Wir Ferdinand der Dritte von Gottes gnaden Erwehlter Römischer Kaißer
Zu Allen zeitten Mehrer des Reichs in Germanien, zu Hungarn, Böheimb, Dalmatien, Croatien, vnd Sclauonien (etc) König, Ertzhertzog zu Osterreich, Marggraff zu Mähren, Hertzog zu Lutzel=
burg, vnnd in Schlesien, Vnd Marggraff zu Laußnitz (etc) Bekennen offentlich mit diesem Brieff, vnnd thun kundt Jedermänniglich, daß vns vnser lieber getreuer Balthasar Leopolt von Künnel, Supplican=
do vnderthänigst fürkommen gethan, Waß gestalt er den Vierzähenden tag Monats Junij deß Sechzehenhundert Sieb(en) vnd dreißigsten Jahrs, daß Guttel Nedamow in dem Marcktt Solau gelegen genandt, So vnder der
Herrschafft Lieppa gelegen, käufflich vberkommen, mit vnderthänigister bitte, Wir geruheten in Kayser: vnnd Königlichen gnaden, Ihm besagtes Guttel, vnd dessen pertinentien zu einem freyen Landtguett zuerheben,
dasselbe vnserer Königlichen Landtaffel einverleiben, vnd die gewonnttige vrkhundt darvber außfertigen zu lassen. Wann Wir dann gnädigst angesehen solche seine vnderthänigste demüthige bitte, auch
Wargenommen vnnd betrachtett seine guette qualiteten, vnd daß Er sich vns, vnnd vnserem Ertzhauß Osterreich, in stättiger devotion geleistet, vnd dieselbe
zu Continuirn sich anerbietten, auch woll thun kan, will vnd soll. Alß haben wir auß rechtem wissen, wolbedachtem Mueth, vnnd zeitig gethanem Rath, vnserer Obris: Rath, vnd lieben getreuen,
in Crafft vns von Gott anvertrauter Kayser: vnd Königlicher Macht vnnd gewalt, deß Regierenden Römischen Kaysers vnd Königs zu Böheimb, Ime das gnädigst gewilliget. Thun das auch hiemit vnnd in Crafft dieses Brieffs, derge=
stalten vnd Mainung, daß nun vnd hinfüro in Ewigen zeiten obbemelttes Guttel Nedamow, ein rechtes freyes Adeliches Landtaffel Guett sein vnd bleiben, auch besagtem Künnel, seinen Erben vnd nachkommen,
dessen pertinentien, in vnserer Königlichen Böheimischen Landtaffel, vor Erb: vnnd Aigenthumb eingelegt werden, sich auch in allem vnd Jedem, wie der Landtaffel rechten, daselbst thut vnd brauch
nehmen, vnnd andern soll, allermassen es mit andern freyen Erb: vnd Landtaffel Güttern deß Landts kundt, gewonnttlich ist, von Männiglich vngehindert. Vnnd gebietten hierauff vnsern Königlichen
Böheimischen Landt Officiern, Landt Cammerern, HoffRäth, Beysitzern, vnd Allenn, sonderlich aber den Ambtleuthen vnserer Königlichen Landtaffel, hiemit Ernst: vnnd Vesteclich, daß Sie besagten von Künnel, (etc)
auch seine Erben vnnd Erbnehmen, in die oben gem(elt) Guttel Nedamow, vnnd Wengauß in der Stadt Lieppa, nicht allein in vnsere Königliche Landtaffel einverleiben, sondern auch Sie dieser vnserer Er=
hebung, hiemit zu wider in kheinem weg noch weiß nicht beschweren lassen, sondern Sie wie auch alle künfftige possessores desselben, darbey schutzen vnnd handthaben, nicht anders thun, bey vermeidung vnser,
vor schweren Straff vnnd vngnad. Deß zu vrkhundt haben Wir Ernstlich, zu vrkhundt diß mit vnserm anhangendem grössern Insigel gefertiget. Geben in vnserer Stadt Preßburg den
Zähenden Monatstag Decembris, im Sechzehenhundert Sieben vnd dreißigsten, vnserer Reiche deß Römischen im Ersten, des Hungarischen im Dreyzehenden, vnd des Böheimischen im Eilfften Jahr.