Wir Gunther(us) Helmdt Gardian Vnd der Conenth Sant francisci Ordens des
closters zu Eger Nach dem die Erwirdig fraw vnd mutter Katherina von Selwitz
Abtessin Mit sampt jrm Conenth des ordens Sant Clary zu nechst pey vns
Wonent Eine Nusth oder auffal durch jrn garte(n) pey acht oder newn schuhen
vngeferlich vnter der erden der jn vnbeswernus sein soll zu mache(n) vnd zu
leiten Williglich vergunnet haben vnd vergunne(n) also Bekenne(n) wir gemeldter
Gardian vnd Conenth der gantze(n) samnung fur vns vnd alle vnsser nachkume(n)
Veter vnd Bruder das wir den genanndte(n) Nusth oder auffal nicht von
gebur oder gerechtigkeut haben Sunder auß pet vnd williger freuntlicher
vergunstung der wirdige(n) frawe(n) Mutter Abtessin vnd swestern doch mit soliche(m)
vnterscheid so hernach kuntlich wurd das der selbig grundt darynne(n) der
auffal oder Nusth get den swestern not wer von jrer not oder nutz wegen
oder so jn einigerley beswernus oder schade(n) davon entspringe(n) mocht So sollen
vnd wollen wir an allen behelff oder furneme(n) Wie das genenndt mug werden
lassen farn vnd abthun Auch so der selbig Nusth gebrechlich wurd So sollen
vnd wolle(n) wir den selben wider lassen pessern vnd mache(n) an allen jrn schaden
des zu warer Bekentniß geben wir wissenlich Mit gute(m) willen Mit vnsser
des Gardian vnd Connentys peden anhangende(n) jnsigeln Beschehen Nach Cristi
vnssers liebe(n) hern geburt funffzehenhundert vnd jm achzehende(n) jar Am freitag
Nach Marie Magdalene der heilige(n) pusserin