Wir Herman geheizen von Drezden erbrich(ter) ze Duxa ouf d(er) Elbe Niclas petman purgmaist(er) Herman krapche haynel ticzil
Hannus modler Thomas hanler vlrich hirbel Niclas von Dristen Heinrich rensiel Herman gebolber Niclas sugeme Hannus liebst
Hannus in d(er) Orten swen von schachow schepfen d(er) genanten stat ze Duxa bekennen des vn(d) beczugen das mit disem gegenwurtigen priefe
das vns(er) purg(er) h(er) Hannus von klatsch mit willen sein erben daz den erbergen leuten daz dem Oberisten maist(er) des spitales sand stefan
alf ouf d(er) pruke ze p(ra)g des Ordens d(er) Creuzer mit dem stern vn(d) daz den bruderen des selben spitales den weingarten pey Duxa
d(er) zv dem genante(n) spitale gehoret d(er) zvnehst pey des modlers weingarte gelegen ist vn(d) d(er) ach(er) d(er) pey dem selben weingarten d(er) genante
brud(er) gelegen ist zv sechs strichen zeseen bestanten hat ze erbrecht im vn(d) sienen Erben ze haben vn(d) ze nuczen erbleich vmb einenso
getanen cinz das d(er) selb h(er) Hannus vn(d) sin erben alle iar ewicleich ie ouf sand Micheles tak des genanten Ordens bruden i(n) das genant
spital ze Duxa antwurten schulen vierzic scheffel gut gersten an all wid(er)red vn(d) an all kost vn(d) an all anbeiz d(er) genante(n) brud(er) vn(d)
des genante(n) spitales ze Duxa Das hat d(er) genant h(er) Hannus von klatsch vor vns vur sich vn(d) vur sin erben gelobet mit gute(n) tre
wen vn(d) wir haben das ouch gelobet gemeinlich mit guten tvewen vur vns vn(d) vnser nachkomlinge welch nach vns Richt(er) vn(d)
schepfen werden ze Duxa in welchem iare das geschehe das d(er) genante h(er) Hannus od(er) sin erben den genante(n) cinz d(er) gersten den
ersten tak zv sand Micheles messe das sie vierzic scheffel gut gersten i(n) daz genante spital nich antburt(en) als vor gesprochen ist
so hat sich d(er) genant weingarte vn(d) d(er) genant ach(er) mit allem dem nuczen d(er) ouf dem selben weingarten vn(d) ouf dem selben ach(er) rurt
|i(n)| erden vn(d) ob d(er) erden ist wid(er) ivallen an das genant spital zv Duxa zv recht ewiclich vn(d) erbleich vn(d) d(er) genant h(er)
Hannus vo(n) klatsch vn(d) sin erben dar nach kein ansp(ra)ch nimm(er) mer gehaben schullen dainnoch sein wir Richt(er) vn(d)
schepfen zv Duxa vns vn(d) vns(er) nachkomlinge Richt(er) vn(d) schepfen dar zv vbunden mit rechte tvewen an all argelist das wir zv
hant nach sand Micheles tak so d(er) cinz die genante(n) vierzic scheffel gersten v(er)sezzen weren zv hant an allen oufschub den genante(n)
bruden in das genant spital ze Duxa den selben v(er)sezzenen cinz das ist vierzic scheffel gut gersten vn(d) dar zv vier schoo
grozz p(ra)g(er) pfenninge od(er) lotiges silbers drei Mark ob die Mvnez v(er)kart wurde ze buzze od(er) ein guld(en) pfant das des genanten
cinzes vn(d) d(er) buze als vol wer sei das man is d(er) vur obsain durft gescheh an iuden od(er) an cristen v(er)seczen muge antwurten
schulen vn(d) zogenleichen von allain dem gute vavendem vn(d) vnvavendem das d(er) genant h(er) Hannus von klatsch vn(d) sein erben
gelaisten mugen vn(d) dainnoch schol sich d(er) genant weingarte vn(d) d(er) genant ach(er) an das genant spital ze Duxa ewiclich ivallen
haben als vor gesprochen ist das da kein hindirnusse noch kein wid(er)red zv gehore is schule d(er) selbe weingarte vn(d) d(er) selbe
ach(er) des selben spitales zv Duxa wid(er) sein sinrechtes erbedygen als von erst vn(d) ob d(er) genant Hannus von klatsch od(er) sin erbe
den genanten weingarten vn(d) den genanten ach(er) v(er)koufen od(er) v(er)wemdem wollen des schullen sie nicht tun denne mit wyzze
vn(d) mit willen des obristen maist(er)s vn(d) des conuents des spitales ze p(ra)g Zv vrkund vn(d) zv ein ewigen stetkeit dis(er) dinge
vn(d) all(er) d(er) gelubde die an disem priefe gelobet sint habe(n) wir vns(er) stat Ingesigel geleget an disen prief d(er) gegeben ist nach
xp(ist)es geburt ch(rist)i drevzehenhundert iar vn(d) dar nach in dem ach vn(d) zwainzigisten iar an dem haligen oberisten abent vnsers
h(er)ren ihu xpi