Wir Bruder Johannes Gardian Johannes dwig lesmeister Heringnus der Junckfrawen peichtiger Johannes Ebron vnd
der gancz Couent gemeinlichen der mynnern Bruder sant francisci Ordens Czu Eger Bekennen fur vns vnd vnser
nochkumene bruder offenlichen an dysen offen briff vor allen den di Jn ansehen horen aber lesen Das vns di Ersame
fraw katherina di alt domlin einen Silberen kelch vorgult gegeben hatt den in vnserm Closter Sunderlichen in der
Custeren ewiclichen nuczen vnd geprauchen got zu lob vnd den do von nymermer zu wenden Darumb gereden
vnd geloben schullen vnd wollen wir ein pitanczen halten alle Jar ierlichen ewiclichen am nechsten Suntag vor
pfingsten des obents mit Vigilien mit vir auff gestackten prinnenden kerczen vnd darnoch am Montag mit der
Selmesse aber mit vir auffgestackten Prinnenden kerczen vnd diser harnoch geschriben selen Vor der Selmesse
vor den ffolck zu gedencken vnd fur sy zu piten Czum Ersten fur den Cuncz Svarcz Elsen seiner wirtinne
Hannsen Svarcz barbara seiner wirtin fur den Alten domell auff dem Rosermhell gesessen vnd fur alle di
di auss dysen geslecht verscheiden sein aber noch verscheiden Auff das das alles obgeschriben von vns vnd vnsern
nochkummen bruderen ewiclichen alle Jar Jerlichen stet vnd gancz gehalten wrt als oben geschriben stet als
wir das pitecz das erste Jar an gefangen vnd vorpracht habn Das also furder alle Jar ierlichen ewiclichen
zuuolpringen geben Wir Jn dysen briff versigelt mit vnsers des gardians vnd Couentes anhangenden Jnsigeln
versigelt Der geben ist noch Cristi gepurt virczehenhundert Jar dornoch Jn dem dreyvndvirczigisten Jare am mitwoch
vor pfingsten ic