Wir Johel etteswann h(er)n Jacobes sun, Hainreich gehaizzen von Toust, vn(d) Nielas Rotel, gesworn
schepfen ze P(ra)g, Wir bekennen an disem gegenwurtigen p(ri)ef, Allen den die in geseh(e)n od(er) gehoren lesen,
daz wir gewesen sen pey brud(er) Vlreichen dem Maist(er) dez spitales ze P(ra)g vnd datz sinen brvderen, daz eyn
berichtvng ist geschehen zwisschen dem selben Maist(er) vn(d) zwisschen sinen brvderen, Vnd dem Jacoben dem
Stainbrecher etteswenne dez Zawites sun, vmb den k(ri)eg d(er) da waz vmb den stainbruch d(er) da leit An
dem Letten, Also daz d(er) Maister vn(d) sein brvder den genanten Jacoben an(d) sein erben begnadet haben daz er
vn(d) sin erben den selben stainbruch sullen p(ro)bten von Ostern die schierist wirt die nechsten drev iar,
vmb halben nvtz d(er) da von gevallen mac, vn(d) daz d(er) nvtz halber dem Maist(er) vn(d) den brvd(er)n gevall(e)n schol
ez sey an stainen od(er) an pfenningen, Vnd swen(n)e ez d(er) Maist(er) vn(d) die brvd(er) staine bedorften zv dem hove od(er)
zv d(er) prvcken, so schol d(er) Maist(er) zwen knechte od(er) drei senden vn(d) schol stain lazzen brechen ovf sein pfen
ninge An dem selben stainbruche pey dem Jacoben, do schol in d(er) gena(n)t Jacob vn(d) sein erben nicht an hindaren
Wenn ab(er) die genante(n) drev iar ovz komen, so schol d(er) genant Jacob vn(d) sin erben dez genante(n) stainbruches
ab treten dem Maist(er) dez genanten spitales vn(d) sinen brvd(er)n schon gerovmet vn(d) ledic an alle(n) k(ri)eg, Vn(d)
daz disev genante berichtvng ewar vn(d) stete belabe, dez habe(n) wir vnse(r) Ingesigel geleget an disen p(ri)ef
Der gegebe(n) ist nach Cristes geburt vber drevczechenhundert iar vn(d) dar nach i(n) dem dreizzigisten iar
dez nechsten mitwochen vor dem palmtag.