Von Gottes gnaden Wier Carll Hertzog in Schlesien
zue Troppaw vnd Jagerndorff, Furst vnd Regierer des Haus Liechtensteins, Rom(isch) Kay(serlicher) Matt(estät) Gehaimer Rath, vnd volmechtiger Statthalter im Kónig
reich Bóheimb, Bekennen hiemit offentlich vor Menniglich, demnach Vns der Guardian, vnd seine Ordens Brúeder des Closters zu den Heiligen Vier
zehen Nothhelffern, bey der Statt Cadan in demut zuvernemben gegeben, Was gestalt weiland Kaiser Rudolph hochlóblicher gedechtnus, Jnen zu desto
besserer vnterhaltung, weil Sie allein von den Eleemosynen sich erhalten múessen, zu einer gnedigsten beysteuer, aus dem Weingart Zehent, Jarlich zwey
vnd fúnfftzig Schockh M(eißnisch) auf Wolgefallen bewilliget hette, Jnhalt der darúber außgefertigten Gnaden Verschreibung vnterm dato den Fúnff vnd zwaintzigsten
Octobris des ain tausent fúnffhundert ain vnd achtzigsten Jahrs, so Jhnen hernach von Weilland Kaiser Matthias Christmilterster angedenckhens
ratificirt, vnd Confirmirt worden, Das Wier derselben, auff beschehenes Supplicirn, vnd anhalten, obgenantem Conuent angeregte
bewilligung gleichfals ratificirt, vnd vernewert haben, ratificirn vnd vernewern Jhnen hiemit auch solches hiemit wissentlich, vnd in krafft des Brieffs, an
Statt vnd in Namen Jhrer Kay(serlichen) Matt(estät) Vnsers Allergnedigsten Herrn, Also vnd dergestalt, das Sie obgemelte Gna
den, vnd Vnderhaltung, wie von alters außfúehren, bis auf Jhrer Matt(estät) gnedigsten wolgefallen, aus den Weinberg Zehent daselbst zu Cadan
Jahrlich, vnd Jedes Jahr besondrn zwey vnd fúnfftzig Schockh M(eißnisch) zu Siebentzig Creútzer geraitt, gefolget vnd Zuegestellet werden sollen,
Gnediglich vnd ohn gefehrde, Zue vrkhund Mit Vnserm hierunder, aufgedruckhten fúrstlichen Secret besiegelt, Geben zu Prag den 2. Junij A(nn)o 1623.
Carll m(anu) p(ropria)
Wilhelm Slawata m(anu) p(ropria)
Ex Commissione Ill(ustrissi)mæ Suæ Celsitudinis
B(artholomaeus) de Martinitz m(anu) p(ropria)
B(artholomaeus) Búnzeller m(anu) p(ropria)