Vnsern Vnterthanen, was Standts, Würdts, Ambts, oder wesens die seindt, daß Sie mehrgemelten Alexium Hübner, vor ein ordentlich erwehlten, vnd von Vns Confirmirten Abbten des Stiffts vnd Closters Brauna, erkennen, vnd thuen
insonderheit aber Vnsern jetzigen vnd künfftigen Statthaltern in Vnserm ErbKönigreich Böheimb, daß Sie Ihm in seiner Iurisdiction, Administration, oder sonst im geringsten nicht hirren, noch dises andern zuthuen verstatten, sonder Ihm vilmehr in allen billigen sachen, die
hülffliche handt biethen, vnd gebührenden schutz halten, denen Ordens Verwandten, vnd zum Stifft gehörigen Vnterthanen, daß Sie Ihm, alß Ihrm Vorgesetztem haubt, allen schuldigen respect, ehrerbiettung vnd gehorsamb laisten, auch anders nicht thuen sollen, bey
vermeidung Vnserer schwahern straff vnd vngnadt, hiergegen versehen Wir Vns auch gegen Ihm gnädigst, Er werde zugleich dem Jenigen, was seine geistliche pflicht mit sich bringt, treulich vnd gehorsamblich nachkhomen. Zue Vrkundt dieses
mit Vnserm Kaiser: vnd Königlichen Secret Insigel bekräfftiget. Geben in Vnserer Statt Wien den Siebenden Monats tag Septembris, im Sechtzehenhundert Sechs vnd Viertzigsten, Vnserer Reiche, deß Römischen im Zehenden, deß Hungarischen im Ein vnd zwantzigsten
Ad mandatum Sa(crae)
Maies(ta)tis pro(prium)