Ich Bernhardin Gindel von Eger Bekenn fur mich all mein erben vnd nachkomen offenlich an disem brieff vor allen den die In sehen ader horen lesen das ich got dem almechtigen zw lob vnd eren dir hilff vnd trost mein vnd meiner lieben hausfrawen
vnd Elldern Sele gegeben vnd zuegeaygent hab zway Schock gross ewigs zins auff der wiesen die des dyetls gewesen ist die ietzunt der sabell vntern Iuden hat vnd Ein gulden ewigs zins auff dem haws das des Schrotters bey den
Brudern neben des Schellers gewesen ist das ietzunt des Boqman pintters ist vnd Ein gulden ewigs zins auf dem haws das des Dobrzyners in der Slegelgas gewesen ist vnd ietzunt der Sertner hat Zw vier ewigen pitanczen vnd
gedechtnus ewiglich zuegeaygent vnd gegeben hab Nemlichen in der gestallt Das die Erwirdigen vnd gaistlichen Iunckfrawen die Ebbteissin vnd der gancz Conent des Closters Sant Clarey Ordens allhie zw Eger solch drey hawsbrieff
vber die obgeschriben zins Inuen haben sollen Vnd alle Iar ewiglich die drey kotember noch ainander zw den Brudern ader zw den predigern wo es den Iunckfrawen gefellig vnd eben ist zw ider quatember vigili vnd Selmes bestallen sollen
Darain sol In den Brudern noch niemant kein einrede noch hindernus thun Zw yder kotember sol man den nechsten Sontag vor der begengknus In dem Closter do die begengknus sein wirt vor auff dem predigstul die lieben Sele verkundigen
Mitnamen fur Bernh(ardin) Gindels sele Anna die sein hausfraw gewest ist fur Eua Bernhardin Gindln sele fur hannsen Gindell der sein Sun gewest ist vnd aller seiner kinder Sele Vnd fur alle die lieben Sele in auss dem geslecht ver
schiden sindt Vnd so got vber mich gepewt sol ich auch mit namen eingeczogen werden Vnd auff welichen abent man die vigilien wirt halden vmb den morgens in den Selampt Also sullen die obbestimpten Iunckfrawen in dem Closter
durch die gesagten furmund bestallen mit den Brudern in denselben Closter denselben abent dorauff man die vigili verbundet hat das Sie lesen ein vigili von newn Lection Vnd was sich sust dorzw gepurt vnd morgens dornach ein
gesungene Selmess vnd die andern Bruder sullen alle Selmess lesen ader collecten einlegen als Ir gewonhait ist fur die lieben Sele dauon sulch almusen herkumbt Vnd so die Iunckfrawen sulche begengknus bestallt haben auff welichen
tag So sullen Sie es die furmundt vor drey ader vier tag wissen lassen was man den Brudern kauffen sol das sullen die furmundt thun on allen verczugk Nemlich zw den zwayen kotembern zw yder fur ein gulden minder dreyer gross
Speis zw Irer noturfft die dritten kotember fur ein Schock minder dreier gross aber Speis zw Irer noturfft Vmb die vbrigen drey gross zw ider kotember sol man Liechtlein kauffen zu der mess Die vierden kotember alle Iar
sullen nur die Iunckfrawen zw sant Clarey allhie zw Eger ein besundere vigili lesen zw abent mit Newn lection vnd was sich sust dorzw gepurt vnd zw morgens ein gesungen Selampt Vnd sol auch auf dem predigstul verkundt
werden als oben begriffen ist Dorumb sullen die furmundt den obbestimpten Iunckfrawen alle Iar ewigklichen zu derselben kotember Ein Schock gross in Ir closter raichen vnd geben Vnd so die offtgenanten Iunckfrawen dieselben vierden
vigili nicht kunnten ader wollten hallten So sullen Sie bestallen In allermass als die obgemellten drey vigili vnd sol dasselbig Schock gross dohin geraicht werden wo den furmunden angetzaigt wirt Inbestallen dasselb begengknus Vnd solch
zway Schock vnd zway gulden zins zu den obgeschriben Selgeret ich vormaint vnd gegeben hab Sullen die furmundt die ein Ratz zu meinem Selgeret gibt Einfordern vnd eynnemen sein vnd albag zu ider kotember dohin raichen vnd
geben als ich es obenbemellt geschicht hab noch beuelh der Closter Iunckfrawen obgenant Vnd so die furmundt an solchem Zinsseyn einzufordern sewmig wern ader sich susten doruber wolten sperren vnd den Brudern vnd Clostern
das nicht raichen wie ich es In oben gemaint hab So sullen die Iunckfrawen ganczen vollen gewallt vnd macht haben durch sie ader Ir Ambtleut vnd hilff Ires furmundts einen Burgermayster einen Ratz ader Gericht
zuelangen vnd die furmundt vnd Zinsleut mit den hausbrieffen vber die zins dohin zuczwingen auff das die zins gefellen vnd an die endt komen wo ich es obengeschriben hin gemaint hab Vnd ob die Zinsleut einer ader mer
seinen Zins ablosen wolten so sol man In das vergunnen albag ein Schock vmb zwainczig Schock ader ein gulden vmb zwainczig gulden nachdem ich es einen Ratz zuegesagt hab vnd wenn ein Zinsman ein ablosung thun will
so sullen Sie es albag vor der zins frist den Iunckfrawen ein halbs Iar vor anssagen Wenn dann die bezalung geschiht mit den versaczten Zinsseyn so sullen es die Iunckfrawen vnd die furmundt sulch gelt albag zwainczig vmb eine
wider miteinader anlegen auf gewisse erbe das den Zinsseyn kein abgangk nicht geschee vnd denselben newen hausbrieff sullen die Iunckfrawen wider zw Iren handen nemen Vnd sol also wie oben stet fur vnd fur gehallten werden
trewlich vnd on als geuerde als ich des einen ganczen getrawen Zw In hab Darauff verzeich ich mich obgenanter Bernhardin Gindell sulcher zwaier Schock vnd zwaier guld ewigs zins zu den obgeschriben Selgeret Vnd glob
dobei fur mich all mein erben vnd nachkomen Noch nymant von meinet wegen die benanten Iunckfrawen vnd Ir Closter vmb solchen zins nymermer zuberawben anlangen noch zusprechen sollen noch wollen Sunder sulche
zins ewiglich bei disem Selgeret bleiben wollen lassen bei wahren guten trawen on arck vnd ongeuerde Des alles zwawar vrkund vnd steter haltung han ich obgenanter Bernhardin Gindel mein angeporn
Innsigell an den brieff gehangen Vnd hab dorzw mit vleis gebeten meinen lieben Bruder Iohann Gindell vnd meins Shens Ieorgen daniel das Sie Ir Innsigell von meiner bett wegen des zugezeugknus In on schaden Zw
dem mein an den brieff gehangen haben Der geben ist am nechsten Sunabent noch vnser lieben frawen tag Liechtmess Nach Cristi vnnsers Lieben hern geburt funffczehenhundertt vnd Im Dritten Iare