Ich fraw Margareth Angelin die des Peter Angels seligen eitbe elwirtinne gewesen ist Bekenne vnd thun kunt mit offenbarunge des brifes Allen den
die yn sehen horen oder lesen das ich bey wolgesundem leibe bedacht habe das leyder nichtes so gewiß ist als der tot vnd nicht vngewissers denn die zeit
vnd stunde des todes Hirumb hab ich bey guter vernunft mit redlicher gescheydenhait vnd wol virdedachtem mute meyn letst geschefft alles meynes gutes
getan vnd bestellet zu halden noch meynem tode als hernach geschriben stet Ich schicke vnd mache meine tochter Annen zu ffurmint alles meines
gutes vnd habe die ich denn lasse woran vnd wo ich die habe wie die genant ist nichtes außgenomen es sey an erbe oder an barnder habe vnd nemlich
das hofel zun Geidlern vnd den zehenten doselbest zun klain hard vnd auch den zehenten zun grossen hard vnd was ich teiles habe an eberstrewt
das mein seliger wirt Peter Angel mir vnd mein kinden gelassen hat das schicke ich der benanten meiner tochter Annen mit krafft dis brifes Also das
sie in den benanten meine gutern vnd aller anderr meiner habe vollen gewalt haben schol das zuuerkawffen zu versetzen vnd zugebrawchen mit allen
rechten vnd in allerweiße als das mein benanter seliger wirt Innegehabt vnd biß hier an mich vnd an meine kinder herbracht hat Vnd sunst all
mein gut das ich denn lasse es sey anparschafft oder an anderr habe oder es sey benant oder vnbenant in disem briff das schicke vnd gibe ich alles meiner
benanten tochter Annen domit zuthun vnd zulassen was sie wil vngehindert vor allermennlichen mit der vnterschait das sie alles mein selegeret von dem
selben allen meyne gute ausrichten schol als hernach in disem briff geschriben vnd begriffen ist Zun ersten so schaffe ich das meyn vorbenante tochter
eyn gulden ewiges zinses kawffen vnd geben schol aus irer hant Ierlichin hie in der pfarr in einer pitantzen das sie meyn vnd meiner eltern
selen Ierlichen gedenken schullen Auch schol ich in den parfusen auch in einer pitantzen den zins von mir die vier hewslein hinter der schul Ierlichin
geben den schol yn auch mein tochter oder wem sie das beuilhet raichen vnd geben aus irer hant das sie auch Ir vnd Irer eltern Ierlichin gedenken ie
am dritten tag nach sand Erharts tage des abents mit eyner vigilgen des morgens mit eyner selemesse mit auf gestackten kerzen die denn di messe
aus prynnen Vnd schick meiner swester tochter der Annen Im closter hie zu Eger drey gulden zinsam noch meyne tode zu geben zu irer notdurfft
Vnd schicke hie in sand Nielas gepawe in die pfarr kirchen ey schok bemischer groschen In das spital zun yepew ey halb schok bemischer groschen
Zun parfusen vnd zun predigern In itlich closter ey halb schok bemischer groschen ie zun gepewe vnd dasselbe gelt schol mein benante tochter
Anne raichen vnd geben ie den arbetern in den benanten allern clostern aus irer hant Auch schol mein benante tochter Anne denn an der firo
mundeschafft nyemant hindern Irren noch krenken noch Ir dorein sprechen weder mit gaistlichen noch weltlichen gerichten noch in recht in keine
weiße vngereute Vnd ab Ir ymant dorein spreche in welicherley weiß das geschee So pitt ich meine liben herren den rate hie zu Eger durch gotes
willen das sie denn meine benante tochter an der fvrmundeschafft behalden als sie dann recht han doran Des alles zu vrkunde vnd warem
bekentnisse gebe ich disen briff zu vester bestetigunge versigelt mit den Insigeln der ersamen weisen wey des Albrecht pfaundengemere vnd
des ffridrich layners die zeit baide rathern zu Eger die von meiner fleissigen bete willen Ir an schaden vnd an enkeit habin gehangen an den
briff der geben ist am freitage nach des heiligen leichnams tag nach cristes geburt virtzehenhundert Iar dornach in dem virzehenden Iare